sansar vriksh ki mukhya shakha brahma hain. brahma se hi sanpurn dev, manushya, tiryak adi yoniyon ki utpatti v vistar hua hai. is sansar ka kahan se aranbh hai kahan madhya hai aur ant ka kuch pata nahin hai. sansar se sanbandh vichched karne ka sugam upay hai sansar se prapt man, buddhi, indriyan, sharir, dhan-sanpatti adi sanpurn samagri ko apni aur apne liye n mante huye usko sansar ki hi seva men laga dena. bhagvan adi, madhya v ant tinon men hi hain arthat sansar kuch hai hi nahin. bhagvan ne manushya ko sansar se sanbandh vichched karne ki salah di hai. arjun pura updesh sunne ke bad kahte hain--- sansar ki smriti v parmatma ki smriti men bahut antar hai. sansar ki smriti ke bad vismriti ka hona sanbhav hai lekin parmatma ki smriti ek bar hone par kabhi vismriti nahin hoti. iska karan yah hai ki sansar ke sath kabhi sanbandh hota nahin aur parmatma se sanbandh kabhi chutta nahin. bhagvan kahte hain avinashi pad mera hi dham hai jo mere se abhinn hai aur jiv bhi mera ansh hone ke karan mere se abhinn hai. atah jiv ki bhi us dham se abhinnata hai arthat vah is dham ko nitya prapt hai. us dham ko prapt hue jivan punah laut kar sansar men nahin ate.
bhagvan is dham ka varnan karte hue kahte hain: shlok: n tad mosyte suryo n shashandken pavkah yad gatva n nirvatantetaddham parman mamah . is shlok ka arth hai n vah surya dvara prakashit hai aur n chandrama, agni v bijli ke dvara jahan jakar koi vapis nahin ata vah mera dham hai. yah shlok ka shabdik arth hai. jaisa ki ap sab jante hain sanpurn gita men shri krishn bhagvan ke updesh hain jo unhonne arjun ko diye hain. vastutah vah updesh samast jan kalyan ke liye hai. kurukshetra men mahabharat men varnit kaurvon aur pandvon ke mahayuddh men yuddh ke maidan men jab arjun ko apne vipakshi sena men apne sabhi bare pitamah, chacha, tau, mama, guru v bhai-bhatije dikhai diye to usko sansarik moh ho gaya aur vah yuddh se vimukh hone laga aur usne yuddh n karne ka nishchay kiya. tab bhagvan shri krishn arjun ko samjhate hain ki yah sansar mithya hai. iska moh mat kar, yah sansar nashvar hai arthat nasht ho jane vala hai. mata, pita, pitamah, dada, chacha, tau, mama sabhi rishte, nate jhuthe hain, asatya hain. mrityu uprant ye koi bhi sath nahin dete. is sansar men jo jiv achche karm karta hai, satya ka palan karta hai, maryada mane rahta hai, kartavya parayan hota hai anttah mrityu ke pashchat mere param dham men pahunchta hai.
ab bhagvan apne us param dham ka varnan karte hue batate hain ki he arjun dhyan se suno mera vah param dham kaisa hai. bhagvan shri krishn kahte hain mera dham vah hai jisko surya, chandrama, agni v bijli prakashit nahin kar sakte. ye prakash ke ve srot hain jinse sansarik vastuen tabhi tak dikhai deti hanai jab tak vah apavyay vastu nahin dikhai deti hai. vah vastu svayan adrishya rah kar sare vishva ko prakashit karti hai. jaise - jyon-jyon rassi ke bhav ka gyan mand hota jata hai tyon-tyon uske sanbandh men hone vala sanp ka bhram drirh hota jata hai. thik isi prakar jis vastu ka prakash parne ke karan hi chandrama aur surya adi prachand tej se prakashit hote hain vah vastu keval tej ki rashi hai, vah samast praniyon men vyapt hai aur surya aur chandrama ko bhi prakash deti hai. surya aur chandrama apna jo prakash failate hain vah prakash isi brahm vastu ka hi ek ansh hai. suryoday hone par jis prakar chandrama ke sath-sath sab nakshatron ka lop ho jata hai usi prakar is brahm vastu ke prakash ke udit hote hi us prakash men surya aur chandrama ke sath-sath sare jagat ka lop ho jata hai. jis prakar jagrit hone par svapn ki sari dhum-dham ka ant ho jata hai usi prakar jis vastu ka prakash hote hi aur kisi vastu ke abhas ke liye koi sthan nahin rah jata vahi vastu mera mukhya sthan hai.
jiv parmatma ka ek ansh hai. atah iska ek matra sanbandh apne ansh parmatma se hai parantu mul se vah apna sanbandh prakriti ke karya, sharir, man, buddhi adi indriyon se man leta hai, jinse uska sanbandh kabhi tha hi nahin, n hi hoga aur n hi ho sakta hai. jiv ka sanbandh keval mere param dham se hai vah mera parmdham n to surya ya chandra ke dvara prakashit hota hai aur n agni ya bijli se. jo log vahan pahunch jate hain, ve is bhautik jagat men fir laut kar nahin ate. parmatma se apne vastavik sanbandh ko bhulakar shariradi vijatiya padarthon ko main, mera aur mere liye manna hi vyabhichar dosh hai. yah vyabhichar dosh hi ananya bhakti yog men khas badhak hai. bhagvan kahte hain avinashi pad mera hi dham hai jo mere se abhinn hai arthat mere se alag nahin hai aur jiv bhi mera hi ansh hone ke karan mere se abhinn hai atah jiv ki bhi us dham se abhinnata hai arthat vah us dham ko nitya prapt hai. us dham ko prapt hue jiv punah lautakar nahin ate. bhagvan is dham ka varnan karte hue kahte hain vah mera param dham n to surya ya chandra dvara prakashit hota hai aur n hi agni v bijli se, jo log vahan pahunch jate hain ve is bhautik jagat men fir se laut kar nahin ate.
yahan par adhyatmik jagat arthat bhagvan krishn ke dham ka varnan hua hai jise krishn lok ya go lok vrindavan kaha jata hai. chenmay akash men n to surya ke prakash ki avashyakta hai n chandra prakash athva agni ya bijli ki, kyonki sare lok svayan prakashit hain. is brahmand men keval ek lok surya aisa hai jo svayan prakashit hai lekin adhyatmik akash men sabhi lok svayan prakashit hain. un samast lokon (jinhen vaikunth kaha jata hai) ke chamchmate tej se chamkila akash banta hai. vastutah vah tej krishn lok, golok vrindavan lok se niklta hai. iska ek ansh mahant tatva arthat bhautik jagat se achchadit rahta hai. iske atirikt jyotirmay akash ka adhikansh bhag jo adhyatmik lokon se purn hai, jinhen vaikanuth kaha jata hai aur jinmen se golok vrindavan pramukh hai. jab tak jiv is andhkaramay jagat men rahta hai tab tak vah baddh avastha men rahta hai (baddh arthat maya se bandha hua) lekin jyonhi vah is bhautik jagat rupi mithya maya rupi vikrit vriksh ko kat kar adhyatmik akash men pahunchta hai, tyonhi vah mukt ho jata hai tatha vah yahan vapis nahin ata. is baddh jivan men jiv apne ko is bhautik jagat ka svami manta hai lekin apni mukt avastha men vah adhyatmik rajya men pravesh karta hai aur parmeshvar ka parshad ban jata hai.
vahan par vah sachchidanandamay jivan bitata hai. yah janakar manushya ko prasannata ka anubhav karna chahiye use us shashvat jagat men le jaye jane ki ichcha karni chahiye aur sachchai ke is mithya pratibinb se apne apko alag kar lena chahie yani yah sansar jo mithya hai lekin isko vah sach samjhta hai, isse apne ap ko virakt kar lena chahiye. jo jiv is sansar se asakt hain (jure hue hain), unke liye is asakti ka chedan karna dushkar hota hai. ve sansarik moh men atyadhik lipt hote hain lekin agar vah krishn bhavnamrit yani ki krishn bhagvan ke nam ka amrit grahan kar len, unki sansarik asakti se chut jane ki sanbhavna hai. vah krishn bhavnamrit jitne man se, jitni gahrai se grahan karega uski sansarik asakti, moh se chutne ki sanbhavna utni hi adhik barh jayegi. use aise bhakton ki sangti karni chahiye jo krishn bhavna bhakti karte hain. use aisa samaj khojna chahiye jo krishn bhavnamrit ke prati samarpit ho aur use bhakti karna sikhna chahiye. is prakar vah sansar ke prati apni asakti vichched (arthat sansar se virakti) kar sakta hai. yadi koi chahe ki kesriya vastra pahnne se bhautik jagat ke akarshan se vichched ho jayega to aisa sanbhav nahin hai.
bhautik jagat se virakti vastron se nahin vasnaen chorne se hogi. use bhagavat bhakti ke prati asakt hona parega. ataev manushya ko chahiye ki ganbhirta purvak samjhen ki keval bhakti hi shuddh rup se dikhti hai. agar kisi ko lagta hai ki mujhe bhakti karni nahin ati, atah mujhe to bhagvan apni sharan men lenge nahin lekin aisa sochna galat hai, use chahiye vah shuddh bhav se, sachche man se ishvar se prarthana karen, man men bhagvan ka smaran karen, apni sansarik vasnaon ko tyagen v prabhu charnon men man lagayen aur sachche man se prabhu se kshama yachna karen. is prakar- he bhagvan ! main din, hin agyani hun. mantra hinan, kriya hinan bhakti hinan janardan. yatkrit tu bhaya dev paripurn tadustu men anyatha sharnan nasti tvamev sharnan mamah tasmat karunya bhaven raksh man parmeshvarah .. is shlok ka arth hai ki jo manushya din ban kar prabhu se is prakar se prarthana karta hai ki bhagvan mujhe mantron ka gyan nahin hai, main vidhivat puja karna nahin janta, mujhe nahin pata ki vidhi vidhan se kaise puja ki jati hai, main apki sharan men aya hun, ap mujhe apni sharan men le lijiye aur meri raksha kijiye. is prakar se sachche man se ki gai prarthana bhagvan avashya sunte hain to apne bhakt ko apni sharan men le lete hain apne param dham men le lete hain.
yahan par parman mam shabd bahut mahatvapurn hai. parantu divya jagat param hai aur chah aishvarya se purn hai. divya jagat men surya prakash, chandra prakash ya narayan ki koi avashyakta nahin hai kyonki samast akash bhagvan ki antrik shakti se prakashman hai. us param dham tak keval sharnagti se hi pahuncha ja sakta hai anya kisi sadhan se nahin. yahan dham ka tatparya kisi sthan se nahin hai balki svarup se hai (ishvar ka svarup). sadhak dhyanabhyas ke dvara man aur buddhi ke vikshepon se pare parmatma ke dham men pahunch kar satya se sakshatkar ka samay nishchit kar anant svarup brahm se bhent kar sakta hai. ham sab upyogitavadi hain atah ham pahle hi yah janna chahte hain ki kya satya ka anubhav itne adhik parishram ke yogya hai arthat itna kathor parishram karne ke bad hamen jis satya ka anubhav hoga arthat (param dham ka anubhv) uske bad punah is duahkhpurn sansar men lautne ki sanbhavna ya ashanka bilkul nahin hai? bhagvan shri krishn hamen ashvasan dete hain ki mera param dham vah hai jahan pahunchne par sadhak punah lautta nahin hai. atah bhagvan shri krishn kahte hain ki jis param pad ko prapt hokar manushya laut kar sansar men nahin ate vah param pad svayan prakashman hai usmen kisi prakar ke andhkar ki kalpana bhi nahin ki ja sakti.
yahan bhautik prakash se tatparya nahin hai varan chetna ke atyant prakashman ho jane ka hi varnan hai isliye bhagvan kahte hain ki is param pad ko surya, chandrama athva agni, bijli bhi prakashit karne men asamarth hain kyonki vastav men inka prakash bhi us param pad ke prakash ka hi ek chota sa pratibinb hai. us paramapad ko prapt karne ke bad fir vahan se lautna sanbhav nahin hota arthat fir sansar men punarjanm nahin hota, vahan pahunchakar manushya param anand ko prapt kar leta hai. 15ven adhyay ke shlok nan. 4 men bataya gaya hai ki is sansar rupi vriksh ke bandhan se chutne ke liye parmatma ki hi sharan grahan karne se jiv sansar ke bandhan se mukt ho jata hai. kisi vastu ke dekhne ka arth use janna hai aur kisi vastu ko dekhne samjhne ke liye vastu ka netron ke samaksh hona tatha uska prakashit hona bhi avashyak hai. prakash ke madhyam se hi netra rup aur rang ko dekh sakte hain. isi prakar ham anya indriyon dvara shabd, sparsh, ras aur gandh ka jihna, nasika, kan, hath tatha man aur buddhi ke dvara kramshah bhavnaon aur vicharon ko bhi jante hain. lekin jis prakash se hamen in sabka bhav hota hai vah ‘‘chaitanya prakash’’ hai, jo bhagvan shri krishn ke param dham men hai.