‘‘buddhan sharnan gachchami, dhamman sharnan gachchami, sangh sharnan gachchami, uparyukt diksha mantra grahan karke koi bhi bina kisi bhed bhav ke buddh ki sharan prapt kar sakta tha. kintu bhikshu sangh men pravesh hetu keval yah diksha mantra hi paryapt nahin tha. age ki sadhna bhi anivarya thi. buddh kahte the-----‘‘sangh ek sagar hai aur bhikshu nadiyan hain. sagar men mil jane par apne atit se chipte rahna asanbhav hai.’’ 563 i.pu. men gautam buddh ka janm vaishakh purnima ko shakya vansh ke shahi hindu parivar men kapil vastu men hua tha. man mahamaya ko svapn men sandesh mila ki unke garbh men divya chetna ane vali hai. jyotishiyon ne kaha apke yahan ek balak ka janm hoga. yadi vah ghar par raha to chakravarti samrat banega aur yadi ghar se chala gaya to sannyasi banakar sansar se andhkar ka nash karega.’’ pita shuddhodan ne putra siddharth ko grihasth banane ke lie atishay bhog-vilas ki vyavastha ki. shuddhodan ne siddharth ko kisi bhi bhanti ghar par rokne ko apna pratham dharm bana liya tha.
kintu is vilasi vyavastha se upji ub ne siddharth ko bhog se hatakar jivan ke gahre prashnon ki or mor diya kyonki sthiti ko kuch aur hi manjur tha. gautam buddh ki janm kundli ke vishleshnatmak adhyayan se ham prayas karte hain yah janne ka ki kaisa grah-gochriya sanyojan tha jisne rajkul men utpann balak ko nirvan prapti ke marg par agrasar kar diya. gautam buddh ki kundli mithun lagn ki hai. lagnesh buddh dvadash bhav men saptamesh karmesh brihaspati, tritiyesh surya tatha ashtamesh v navmesh shani se yut hokar sthit hai. budh lagnesh hone ke sath hi sukhesh bhi hai. budh surya ke nakshatra aur shani ke upanakshatra men sthit hai. budh par shashth bhav men sthit dhanesh chandrama jo ki paksh bali hokar apni nichasth rashi vrishchik men baithe hain aur vrishchik ke svami mangal se purn drishti prapt kar rahe hain jiske karan uchch koti ka nichbhang rajyog banate hue apni purn drishti dal rahe hain.
gurasusath hi chandrama ke uchchanath arthat shukra kyonki chandrama vrish rashi men uchch ke hote hain aur nichnath arthat mangal donon hi paraspar ek dusre se kendra men hain aur mangal shukra ko chaturth drishti se dekh bhi rahe hain. mangal labhesh hai aur shukra dhan bhav men sthit hokar mangal se drisht hai aur dhanesh chandrama bhi labhesh mangal se drisht hai. dvitiya bhav kutanb ka bhav bhi hota hai aur dhan ka bhav bhi hota hai. yadyeko nichagatast drashyadhipastaduchchapah kendre. yasya s tu chakravarti samast bhupal vandhandhiah.. faldipika adhyay-7 shlok -27 yadi koi grah nichasth ho to us nich rashi ka svami aur nichasth grah ka uchchanath paraspar kendra men hone se nich bhang raj yog banta hai. gautam budh ki kundli men banne vale is yog ke prabhavavash hi ve uttam rajkul men utpann hue. shukra bhog pradata grah hai. shadbal men sarvadhik bali hai. ashtamesh shani ke nakshatra men aur ketu ke upanakshatra men sthit hai.
yah sarvavidit hai ki gautam buddh ke pita ne unhen itni adhik vilasi sukh-suvidhaen pradan ki hui thin ki unka putra kahin sannyasi n ban jae. kintu unki kundli men grahiya sthitiyan itni vilakshan hain ki jahan unhonne bhog vilas ka sukh uthaya vahin bhog vilas se upji ub se mukti ka marg bhi dikhaya. gautam budh ki kundli men budh, brihaspati, surya v shani char grahon ki yuti dvadash bhav men hai. ye charane grah kundli ke dvadash bhavon men se sat bhavon ka svamitva rakhte hain. kramshah budh lagnesh v chaturthesh (sukhesh) hain, brihaspati saptamesh v karmesh hain, surya parakramesh hain, shani ashtamesh v bhagyesh hain. charon grahon par uchch koti ka nichbhang rajyog banane vale chandrama jo ki purnamasi ka hone ke karan apni ujjval kanti se yukt hain, ki purn drishti hai. uparyukt vishleshan men hamne dekha kis prakar lagn ke adhikansh bhavon ke svami rajyog se prabhavit hone ke karan sukh v vaibhav pradan kar rahe the.
ab ham charcha karenge ki itna vaibhav, bhog-vilas kaise kshan bhar men samapt ho gaya. lagnesh dvadash bhav men ashtamesh shani se yut hai, parakramesh surya dvadash bhav men ashtamesh shani se yut aur shashth bhav men sthit chandrama se drisht hai, brihaspati jo ki patni bhav v karm bhav ke svami hain dvadash bhav men ashtamesh shani se yut hain. ‘‘dirghayushman drirharmatrbhyah shrimanvidhasutadhan sahitah. siddharambho jirtarpurmlo vikhyatarupah pramarvat sarle.. (saral yog) faldipika chatha adhyay, 65-2 shlok yadi ashtamesh dvadash bhav men sthit ho to saral yog hota hai. aise yog men utpann jatak dirghayu, drirhmti, nirbhay, lakshmiras, vidya, putra aur dhan se yut, apne udyog men saflta prapt karne vala nirmal aur shatruon ko jitne vala vikhyat purush hota hai. yah sab kuch gautam buddh ke jivan men ghatit hua. ashtam bhav navam arthat bhagya ka vyay bhav hota hai.
mithun lagn ki kundli men shani ashtamesh hone ke sath-sath bhagyesh bhi hai. bhagyesh pitri karak bhi hote hain. bhagyesh ki lagnesh se yuti hai. bhagyesh aur lagnesh par dhanesh kutumbesh chandrama ki purn drishti hai. gautam buddh ke pita hi unki virakti ka karan bane. unke pita ne bharasak prayatn kiya ki unka putra raj-kaj ki or pravritt ho kintu ve nishfal hue kyonki navmesh shani ko ashtam bhav ke svami ka fal bhi pradan karna tha. lagnesh budh, ashtamesh v bhagyesh shani dvadash moksh bhav men brihaspati se yut hokar baithe hain. dvadash bhav men bane chaturgrahi yog jismen shani aur brihaspati ki sarvadhik mahatvapurn bhumika hai, ne gautam budh ko bhog-vilas ke bich bhi jivan ki sachchai, dukhon ke karan unse nivritti adi prashnon ke uttar pane ki adamya lalsa ko jagrit kiya. shani ki purn drishti bhog karak shukra, man ke karak chandrama tatha navam bhav par hai jiske parinam svarup unhonne aishvarya ka bhog to kiya sath hi us aishvarya v bhog vilas se utpann hone vale vairagya ki bhi prapti ki.
gautam buddh ka janm lagnesh budh ki mahadsha men hua tha. budh ke bad 7 varsh ki ketu ki dasha ke bad ai bhog karak shukra ki mahadsha jo ki shadbal men sarvadhik bali grah hai, dhanbhav men baithakar ashtam bhav ko drishti de rahe hain. shukra purush ki kundli men patni karak hote hain. gautam buddh ki kundli men shukra panchmesh bhi hai. unhen sundar v sushil patni ka sukh mila tatha rahul namak suyogya putra bhi prapt hua. gautam buddh shanti aur satya ki khoj men n to himlay gae, n hi kathor tapashcharya ka samarthan kiya. ve apne parivar v priyajnon se itni duri banate the ki jab chahte tab unse mil sakte the. unke pita jo ki apne putra ko maya-moh men lipt rakhna chahte the unhonne bhi apne putra ko putra bhav se mukt kar diya, chetna ke rup men svikar kiya. ant men jab maharaj shuddhodan ko pata chala ki buddh ka putra rahul bhi sangh men pravisht ho gaya hai to unki antim sans bhi chali gai.
buddh ka paln-poshan karne vali unki mausi gautmi tatha patni yashodhra bhi buddh se dikshit ho sangh men pravisht ho gain. shukra ne buddh ko sanpurn vaibhav pradan kiya aur dvadshesh hone ke falasvarup sabhi ka vyay bhi kar diya. buddh ne apne parivar ko tyag diya kintu dhire-dhire karke pura parivar sangh men pravisht ho gaya lekin sabka svarup badal chuka tha. pura rajprivar ab sangh ki sharan men tha. 35 varsh ki avastha men siddharth ko 4 saptah ke gahan dhyan ke bad svayan bodh ho gaya. bodhisatva siddharth ! samyak sanbuddh ! unki bhasha avyakt chetna men ja chipi, n kuch pane ko n kuch dene ko. buddh ne jo kuch bhi paya us anubhav ko jab bantna praranbh kiya tab rajkul se lekar bhikhari tak sab tript ho gae. sabke sab bas buddh ki sharan pana chahte the. shukra ki mahadsha samapt hone par ai su. chan. man. ra. ki mahadshaen jismen lagabhag 41 varsh tak unhonne jo antarman ki chetna se prapt kiya use is sansar tak pahunchaya.
isi avdhi men hi unhonne angulimal daku ka bhi hriday parivartan kar yah siddh kiya ki manushya jab tak chahe tab tak apne pap aur kumarg se mukt ho sakta hai. ab tak buddh ki ayu lagabhag 80 varsh ki ho chuki thi. dasha praranbh hui brihaspati ki jo ki dashmesh aur saptamesh hokar vyay bhav men su. shabu. ke sath milakar chaturgahi yog bana rahe hain. dvadash bhav men sthit brihaspati moksh pradata hain. buddh ne apne prarabdh aur vartaman jivan se jo kuch bhi prapt kiya usse is sansar ke andhkar ko dur kiya. jivan ki shuruat hui budh lagnesh ki mahadsha se aur parinirvan hua dvadash bhav men baithe brihaspati ki dasha men ashtamesh shani ke dvadash bhav men baithne se, unhen 80 varsh ki dirghayu prapt hui. brihaspati markesh bhi hai. gautam buddh ki kundli vilakshan hai usi bhanti unke jivan men ghatnaen bhi ghatit huin. unka janm vaishakh purnima ko hua- unhen bodhatva prapti bhi vaishakh purnima ko hui. unka parinirvan bhi vaishakh purnima ko hi hua.