sukhi grihasth jivan dae. bi. el. sharma prachin ved puranon men manav jivan men palan ke lie jin char ashramon ki vyavastha ki gayi thi ve hain- brahmacharya ashram, grihasth ashram, vanaprasth ashram aur sanyas ashram.
prachin kal men isi vyavastha ke lie bachchon ko gurukul bhej diya jata tha. vahan bachche brahmacharya vrat ka palan karke vidya adhyayan karte the. fir vidya adhyayan ke pashchat apne mata-pita ke pas akar grihasth ashram men ane ke lie vivah sanpann karte the.
vivah karna avashyak kyon hai?
jis manushya ke man men bhogechcha hai ya jo apni vansh paranpra ko age barhana chahta hai to aise vyakti ko vivah karna chahiye kyonki grihasth ashram hi sab ashramon ka palak hai. manushya sharir aur grihasth ashram uddhar karne ka khas jariya hai. bhog bhogne aur aram karne ke lie yah manushya sharir nahin he. prani matra ki hit ki bhavna rakhte hue grihasth ashram men rahna chahiye aur apni shakti ke anusar tan, man, dhan, buddhi adi ke dvara dusron ko sukh pahunchana chahiye. dusron ki sukh-suvidha ke lie tyag karna manushyata hai. isi ke sath ishvar ka satat chintn-manan karne se moksh ki prapti hoti hai. vaidik riti se ya samaj men manya anya riti rivaj se sanpann vivah ki manyata samaj men hoti hai. bhartiya samaj men bina vivah sanpann kiye stri-purush ka sath men rahna uchit nahin mana jata hai. unhen samaj men adar prapt nahin hota.
islie yadi uproktanusar vivah karna avashyak hai to apni vansh-paranpra ke anusar vidhi-vidhan se vivah sanpann karana chahiye. vaivahik jivan ka jyotishiya vishleshan janm patrika men saptam sthan vivah sthal mana jata hai. larka ho ya larki - us sthan men gaye hue vibhinn grahon ke gun, dharma-svabhav, saumya-krur grah, pap grah adi ki vyakhya karke vaivahik jivan ka vichar kiya jata hai. isi ke sath yah bhi yad rakhne yogya bat hai ki pratyek prani apne bhagya ke anusar fal bhogta hai. karm ke siddhant ke anusar kanya bari ho jay to bhi vivah ki vishesh chinta nahin karni chahiye kyonki vah kanya apna prarabdh lekar ayi hai aur uskon anukul ya pratikul paristhiti uske prarabdh ke anusar milegi.
mata-pita ko to uske vivah ke vishay men yah vichar karna hai ki jahan kanya sukhi rahe, vahin uska vivah sanpann karna hai. aisa vichar karna mata-pita ka kartavya hai. parantu ham uskon sukhi kar denge, usko achcha parivar mil hi jayega, yah hamare vash ki bat nahin hai. hamen apne kartavya ka palan karna hai, par chinta nahin honi chahiye. nimnalikhit jyotish yog vale vyakti ka vaivahik jivan uski patni ke pativrat dharm ka palan karne ke karan sukhi rahta hai. aise yog vale vyakti birle hi hote hain. yadi kisi larke ki janma-patrika men aisa yog ho aur janmapatrika larke-larki ki uttam milti ho to vivah sanpann karna shubh rahta hai. uprokt yog ki paribhasha niche di gai hai.
1. saptamesh chaturth bhav athva dasven bhav men gaya ho to stri pativrata hogi.
2. saptamesh ravi ho aur vah shubh grah se drisht ho to stri pativrata hogi.
3. saptam bhav ka svami shukra ho aur vah shubh grah se drisht ho to pativrata stri vala hoga.
4. saptam bhav men guru gaya ho to dharmashila aur pativrata stri vala hoga.
nimnalikhit yog men bhi sushil v dharmashila patni milne ki sanbhavna rahti hai.
1. saptamesh athva saptam ka karak grah (shukra) shubh grah se yut ya drisht ho, ya shubh grahon ke madhya gaya ho to achchi patni milegi.
2. saptam bhav men shubh grah ki rashi ho to achchi patni milegi.
3. saptam bhav ko guru dekhta ho to sushil patni milegi.
aise grah yog adi kisi kanya ki patrika men ho to use sadmarg par chalne vala aur ek patnivratdhari pati milne ki sanbhavna rahegi. nimnalikhit grah-yog hon aur ukt yog vale grah ki mahadsha ya antardasha nikat bhavishya men ane vali ho to ukt samay vivah-vichched (talak) ki sanbhavna rahti hai. aise grah yog vale niyamah is prakar hain: saptamesh, ashtam men ya ashtamesh saptam men ho aur ukt saptamesh ya ashtamesh markesh ki shreni men ata ho ya saptamesh krur grahon ke madhya pancham ya anya sthan men ho to aise grah- yog ke kuch udaharan vastavik prakrnon dvara niche diye ja rahe hain.
udaharan kundli nan. 1. yah kundli ek kanya jatak ki hai. jiska janm dinank 23-12-1971 janm lagn kanya evan rashi kunbh hai. is kanya ki patrika men ashtamesh mangal saptam (vivah sthan) men baitha hai mangal ke karan vivah vichched hua 1995 men vivah hua vivah ke ek mah bad se pati-patni vivah vichched ki kanuni larai larte hue larki ne talak le li hai aur dusra vivah kar liya hai.
udaharan kundli nan. 2. is mahila ka janm dinank 16.08. 1953 hai. inka janm lagn kanya evan rashi tula hai. rashi se saptamesh mangal ekadash sthan men ketu evan surya, budh ke sath hone se san 1992 aubumsukemen vivah vichched hua. parantu pati apni patni ka abhi bhi bharn-poshan thik se kar rahe hain. inke pati ka kark lagn evan mithun rashi hai. rashi se saptamesh guru ashtam sthan men panchmesh ke sath hai. pati ne dusra vivah kar liya hai.
inke atirikt aur bhi kai prakrnon ka vishleshan ukt niyam ki pushti karta hai. aise prakrnon men sanbandhit grah ke mantra, jap v ukt grah ke dan niyampurvak karne se vivah-vichched rukne ki sanbhavna prabal rahti hai. kai aise grah yog vale vyaktiyon ke dvara vivah purva hi pirit evan piradayak grah ke mantra jap karane evan grah sanbandhi samagri dan karne se is prakar ki kathinaiyon se bach sakte hain. pirit grah evan pira dayak grah ka rashi ratn kabhi dharan nahin karen. anyatha labh ke sthan par nuksan ki adhik sanbhavna rahti hai. jyotish granthon men ullekh aya hai ki nimnalikhit grah yog vale vyakti apni patni-pati ke prati purn samarpit nahin rahte hain. vivah purva is vishay men khojbin kar leven to uttam rahta hai.
parantu aise yog ki patrika men ukt yog vale grah par guru ki drishti ho to ukt yog ka bura yog kshin ho jayega. iska sukshm parikshan karna avashyak hai. nimnalikhit yog stri-purush donon ki patrika men saman rup se lagu hote hain.
1. shukra aur mangal saptam ya dasham men hona bhi isi shreni men ata hai. yani manushya vyabhichari hoga.
2. isi prakar ka yog shukra aur mangal ka dasham aur chaturth ke svami hone se hota hai.
3. chandrama se dasham men shukra aur shukra se dasham bhav men shani bhi yah yog banata hai.
4. shukra ki rashi men gaye hue budh, shukra aur shani saptam ya dasham sthan men hone se yah yog banta hai.
5. saptamesh, dhanesh aur dashmesh ye tinon grah dasham men gaye ho.
ek aur niyam grihasth jivan men kalah ke bij bo sakta hai - vah hai panchmesh saptam men aur saptamesh pancham sthan men ho ya panchmesh aur saptamesh ki yuti kisi sthan men janmapatri men ho. pancham sthan prem sanbandh, pranay sanbandh ka hai atah iska svami saptamesh (vivah sthan ke svami) se sthan parivartan karta hai to prem vivah ki prabal sanbhavna rahti hai. atah vivah purva is niyam ki avhelna karke vivah sanpann nahin karana chahie. mata-pita yogya jyotishi se kanya var ki janm patrika parikshan kara kar hi nirnay len.
udaharan kundli nan. 3. prasiddh film star manniya shri rajesh khanna ka janm dinank 29-12-42 hai aur uska mithun lagn evan sinh rashi hai. lagn se panchmesh, shukra saptam men budh aur surya ke sath hone se prem vivah to hua parantu safal nahin hua. saptam men budh, surya talak karane men jimmedar hai kisi bhi patrika men saptam men surya-budh ho to janmapatri milan men vishesh dhyan rakhna avashyak hai.
udaharan kundli nan. 4. sunil gavaskar prasiddh kriket khilari ki janm dinank 10.07. 49 hai. makar lagn evan dhanu rashi he panchmesh shukra saptam men hai. is karan prem vivah sanpann hua. apne bachchon ko grihasth jivan men pravesh hone ke purva unki janmapatrika ka parikshan yogya jyotishi se avashya kara len. dharmik aur samajik drishti se vivah manav jivan ka ek mahatvapurn anushthan hai - aur var kanya ke parinay sutra men bandhne se chahumukhi pragti v sthirta ki prapti hoti hai. atah gahan vichar ke pashchat hi var kanya ko parinay sutra men bandhane. grihasth jivan moksha-prapti ki sirhi hai. isse samast indriyon ki ichcha purti ke sath hi ishvar prapti men sarlta rahti hai.