bha ratiya jivan men shraddha aur vishvas ka chirkal se nivas hai. dharmik bhavna se ot-prot bhartiya janta men janmajat sanskar ke rup men viksit kritagyata ka bhav durva se lekar vat-vriksh tak, chote jal kund se lekar vishal jal pravah sanpann mahandi tak, palne men jhulte hue balak se ativriddh tak, laghutam devasthan se lekar mahan devmandir tak aur mitti athva pashan ke kankad se lekar mahan parvat tak ko dev-svarup mante hue apne jivan ke sabhi karyaklapon men avirat sahayak, palak evan poshak manakar unka samadar karta hai.
apne duahkh aur sukh men unka smaran, nam jap, vrat, dan adi bhi shakti ke anusar karta hi rahta hai. isi ko ‘karmakand’ ki sangya di gayi hai. prithvi ka putra manav n keval parthiv vastuon ka hi adar karta raha hai, apitu akashiya parisar men virajman nakshatron aur grahon ke prati bhi uski kritagyata utni hi balvti rahi hai. prachin maharshiyon ne vedon ke mantron se inka gyan prapt karke vyaktigat evan samuhik sukh-samriddhi ke upay prakat kiye. anant devtaon ki paridhi men jyotichakra ke pradhandev surya ka mahatva sarvopri mana gaya hai. puranon ke anusar surya se hi vishva men prakash hota hai aur prakash se hi vishva men halachal hoti hai.
surya ki kirnon se sansar ka vyapar aur manv-deh men urja ka sanchar mana gaya hai. surya ke parivar men vyapt anyanya anek prakashkari grahon ki mahatta ko parakh kar purvacharyon ne chandra, mangal, budh, guru, shukra, shani aur rahu-ketu ko navagrah mandal men sammilit kiya. sath hi adhidevta pratyadhidevta ke rup men aur bhi katipay upagrahon ki pratishtha bhi barhayi. kintu gaun pramukh nyay se nau grahon ki pramukhta ki pushti ved, agam, puran, dharmashastra adi manya granthon men ki aur in nau grahon ki mahima faldatritva tatha vighnakaritva adi shaktiyon ke akhyanon se astik janon men apar bhakti, shraddha aur vishvas ko susthir bana diya.
prasannata se sarvatra prasannata ati hai aur rushtata se vighnon ka agaman hota hai. yah chinratan satya hai. atah uparyukt shastron ke adhar par hi jyotish shastra men in grahon ki, gati aur sthiti ka akalan hua. bhut, vartaman tatha bhavishya ke falon ki vyavastha vyakt hui . jyotish shastra ne ganit ke siddhanton se yah bhi nishchit kiya ki kis rashi par kis grah ka kaisa prabhav hota hai. janm patrika men nirdisht kundli ke rup men rashiyon ke sath grahon ki tatkalik sthiti se hone vale isht aur anisht ka nidarshan bhi jyotish shastron se hi paribhashit hua tatha yah ghoshit hua- ‘graha rajya prayachchanti graha rajyan haranti cha’. isi ko grah yog kaha gaya. ‘jab koi aprasann hota hai to use prasann karna avashyak hota hai
’- yah lok riti hai. is drishti se navagrahon men se jiski gati gochar drishti se thik nahin chal rahi ho athva kisi ashubh grah se uska sanbandh ho ya uski shubh drishti n ho to use prasann karne ke lie uski mantra jap dvara aradhna puja, dan adi karna shastrakaron ne batlaya hai. in sabki pramanik jankari vistrit rup se hamne apne granth ‘grah shanti dipika’ men di hai. pathkon ke labharth uska kuch svarup yahan prastut hai. skand puran men kaha gaya hai ki grahon ki janmabhumi, gotra, agni, varn, sthan, akar tatha dishamukh ka gyan kiye bina shanti karne se grahon ka apman hota hai.
atah inka gyan karke hi shanti karen. yagyavalkya smritikar ka kathan hai ki in grahon ko prasann karne ke lie inki pratimaen kramshah tamra, sfatik, rakt chandan, svarn, chandi, loha, sisa aur kanse ki banakar athva yantrakriti banvakar pratishthit karke dharan karen. in grahon ke adhidevta evan pratyadhidevtaon ki bhi puja ke vidhan hain. puja men vishesh rup se gandh, pushp, dip aur naivedya bhi bhinna-bhinn prakar ke hote hain. ye hain dakh, ganna, supari, narangi, ninbu, khajur, nariyal aur anar.
apne piradayak grah ki tushti ke lie in falon ko unhen arpan karke prasad dena aur svayan khane ka bhi vidhan hai. param kripalu acharyon ne manav ke kalyan ke lie bare-se bare aur chote se chote sadhnon ko spasht rup se bataya hai. grahon ki santushti ke lie tantra shastron men mantra, yantra, tantra, aushdhi evan dan ki prakriyaen vistar se batayi hain. uttam, madhyam aur samanya varg ki kshamata ka dhyan rakhte hue aise prayog bhi batlaye gaye hain ki jinke dvara grah-shanti sarlta se ki ja sakti hai.
vaidik mantra (charon vedon ke) bij mantra, nam mantra aur stuti rup mantron ke prayog prapt hote hain. sabhi grahon ke yantra bhi alg-alag hai. pandrah ank yog vala nau koshthak ka yantra ankon ke parivartanon se banakar unke lekhan, pujan aur dharan karne ki vyavastha bhi ki gai hai. grah dosh nivaran ke lie unki priya aushdhiyon se snan karne ka nirdesh ek saral upay hai. pratidin in aushdhiyon ka kadha banakar snan ke jal men milakar snan karne se labh hota hai. apni shakti ke anusar shraddha evan vishvas se shanti karm karne se avashya hi saflta prapt hoti hai.
atah shastrakaron ne anisht nivarak grahon ki tushti ke lie unke priya dhanyon ka dan, bhojan tatha rason ka dan aur bhojan bhi nishchit kiya hai. surya ki prasannata ke lie gehun aur gur ka dan athva bhojan karen. chandrama ki prasannata ke lie chaval aur ghrit ka dan athva bhojan karen. mangal ki prasannata ke lie masur aur gur ka dan athva bhojan karen. budh ki prasannata ke lie mung aur ghrit ka dan athva bhojan karen. guru ki prasannata ke lie chane ki dal tatha shakkar ka dan athva bhojan karen.
shukra ki prasannata ke lie chaval aur ghrit ka dan athva bhojan karen. shani ki prasannata ke lie urad aur tel ka dan athva bhojan karen. rahu ki prasannata ke lie til aur tel ka dan athva bhojan karen. ketu ki prasannata ke lie bhi til aur tel ka dan athva bhojan ka vidhan hai. isi prakar grahon ke rang bhi nirdharit hain. atah vastra dharan men surya lal mangal lal chandra shvet budh hara guru pila shani kala shukra shvet rahu nila ketuu krishn rang ke vastra dharan karna anukul rahta hai. vaise sabhi grahon ke dosh se mukti pane ke lie shivji par rudrabhishek athva mahimnastotra dvara abhishek karna/krana shreshth hai.
mangal aur shani ki shanti ke lie hanuman ji ko akre athva pipal ke patte par sindur se shriram nam likhakar 11 yantron ki kachche sut se mala banakar pahnaen tatha hanuman chalisa ke 11 path karen. pratidin niche likhe hue shlok mantra ka jap karne se bhi grah badha nahin hoti hai. brahma muraristripurantkari, bhanuah shashi bhumi suto budhashchay. gurushch shukra shani rahu ketvah, sarvegrahaah shantikra bhavantu .. sanbhav ho sake to sabhi ko snan karne ke turant pashchat nimn tin mantron se jalanjli niyamit rup se deni chahie. isse hamare sabhi dosh shant hote hain
tatha sukhi evan samriddh jivan ki disha milti hai. sthan devta tripyatam. kul devta tripyatam. pitrah tripyantam. kramank grah janmabhumi gautra agni varn sthan akar dishamukh
1 surya kaling kashyap kapil lal madhya gol purva
2 chandra yamuna atrey pingal shvet agnikon ardhachandra pashchim
3. mangal avanti bharadvaj dhumketu lal dakshin trikon dakshin
4. budh magadh atrey jathar pit ishan dhanush uttara
5. guru sindhudesh angira shirvi pit uttar kamal uttara
6. shukra bhojakar bhargav dvarak shvet purva chatushkon purva
7. shani saurashtra kashyap mahaneja krishn pashchim narakar pashchim
8. rahu rathinapur paithinas hutashan dhumra dakshin makar dakshin
9. ketu atarvedi jaimini hutashan dhumra dakshin makar dakshin