shariran yadvapnoti yachchapyutkramtishrarah grihitvaitani sanyati vayurgandhanivashyat kurukshetra men yuddh ke dauran jab-kaurav v pandav amne-samne khare the to apne dada, guru, bhai-bandhu, sage-sanbandhiyon ko dekhakar arjun ko moh ho gaya aur usne yuddh karne ka irada chorne ki ichcha ki tab krishn bhagvan ne arjun ko samjhte hue kaha he ! arjun yah sharir nashvar hai magar atma amar hai, yah kabhi nahin marti. jaise vayu gandh ke sthan se gandh ko grahan karke le jata hai vaise hi dehadi ka svami jivatma bhi jis sharir ka tyag karta hai usse in man sahit indriyon ko grahan karke le jata hai vaise hi dehadi ka svami jivatma bhi jis sharir ka tyag karta hai usse in man sahit indriyon ko grahan karke fir jis sharir ko prapt hota hai usmen le jata hai.
jis prakar vayu itra ke fohe se gandh le jati hai kintu vah gandh sthayi rup se vayu men nahin rahti, kyonki vayu aur gandh ka sanbandh nitya nahin hai. isi prakar indriyan man, buddhi, svabhav adi ko apna manne ke karan unko sath lekar dusri yoni men chala jata hai. jaise vayu tatvatah gandh se nirlipt hai aise hi jivatma bhi tatvatah man, indriyan, shariradi se nirlipt hai, parantu in man indriyan, shariradi men mere pan (mera hai) ki manyata hone ke karan jivatma inka akarshan karta hai. jaise vayu akash ka karya hote hue bhi prithvi ke ansh ko (gandh ko) sath liye ghumti hai, aise hi jivatma parmatma ka sanatan ansh hote hue bhi prakriti ke karya shariron ko sath liye bhinna-bhinn yoniyon men ghumta hai. jar hone ke karan vayu men vah vivek nahin hai ki vah gandh ko grahan n karen, parantu jivatma ko to vah vivek aur samathrya mila hua hai ki vah jab chahe tab sharir se sanbandh mita sakta hai. bhagvan ne manushya matra ko yah svatantrata de rakhi hai ki vah chahe jisse sanbandh jor sakta hai aur chahe jisse sanbandh tor sakta hai.
apni bhul mitane ke liye keval apni manyata badlne ki avashyakta hai ki prakriti ke ansh in sthul, sukshm aur karan shariron se mera (jivatma ka) koi sanbandh nahin hai, fir janm maran ke bandhan se sahaj hi mukti hai. bhagvan ne yahan tin shabd drishtant ke rup men diye hain-
1. vayu
2. gandh
3. ashay ‘ashy’ kahte hain sthan ko jaise jalashay (jal$ashy) arthat jal ka sthan. yahan ashay nam sthul sharir ka hai.
jis prakar gandh ke sthan (ashy) ke fohe se vayu gandh le jati hai aur foha piche para rahta hai isi prakar vayurup jivatma gandhrup sukshm aur karan shariron ko sath lekar jata hai tab gandh ka ashay rup sthul sharir piche rah jata hai. bhagvan kahte hain is jivatma se tin khas bhulen ho rahi hain.
1. apne ko man buddhi shariradi jar padarthon ka svami manta hai par vastav men ban jata hai unka das.
2. apne ko un jar padarthon ka svami man lene ke karan apne vastavik svami parmatma ko bhul jata hai.
3. jar padarthon men mane hue sanbandh ka tyag karne men svadhin hone par bhi unka tyag nahin karta.
yahan par jiv ko ishvar arthat apne sharir ka niyamak kaha gaya hai. yadi vah chahe to apne sharir ko tyag kar uchchatar yoni men ja sakta hai aur chahe to nimn yoni men ja sakta hai. sharir men jo parivartan hota hai vah usi par nirbhar karta hai. mrityu ke samay vah jaisi chetna banaye rakhta hai vahi use dusre sharir tak le jati hai. yadi vah kutte ya billi jaisi chetna banata hai to use kutte ya billi ka sharir prapt hota hai. yadi vah apni chetna devi gunon men sthit karta hai to use devta ka svarup prapt hota hai. yah dava mithya hai ki is sharir ke nash hone par sab kuch samapt ho jata hai. atma ek sharir se dusre sharir men dehantaran karta hai aur vartaman sharir tatha vartaman karyaklap hi agle sharir ka adhar bante hain. karm ke anusar bhinn sharir prapt hota hai aur samay ane par sharir tyagna hota hai.
atah is sansar men jiv apni dehatm buddhi ko ek sharir se dusre sharir men usi tarah le jata hai jaise vayu sugandh ko le jata hai. is prakar vah ek sharir dharan karta hai aur fir ise tyag kar dusra sharir dharan karta hai.