pratyek lagn ke lie ek grah aisa hota hai jo yogkarak hone ke karan shubh faldayi hota hai. yadi aisa grah kundali men balvan arthat uchcharashisth, svarashisth ya vargottami hokar kendra ya trikon bhav men shubh grah ke prabhav men sthit ho v is par kisi bhi pap grah ka prabhav n ho to yah akela hi jatak ko unnati dene men saksham hota hai. atah iska ratn dharan karna vishesh shubh faldayi tatha chamatkari prabhav dene vala hoga parantu yadi yah ashubh bhav men ashubh grahon ke prabhav se grast ho to jatak is yogkarak grah ke chamatkari prabhav se vanchit rah jata hai. aisi sthiti men iski ashubhta ko nasht karne hetu iske liye rudraksh dharan kiya jana chahie.
grah anusar rudraksh evan ratna
surya ke lie 1 mukhi rudraksh, chandra-2 mukhi, mangl-3 mukhi, budh- 4 mukhi, guru-5 mukhi, shukra-6 mukhi, shani-7 mukhi, rahu-8 mukhi evan ketu ke lie 9 mukhi rudraksh dharan karna chahie. vyavsayik vyavdhan hetu 10 mukhi, labh evan unnati hetu 11 mukhi, rog v rin mukti hetu 12 mukhi, akarshan karne v buri najar se bachne ke lie 13 mukhi, shani pira nivaran hetu 14 mukhi, sarva sampannata v vishesh labh hetu 15 mukhi, santan prapti hetu ganesh gauri rudraksh, vaivahik khushhali ke lie gauri shankar rudraksh v sabhi vighnon ko dur karne aur durghatanaane se bachne hetu ganesh rudraksh dharan karna chahie.
ratnon men surya ke lie manikya, chandra ke lie moti ya chandramni, mangl-munga, budh-panna, guru-pukhraj ya sunaila, shukra-hira v opal, shani-nilam, rahu-gomed v ketu ke lie lahsuniya dharan karna shreyaskar hai. ratn v rudraksh pahnne se turant labh hota hai lekin purn fal prapt karne hetu dharak ko niyamit rup se grah puja karni chahie. jahan shubh, yogkarak v bali grahon ke prabhav ko barhane ke lie ratn dharan karna chahie vahin akarak, nich rashisth v ashubh bhav men sthit grah ke shubh fal praptyarth rudraksh dharan karna shreshth hota hai.
rashi anusar ratna
mesh: apke lie surya, chandra, mangal v guru yogkarak grah hain. atah inke lie manikya, moti, manuga v pukhraj dharan kar sakte hain lekin mangal ashtamesh hai atah mangal ke lie 3 mukhi rudraksh svasthavarddhak ho sakta hai. guru ke lie dvadshesh hone ke karan panchmukhi rudraksh dharan karna samriddhi karak hoga. budh, shukra v shani is lagn ke lie badhakarak hain atah in grahon ke lie ratn dharan n kar 4 mukhi, 6 mukhi v 7 mukhi rudraksh dharan karna shreshth hai. yadi surya, chandra bhi chathe, athven evan barhven sthan par a jate hain to ratn ki apeksha 1 mukhi v 2 mukhi rudraksh dharan karna hi shreshth hai.
vrish: vrish lagn ke lie shani, shukra v budh yogkarak hain islie nilam, hira v panna pahnna apke lie shubh hai. ashtamesh guru evan dvadshesh mangal ke ashubh prabhav se mukti hetu 5 mukhi evan 3 mukhi rudraksh dharan karen. surya v chandrama bhi is lagn ke lie badhakarak hain islie inke lie bhi 1 mukhi v 2 mukhi rudraksh dharan karen. shani, shukra v budh bhi yadi chathe, athven ya barhven sthan par a jate hain to ratn ki apeksha 7, 6 v 4 mukhi rudraksh dharan karna hi shreshth hai.
mithun: mithun lagn ke lie budh, shukra v shani yogkarak hain islie ap panna, hira v nilam dharan kar sakte hain parantu shukra dvadshesh v shani ashtamesh bhi hain islie inke fal prapti hetu 4 v 7 mukhi rudraksh bhi dharan karenge to purn fal milega. surya, chandrama v mangal ki shubhta ke lie ek, do v tin mukhi rudraksh dharan karen. guru ke kendradhipti dosh ke karan guru ka ratn pukhraj ashubh faldayi hota hai atah guru ke shubh fal hetu panchmukhi rudraksh mala ya panchmukhi rudraksh dharan karen.
karka: kark lagn ke lie chandra, mangal v guru yogkarak hain islie moti, munga v pukhraj dharan karna shubh rahega parantu guru ke shashthesh hone ke ashubh prabhav ko kam karne hetu sath men panchmukhi rudraksh bhi dharan karna chahie. shani, budh, shukra is lagn ke lie akarak hain tatha surya men marak prabhav hai atah inke lie 7, 4, 6 v 1 mukhi rudraksh dharan karna hi behatar hoga. yadi chandra, mangal v guru bhi ashubh bhav men a jaen to ratn ki apeksha 2, 3 v panchmukhi rudraksh pahnen.
sinh: sthir lagn ke lie bhagyesh badhak ho jata hai. atah sinh lagn men munga n dharan karna hi behatar hai. sinh lagn men vishesh rup se manikya dharan karen. panchmesh guru ke lie pukhraj dharan karne se sampannata prapt hoti hai. shani ke lie 7 mukhi v mangal ke lie 3 mukhi rudraksh dharan karna shreshth rahta hai.
kanya: kanya lagn ke lie budh, shukra v shani yogkarak hain islie panna, hira v nilam dharan karna shubh hoga parantu ashtamesh shani v dvitiyesh shukra ke sath men 7 v 6 mukhi rudraksh bhi dharan karane. yadi budh, shukra v shani ashubh bhav men hon to ratn ki apeksha rudraksh hi dharan karen. kanya lagn ke lie surya, chandra v mangal akarak hain islie inki shanti hetu 1, 2 v 3 mukhi rudraksh dharan karen. guru ke kendradhipti dosh ke nivarnarth panchmukhi rudraksh ya rudraksh mala dharan karen.
tula: tula lagn ke lie shukra, shani v budh yogkarak hain islie hira, nilam v panna dharan karen. ashtamesh shukra v shashthesh budh ke lie inke sath 6 v 4 mukhi rudraksh bhi dharan karna chahie. surya, chandra, mangal v guru is lagn ke lie akarak hain atah inke lie ratn ki apeksha 1, 2, 3 v 5 mukhi rudraksh dharan karen. yadi budh ashubh bhav men baithe hon to ratn ki apeksha 4 mukhi rudraksh dharan karna hi uchit hoga.
vrishchik: vrishchik lagn ke lie surya, chandra, mangal v guru yogkarak hain islie inke ratn manikya, moti, manuga v pukhraj dharan karen. mangal ke shashthesh hone ke ashubh prabhav se mukti hetu 3 mukhi rudraksh bhi sath men dharan karen. akarak shani, shukra v budh ke lie 7, 6 v 4 mukhi rudraksh dharan karen. yadi surya, chandra evan guru ashubh bhav men sthit hon to inke lie ratn ke sath 1, 2 v 5 mukhi rudraksh bhi dharan karen.
dhanu: dhanu lagn ke lie guru, surya v mangal yogkarak hain. atah pukhraj, manikya v manuga dharan karen. mangal dvadshesh bhi hai islie 3 mukhi rudraksh pahnna bhi avashyak hai. ashtamesh chandrama ke lie 2 mukhi rudraksh dharan karen. akarak shukra, budh v shani ke lie 6, 4 v 7 mukhi rudraksh dharan karna shubhatva deta hai. yadi surya, mangal v guru ashubh bhav men baithe hon to inke lie 1, 3 v 5 mukhi rudraksh dharan karen.
makr: makar lagn ke lie shani, shukra v budh yogkarak hain atah nilam, hira v panna dharan karna chahie. surya, chandra, mangal v guru is lagn ke lie ashubh hain atah 1, 2, 3 v 5 mukhi rudraksh dharan karen. yadi budh, shukra v shani ashubh bhav men sthit hon to inke lie bhi ratn ki apeksha 4, 6 v 7 mukhi rudraksh dharan karen.
kumbha: kumbh lagn ke lie shani, shukra v budh yogkarak hain atah nilam, hira v panna dharan karen. shani dvadshesh bhi hai aur budh bhi ashtamesh ka dosh hone se grasit hai islie ratnon ke sath 7 v 4 mukhi rudraksh dharan karen. surya, chandra, mangal v guru akarak hain atah inka shubh prabhav prapt karne ke lie 1, 2, 3 v 5 mukhi rudraksh dharan karna chahie. yadi budh, shukra v shani ashubh bhav men sthit hon to inke lie bhi ratn ki apeksha 4, 6 v 7 mukhi rudraksh dharan karen.
min: min lagn ke lie shukra, budh v shani ashubh hain atah inke lie 4, 6, v 7 mukhi rudraksh dharan karna chahie. chandra, mangal v guru yog karak hain atah inke lie moti, munga v pukhraj dharan karen. ashubh bhav men sthit hone ki sthiti men ratn ki apeksha 2, 3 v 5 mukhi rudraksh dharan karna shubh rahega. shashthesh surya ka shubh prabhav prapt karne ke lie 1 mukhi rudraksh dharan karen.
ratn evan rudraksh jankari
yadi kundali men adhikansh grah uchch rashisth, svarashisth ya vargottami hokar shubh bhav men baithe hon to sabhi grahon ke ratn dharan kiye ja sakte hain. arthat navaratn anguthi ya laeket dharan kar sakte hanai. iske viprit yadi adhikansh grah nich rashisth, shatru rashisth ya nich navansh men sthit hokar ashubh bhavon men sthit hon to inki shubhta hetu 1 se 14 mukhi rudraksh dharan karna shreshth hota hai. shani ki sarhesati men 14 mukhi rudraksh pahnna vishesh labhdayak hai. kalasarp dosh nivaran hetu 8 v 9 mukhi rudraksh pahnne se shanti milti hai.