anadi kal se hi hindu dharm men anek prakar ki manyataon ka samavesh raha hai. vicharon ki prakhrta evan vidvanon ke nirantar chintan se manyataon v asthaon men bhi parivartan hua. kya in manyataon v asthaon ka kuch vaigyanik adhar bhi hai? yah prashn baranbar buddhijivi pathkon ke man ko kachotta hai. dharmagranthon ko uddhrit karke‘ ‘babavakya pramanam’ kahne ka yug ab samapt ho gaya hai. dharmik manyataon par samyak chintan karna aj ke yug ki atyant avashyak pukar ho chuki hai. prashna: hindu log puja-path, pratyek shubh karya purvabhimukh hokar kyon karte hain? uttara: hindu log surya ko pradhan devta ke rup men pujte hain. surya purva men udit hota hai. pratah sandhya men surya ko aghrya diya jata hai jo ki purvabhimukh hokar hi diya ja sakta hai. vedon men bhi pratyek karya evan sanskaron men purvabhimukh hokar baithne ke adesh milte hain. prasiddh lokokti hai ki udit hote huye surya ko sari duniya namaskar karti hai kyonki usmen age badhne ka, unnati ka, uncha uthne ka sandesh chipa hota hai. brahmamuhurt se lekar madhyahn tak surya ka akarshan samne rahne se manvpind ke gyantantu adhik-se-adhik sfurti sanpann rahenge jisse daivi gunon ke vikas ke karan hamare ye dharmik anushthan bhi prabhavshali siddh hote hain. prashna: muslim log pashchim ki or munh karke namaj kyon padhte hain? uttara: kaba pashchim disha ki or sthit hai isliye muslman kaba ki or munh karke hi apni majhbi rasumat ada karna anivarya samjhte hain. unki kabren aur masjiden bhi thik isi disha men banai jati hain aur koi vaigyanik karan nahin hai. prashna: hindu log pitri karm dakshinabhimukh hokar kyon karte hain? uttara: vedadishastron men dakshin disha men chandrama ke upar ki kaksha men pitrilok ki sthiti mani jati hai. tadnusar pitrikarm ka anushthan dakshin men mukh karke karna svabhavik hai. prashna: shraddh bhojan hetu dopahar ke bad ka kal kyon uttam mana jata hai? uttara: shraddh bhojan hetu (kutap kal) aprahn kal shreshth mana jata hai kyonki us samay surya rashmiyan arvachin ho jati hain. surya ki kirnen nistej hokar pashchimabhimukh ho jati hain taki pitrigan kavya prapt kar saken. prashna: tilak dharan kyon karen? uttara: shastron men tilk-dharan ek avashyak dharmik kritya mana gaya hai. tilak ke bina brahman chandal kaha gaya hai. hamare gyan-tantuon ka vicharak kendra bhrikuti aur lalat ka madhya bhag hai. jab ham mastishk se adhik kam lete hain to isi kend men vedna anubhav hone lagti hai. atah hamare maharshiyon ne tilak dharan ka vidhan kiya. chandan ki mahima sabhi vaidya-hakim-daktar jante hain. mastishk ke kendra bindu par chandan ka tilak gyan tantuon ko sanymit v sakriya rakhta hai. aise jatak ko kabhi sir-dard nahin rahta tatha uski medhashakti tej rahti hai. prashna: striyan mang men sindur kyon lagati hain? uttara: bharat men kunkum ke atirikt simant (mang) men sindur lagana suhagin striyon ka pratik mana jata hai aur yah manglsuchak bhi hai. striyon ke lalat men sindur ka bindu jahan saubhagya ka pradhan lakshan samjha jata hai, vahin isse stri ke saundarya men bhi char-chand lag jate hain. vivah-sanskar ke samay var vadhu ke mastak (mang) men sindur lagata hai. yah ek prakar ka sanskar hai. iske bad vivahit stri apne (suhag) pati ki dirghayu ke liye jivanaparyant mang men sindur lagati hai tatha pati ki mrityu ho jane par striyan mang bharna band kar deti hain.
Kya aapko lekh pasand aaya?
Subscribe