sammohan v vashikaran - labh kaise len  

bharat desh ke log adhyatm, darshan, yog v uski shaktiyon se jude rahen hain. sammohan bhi yog v dhyan ka hi ek pratirup hai. man ki bikhri hui shaktiyon ko ekatrit kar us badhi hui shakti se kisi vyakti ko prabhavit karne ki vidya ko sammohan kaha jata hai. sammohan jise pran vidya ya trikal vidya bhi kahte hain bharat ki prachin vidya hai. rudrayamal v tantra chudamni men sammohan v vashikaran ka vivaran mil jata hai. amtaur par sammohan ka arth vashikaran se lagaya jata hai. parantu yah sammohan se bahut niche ki bat hai. isi karan sammohan kala ka samman jitna videshon men hota hai, utna hi hamare desh men ise vashikaran manne se andhvishvas se jod kar dekha jata hai. sach bhi hai kyonki kuch tantrik vashikaran vidya ka durupyog karne se nahin hichkte.

vashikaran banam sammohan –

vashikaran ka arth hai kisi ko vash men karna. iske liye sabse jaruri chij hai - dhyan. jis vishay vastu ko apne vash men karne ki ichcha ho to uske liye apna man kendrit karna hi dhyan hai. dhyan se hamare sharir men adbhut urja ka sanchar hota hai. prachin kal se hi hamare rishi muni dhyan laga kar tejasvi ho gaye, unke chehre par ek alag hi tej v muskan rahti thi. isi prakar ham jitna adhik dhyan ya mediteshan karengen utna hi adhik hamara vyaktitva nikhar kar ayega. ham atmavishvas se labrej ho jayengen aur is prakar samne vale vyakti ko apne vash men karna asan ho jayega. yah hai vashikaran.

sammohan men man ka aham karya hota hai. man ke kai star hote hain. inmen se ek hai - atm chetan man. yah man n to vichar karta hai aur n hi nirnay leta hai balki hakikat se avagat karata hai. is man ki sadhna hi sammohan hai. yah man kisi bhi atit ya bhavishya ko janne ki kshamata rakhta hai. sammohan se vicharon ka sanpreshan, dusre ke manobhavon ko gyat karna, adrishya vastu ya atma ko dekhna adi kiya ja sakta hai.

sammohan ek vigyan –

sammohan sadaiv se hi jigyasa v ashcharya ka vishay raha hai. ise vigyan v kinvadantiyon ke bich ki sima rekha bhi kah sakte hain. pashchim deshon men ise vigyan ke rup men viksit kiya gaya hai, parantu hamare desh men ise yog sadhna v tratak ka ang mana gaya hai. ise vigyan ke rup men lane ka shrey jata hai da. mesmar ko. ve sammohan se rogi ka upchar kiya karte the. hipnotijm yani sammohan shabd ka avishkar da0 jems bred ne kiya tha. sammohan vyakti ke man ki vah avastha hai jismen uska chetan man dhire dhire tandra ki avastha men chala jata hai aur ardh chetan man sammohan ki prakriya dvara niyantrit kar liya jata hai.

sammohan ke bahut se udahrnon men yah spasht rup se dekha gaya hai ki sammohan ke dvara vyakti ko uske bachapan ki kisi bhi avastha tak le jaya ja sakta hai. kuch sammohan shastri to sammohit hone vale vyakti ke pichle janm tak ke vishay malum kar lete hain. kyonki sammohan men sammohan karne vale v sammohit hone vale ke bich ek tarah ka sanbandh jur jata hai jo un donon ke bich ke sare parde gira kar sachchai ko samne lata hai. sammohan ek aisi kala hai jismen sammohit vyakti ko keval sammohan karne vale ki hi avaj sunai deti hai aur vah us avaj ke nirdeshon ka palan karta hai.

sammohan ke vibhinn tarike –

sammohan vidya men kisi vyakti ko sammohit karne ke liye apnaye gaye vibhinn tarike is prakar se hain –

* dhyan * pranayam * netra tratk

kuch anya tarike bhi ajmaye jate hain jo is prakar se hain –

* kuch log anguthe ko ankhon ki sidh men rakhakar sammohan kriya karte hain.

*kuch log sammohan chakra v ghari ke pendulam ki madad se bhi sammohan kriya karte hain.

*kuch log lal balb v kuch log mombti ko ekatak dekhte huye bhi sammohan kar sakte hain.

sammohan se prabhavit hone vale log –

am taur par logon ka vichar hota hai ki kamjor ichcha shakti vale vyakti ko hi sammohit kiya ja sakta hai. jabki dridh ichchashakti vale ko bhi sammohit karna mushkil nahin hai. pratyek vyakti ko sammohit karne ka tarika saman nahin hota. yah vyakti ke svabhav par bhi nirbhar karta hai ki use sammohit kiya ja sakta hai ya nahin. sammohan se prabhavit hone vale vyaktiyon ko nimn vargane men banta ja sakta hai –

1- 15 pratishat aise log hain jin par sammohan ka asar nahin hota.

2- 40 pratishat logon ka sammohan ke samay maspeshiyon ka tanav kam ho jata hai aur palke jhapkne lagti hain.

3- 15 pratishat log sammohan ke samay tandra ki avastha men chale jate hain aur chune par kuch bhi anubhav nahin karte.

4- 20 pratishat log sammohit karte samay samadhist ho jate hain aur kahe gaye sujhavon ka palan karte hain.

sammohan men nind –

sammohan prakriya ke dauran sammohit hone vale vyakti ko nind a jati hai parantu ye nind sadharan nind nahin hoti. sadharan nind v sammohan ki nind men antar hai. sadharan nind men hamara chetan man apne ap so jata hai v ardh chetan man apne ap jagrat ho jata hai tatha kisi bahri shakti ka upyog nahin hota hai. jabki sammohan men sammohan karta dusre vyakti ke chetan man ko sula kar uske achetan man ko age lata hai aur apne sujhavon ke anusar use karya karne ke liye taiyar karta hai.

sammohan dvara rog upchar –

manav ko hone vale rog do prakar ke hote hain –

1- jinke karan aur karyakshetra purnatah sharirik hote hain inhen sharirik rog kaha jata hai.

2- jinke karan mansik hote hain aur lakshan sharirik hote hain. inhen kriyagat rog kahte hain. prayah sabhi kriyagat rogon men sammohan labhdayak hai.

sammohan ki tandravastha men diye gaye sujhav itne prabhavkari hote hain ki inse rogi ke bahut se mansik rog dur kiye ja sakte hain. jaise ki kisi ko tandravastha men yadi ye sujhav diya jaye ki sharab buri lat hai aur ye uske siradard ka mukhya karan hai to jagne par jab vo sharab piyega to use lagega ki uska sir dard kar raha hai. is tarah se use sharab se aruchi paida ho jayegi aur vah sharab adi buri laton se chutkara pa lega.

hamare man v mastishk men bahut si granthiyan paida ho jati hain jo bad men kisi rog men tabdil ho kar vyakti ko pareshan kar deti hain. sammohan se unka karan dhundh kar unka nivaran kiya ja sakta hai.

anek aise rog hain jinmen sammohan chikitsa dvara upchar kiya gaya hai aur rogi ko labh mila hai –

• siradard, kamar dard, panv ya hath dard
• dar, anindra, mansik tanav, vishad
• lakva, migri
• kamjor yaddasht
• haklana, tutlana
• hriday rog
• nanpuskta
• kabj
• motapa
• kamjor ankhen
• buri adten jaise sharab, sigret

nimn karyane men bhi sammohan vidya dvara karya ko pida rahit kar labh liya gaya hai –

• vibhinn tarah ke apreshan
• dant chikitsa
• prasuti

yadi rogi dhanatmak vicharon ke sath apne rog ka nidan dhundhe to shidhrata se rog se chutkara pa sakta hai. sammohan chikitsa is vishay men kargar siddh hoti hai. sammohan dvara rogi ke rog ke atirikt uske svabhav ka bhi ilaj kiya jata hai. anek vidyarthiyon ki smaran shaktiyon men sudhar sammohan chikitsa dvara sanbhav hua hai. logon ki karya kshamata men vridvi bhi sammohan dvara ki ja sakti hai.

bharat desh men to kai sharirik rogon ka karan man hi hota hai jinse behashi, pagalapan, maigren ke alsar, dayriya ka rog lag jata hai. maigren ka ilaj ke liye sammohan ki avastha men rogi ki jab achetan man ki parten khulti hain to rog ka upchar mil jata hai.

hriday rog ke karan bhi man men bhay, shnaka, nirasha, ishrya, krodh, avesh adi vishaile vichar hain. kisi rog ka bhay bhi sharirik v mansik rog de sakta hai. sammohan is dasha men ati upyogi siddh hua hai. manorog visheshagya da0 charkat ke anusar to aisa koi bhi mansik rog nahin hai jo sammohan dvara thik nahin kiya ja sakta. iska karan hai ki sammohan shakti rogi ke man-mastishk par prabhav dalti hai jiske karan rog ka nivaran jad se hota hai.

sammohan dvara svayan ke rogon ka bhi upchar kiya ja sakta hai. sharir ke kisi bhi ang men rog ya dard ho to yog ke madhyam se vahan apna purn dhyan laga kar sakaratmak urja ka sanchar karke svayan ki chikitsa ki ja sakti hai. lagatar us ang ke svasth hone ki kalpana se us rog ke upchar men saflta mil jati hai.

sammohan ke anya labh –

-apradhiyon ko sammohit avastha men lakar unse apradh ke karnon ka pata lagane men bhi sammohan bahut upyogi siddh ho raha hai.

-telifon dvara bhi sammohan vidya ka upyog kar karya siddh kiya ja sakta hai.

vashikaran ke kuch upyogi mantra –

1. kamdev mantra

‘‘uen namah kam devay sahakal sahadrash sahamasah liye vanhe dhunan janamamadarshan utkanthit kuru kuru, daksh dakshu-dhar kusum-vanen han han svaha’’

ukt mantra ka tinon kal ek ek mala ek mas tak japne se yah mantra siddh ho jayega. prayog karte samay jise dekhakar jap karengen vahin vash men hoga.

2. bajrang mantra

uen pir bajrangi ram lakshman ke sangi.
jahan jahan jaye fatah ke danke bajaye..
‘amuk’ ko moh ke mere pas n laye .
to anjni ka put n kahay..
duhai ram janki ki..

is mantra ko 11 din tak 11 mala jap kar siddh kar len. ramnvmi ya hanuman jayanti ka din is karya ke liye ati shubh hai. prayog ke samay dudh ya dudh se bane padarth par 11 bar mantra padhakar khila ya pila dene vashikaran hoga.

3. sindur mohan mantra

hatheli men hanumant base, bheru base kamar.
narsinh ki mohini, mohe sab sansar.

mohan re mohanta vir, sab viran men tera sir. sabki nazar bandh de, tel sindur charhau tujhe. tel sindur kahan se aya, kailas parvat se aya. kaun laya, anjni ka hanumant, gauri ka ganesh laya. kala gora totla tino base kapar.

binda tel sindur ka, dushman gaya patal. duhai kamiya sindur ki, hame dekh shital ho jaye. satya nam, adesh guru ki, sant guru sant kabir.

asam ke kamrup-kamakhya kshetra men ‘kamiya sindur’ paya jata hai. ise lagatar sat ravivar tak ukt mantra ka 108 bar jap kar mantra ko sidva kar len. prayog ke samay kamiya sindur par 7 bar ukt mantra padhakar apne mathe par tika lagayen. tika lagakar jahan jayengen, sabhi vashibhut hote jayengen.