is bhautik jagat men ho ya adhyatmik jagat men, madhurya shabd ke sunne matra se hi krishn ki premmyi lilaon ki anubhuti man ko anandit kar deti hai aur umra ki simaon se pare ham apne jivan ke sabse manohar v sanvednshil palon men kho se jate hain. bhagvan shrikrishn ne is bhautik jagat men ate hi prem ki aisi varsha ki ki jisse udbhut prem ke vibhinn rason ki anubhuti se ye dhara sinchit ho gayi chahe vo krishna-yashoda ka vatsalya ho athva gopon ka sakhya, uddhav ji ka dasya ho ya gopiyon ka prem-madhurya. sampurn jagat men shrikrishn ka prem-madhurya atulniya kahlaya. prem-madhurya ki lila ka varnan yahan uddhat kiya ja raha hai jo krishna-prem ki parakashtha ko darshata hai jise svayan krishn bhi sarvashreshth ghoshit karte hain. ye bat us samay ki hai jab krishn dvarika prasthan kar gaye aur rukmini v raniyon tatha dvarikavasiyon ki seva men rat ho gaye. ek din raniyon ke bich vartalap hone laga.
kisi rani ne kaha ‘‘ham kitni bhagyashalini hain ki hamare svami krishn ka sarvadhik adhikar hamen prapt hai. hamari is yogyata ke karan hamen krishn ki patni rup v adhikar prapt hua hai.’’ turant dusri rani itrakar kahti hai ‘‘hamara purn samarpan hi is krishnarupi vardan ka karan hai isilie to krishn keval hamare hain.’’ vahin upasthit maharani rukmini svayan bhi gaurvmyi muskan ke sath svayan ko dekhne lagin. shrikrishn ne in raniyon ke hriday ke udgaron ko janakar in raniyon ki pariksha lene ki yojna banayi. bhagvan shrikrishn ka is pariksha ka prayojan matra itna tha ki liladhar kisi bhi avaran v alingan se asakt nahin hain, unke lie pratyek jiv ek-saman hai. in raniyon ka ye saubhagya tha ki unhonne jo tap purva janm men kie the tatha bhagvan ko pati rup men pane ki kamna ki thi vo is janm men shrikrishn dvara svikrit ho gayi thi jiske karan inhen shrikrishn ki ardhangini banne ka saubhagya prapt hua.
sath hi bhagvan ka aishvaryabhog bhi prapt hua parantu aishvarya ki adhikta ahankar ka marg bhi prashast kar deti hai. shribhgvan ne unko isi ahankar se mukt karne hetu svayan ke asvasth hone ki lila ka srijan kiya. sthiti kuch aisi hui ki shrikrishn ke sir men asadhya pira hone lagi jiske nivaran hetu dvarika ke rajya vaidya bulaye gaye parantu pira ka karan janne men asamarth rahe. tatpashchat anek rishiyon v desh-deshantar ke anek vaidyon ko bulaya gaya tatha anek upchar v anushthan kie gaye parantu samast prayas nishfal gaye. antatogatva ek siddh vaidya ne akar parikshan ke pashchat ek vichitra chikitsa batai. usne kaha ki yadi koi stri apne charnon ki raj prabhu ke mathe par laga de to vah kshana-matra men svasth ho jayenge. is vichitra chikitsa ki suchna samast dvarika men fail gayi. sabhi ashcharyachkit the. parantu koi bhi stri aisa karne ka sahas nahin juta saki. samast raniyan vichlit ho uthin ki yah kaise sambhav hai.
raniyon ne dasiyon se kaha parantu koi dasi aisa pap kritya karne ko taiyar n huyi. isi bich devarshi narad shribhgvan ka mantavya janakar dvarika men padhare. unhonne patrani rukmini se anurodh kiya, ‘‘mata! ap prabhu ke svasthya-labh hetu apni charn-raj pradan kar den.’’ kintu rukmini ne kaha ‘‘aisa karna to dur main to aisa soch bhi nahin sakti. main apne svami ke lie ghor tapasya kar sakti hun, apne pran bhi de sakti hun parantu meri charn-raj! kadapi nahin.’’ isi prakar devarshi ne sabhi raniyon se anugrah kiya parantu koi bhi rani is chikitsa ke lie taiyar nahin hui. narad ji atyant nirash hokar vyakul avastha men baith gaye tab shrikrishn ne unse kaha ‘‘ap vyakul n hon devarshi! ap vrindavan jaiye vahan apko nirasha nahin milegi. shribhgvan ke vachan sunakar tatha unki bal-lilaon ko yad kar narad ji ne vrindavan ki or prasthan kiya. vrindavan pahunchakar narad ji ne gopiyon ko dvarika men krishn ki asvasthata v us vishisht chikitsa ki suchna di.
uske pratyuttar men jo drishya v shabd narad ji ko dekhne v sunne ko mile ki ve apni ashrudhara ko rok n paye kyonki vah koi sadharan drishya nahin tha apitu krishn ke prati gopiyon ka apar v niahsvarth prem tha. pratyek gopi jahan khari thi v jaise baithi thi usi avastha men apne charnon ki raj ko patra men bharakar narad ji ko dene lagin tatha svayan ke sath shrikrishn dvara ghatit prem-lilaon ka ro-ro kar varnan karne lagin. kuch to yahan tak kaha ‘‘charan bhi lene hon to lai lo! par more kanha ko dard turat mitno chahiyo.’’ aisa manohar drishya dekhakar devarshi bhav-vibhor ho gaye aur turant hi dvarika ko prasthan kar gaye. jaise hi narad ji ka dvarika agaman hua aur vaidya ji ne gopi charan raj shrikrishn ke mastak par lagai, shribhgvan turant hi svasth ho gaye. devarshi narad ne vahan vrindavan ka samast vrittant sunaya. vahan upasthit shriekrishn ki raniyon ko, gopiyon ka shrikrishn ke prati prem-madhurya ka bodh hua aur svayan ke mithya abhiman par lajjit bhi huyin. prem ki vastavik paribhasha shrikrishna-gopi prem se hi prakat hoti hai jahan niahsvarthata ki parakashtha tatha priyatam ko anand v sukh pradan karne ki bhavna pradhan hoti hai chahe uske lie kitne hi kashton v duahkhon ka varan karna pare, sabhi svikarya hota hai. vastav men yah prem men tapasya ka svarup le leti hai.