har ki pauri  

har ki paudi har ki paudi ka vastu akarrshit karta hai bhakton ko vastuguru kuldip saluja vaise to ganga bharat ke ek chor se dusre chor tak bhumi ko sinchti hui jati hai, parantu kuch sthanon par is pavan pavitra nadi ka dharmik mahatva bahut hi jyada hai. akhir aisa kyon hain ki, ek hi nadi hai aur jal bhi vahi hai? vastushastra ke anusar keval vahi sthan vishesh dharmik astha ka kenndra banta hai jin sthanon ki bhaugolik sthiti dharmik drishti se atyadhik vastusangat hoti hai. pratyek hindu ke man men ek abhilasha rahti hai ki, jivan men ek bar ganga nadi men snan kar apne papon se mukti prapt kare aur uske lie sabse jyada prasiddh sthan hai haridvar sthit brahmakund. vahi brahmakund jiske samip hi patthar se bane ek mandir men bhagvan vishnu ke charan chinh hain. brahmakund men bhaktajan snan karte hain. us mandir ke sath laga hua jo ghat hain, use hi har ki pauri kahte hain. aie dekhte hain ki haridvar aur vahan sthit har ki pauri ke aspas ke kshetra men aisi kaun si bhaugolik vastunukultaen hain jo shraddhaluon ko apni or akarshit karti hain. haridvar ke ek or himalay ki parvat mala hai jahan purva aur pashchim ki or se mili hui shaivalik parvat ki do shakhaen hain. pashchim sthit shaivalik parvat ki ek shakha bilva parvat jahan par mansadevi ka mandir hai. bilva parvat ki purva disha ki talhti par har ki pauri sthit hai. har ki pauriyan bhi is parvat ko kat kar banai gai hai. har ki pauri ke samne vah ghat hai jahan ghantaghar sthit hai aur is ghat ke bad purva disha men ganga ki dusri nahar evan ganga ki mukhay dhara bah rahi hai. kul milakar har ki pauri ke thik nikat pashchim men unchai aur samne dur tak purva disha men dhalan hai. har ki pauri ke pashchim men bhim gora rod evan ganga sabha karyalay unchai par hai. har ki pauri ke ekadam pas vali sarak apar ror ke antim chor par jo pul par samapt hoti hai is pul ka yah chor sarak ke leval ke barabar hai. jabki pul ka dusra chor har ki pauri ke samne us ghat tak hai jahan ghantaghar hai vahan par 15-16 fit ki dhalan hai. islie ghantaghar vale ghat par jane ke lie sirhiyan utrni parti hain. haridvar men ganga nadi uttar se dakshin disha ki or bah rahi hai. kintu har ki pauri se lagabhag 150-200 mitar pahle shmashan ke pas jahan par panjab sindh kshetra ka bhavan hai, vahan se ghumakar ishan kon se har ki pauri ki taraf ati hai aur har ki pauri ke bad kuch mitar duri par hi uprokt pul ke niche punah purva ki or mur kar ganga nadi dakshin vahini ho jati hai. vastushastra ke anusar is prakar pashchim men unchai aur purva disha men dhalan aur vahan par pani ho to aisa sthan logon ki aisi dharmik astha ka kendra ban jata hai, jahan bhaktajan moksh pane ki aur sanyansi siddhi pane ki kamna karte hain. yun to haridvar ki jamin samatal hai. kintu har ki pauri se dakshini disha ki or jahan men bajar, apar rod, moti bajar, sabji mandi, bhalla ror tatha riksha staind ke aspas ki jamin ki dhalan dakshin disha se har ki pauri ki taraf uttar disha ki or hai. vastushastra ke anusar dakshin disha men unchai ho aur uttar disha ki or dhalan ho vah sthan, bhavan, shahar prasiddhi pata hai. jaise jaypur ki pink siti vale bhag men dakshin se uttar ki or dhalan hai, gudganv men bhi dakshin disha se uttar disha ki or dhalan hai. taj mahal ke uttar disha men yamuna nadi bah rahi hai. uttar disha ki yah vastunukulta hi har ki pauri vale kshetra ko vishesh prasiddhi dilane men atyadhik sahayak hai. har ki pauri evan uske as-pas ki isi bhaugolik sthiti ke karan hi yahan ke ghaton ka saundarya vismayapurn hai. jab jab rojana hajaron diye evan gende ke ful pavitra jal par tairte hue pradipt hote hain v sandhyakal men suryast ke bad yahan hone vali ganga arti yahan ane vale paryatkon ke lie ek avismaraniya anubhav hota hai. feng shui ka ek siddhant hai ki, yadi pahar ke madhya men koi bhavan bana ho, jiske piche pahar ki unchai ho, age ki taraf pahar ki dhalan ho, aur dhalan ke bad pani ka jharna, kund, talab, nadi ityadi ho, aisa bhavan prasiddhi pata hai aur sadiyon tak bana rahta hai. feng shui ke is siddhant men disha ka koi mahattva nahin hai. aisa bhavan kisi bhi disha men ho sakta hai. har ki pauri ki pashchim disha men bilva parvat ki unchai hai. uske bad ganga sabha karyalay bhavan hai. fir pauriyan hain aur uske bad har ki pauri sthit brahmakund, bhagvan vishnu ka mandir hai. iske age purva disha ki or ganga nadi ki dharaen bah rahi hai. jo kramshah gahri hai. is prakar har ki pauri vastu evan feng shui donon siddhanton ke purnatah anurup hone se bharat hi nahin apitu vishva bhar men prasiddh hai