saubhagya shayan vrat (29 march 2009) pan. brajkishor bharadvaj 'brajvasi' trilokeshvar shiv evan shaktirupa parvati ki asim kripa prapt karne ke lie saubhagya shayan vrat chaitra shukla tritiya ko kiya jata hai. chaitra shukla tritiya ko dolnotsav, ishvar-gauri vratotsav, gangauri tritiya athva gauri visarjan tritiya ke nam se bhi jana jata hai. tri lokeshvar shiv evan shaktirupa parvati ki asim kripa prapt karne ke lie saubhagya shayan vrat chaitra shukla tritiya ko kiya jata hai. chaitra shukla tritiya ko dolnotsav, ishvar-gauri vratotsav, gangauri tritiya athva gauri visarjan tritiya ke nam se bhi jana jata hai. manushyon ke hit ke lie tapodhan maharshiyon ne anek sadhan niyat kie hain, jinmen ek sadhan vrat bhi hai. vibhinn kashton se mukti evan jivan ko safal banane men vrat ki bari mahima hai. rishiyon ka kathan hai ki vrat aur upvas ke niyamon ko apnana hi tap hai. saubhagya shayan vrat ki mahima ke sanbandh men matsyapuran men ullekh hai ki purvakal men jab sanpurn lok dagdh ho gaya tha, tab sabhi praniyon ka saubhagya ekatra hokar baikunthlok men virajman bhagvan shri vishnu ke vakshasthal men sthit ho gaya. dirghakal ke bad jab punah srishtirchna ka samay aya, tab prakriti aur purush se yukt sanpurn lokon ke ahankar se avritt ho jane par shri brahmaji tatha shri vishnuji men spardha jagrat hui. us samay pile rang tatha shivling ke akar ki atyant bhayankar jvala prakat hui. usse bhagvan shri vishnu ka vakshasthal tap utha, jisse vah saubhagyapunj vahan se galit ho gaya. shri vishnu ke vakshasthal men sthit vah saubhagya abhi rasrup hokar dharti par girne bhi n paya tha ki brahmaji ke putra daksh prajapti ne use akash men hi rokakar pi liya, jisse daksh ka prabhav barh gaya. unke pine se bacha hua jo ansh prithvi par gira, vah ath bhagon men bant gaya, jisse ikh, rasraj (para) adi sat saubhagyadayini aushdhiyan utpann huin tatha athvan padarth namak bana. ukt athon padarthon ko 'saubhagyashtaka' kaha gaya. daksh ne jis saubhagyaras ka pan kiya tha, uske ansh ke prabhav se unhen ek kanya ki prapti hui jo sati nam se prasiddh huin. unke adbhut saundarya, madhurya tatha lalitya ke karan sati ko lalita bhi kaha gaya hai. chaitramas ke shuklapaksh ki tritiya tithi ko vishvatma bhagvan shankar ke sath devi sati vivah hua tha. atah is din uttam saubhagya tatha bhagvan shankar ki kripa prapt karne ke lie saubhagyashayan namak vrat kiya jata hai. yah vrat sabhi manorthon ko purn karne vala hai. is din pratah tilmishrit jal se snan adi kar devi sati ke sath sath bhagvan shankar ka pujan karen. panchagavya tatha chandnmishrit jal se devi sati aur bhagvan chandrashekhar ki pratima ko snan karakar dhup, dip, naivedya tatha nana prakar ke fal arpit kar unki archana karni chahie. sarvapratham donon ke nammantron se unke vividh angon ki puja karen. 'patlayai namo'stu, shivay namah' se kramshah parvati aur shiv ke charnon ka, 'jayayai namah, shivay namah' se donon ki ghutityon ka, 'trigunay rudray namah, bhavanyai namah' se pindliyon ka, 'bhadreshvaray namah, vijyayai namah' se ghutnon ka, 'harikeshay namah, vardayai namah' se uruon ka, 'shankray namah, ishayai namah' se donon ke katibhag ka, 'kotavyai namah, shuline namah' se kukshibhag ka, 'shulpanye namah, manglayai namah' se udar ka, 'sarvatmane namah, ishanyai namah' se donon ke stanon ka, 'vedatmane namah, dranyai namah' se kanth ka, 'tripuraghnay namah, anantayai namah' se donon hathon ka, 'trilochnay namah, kalanalapriyayai namah' se bahon ka, 'saubhagyabhvnay namah' se abhushnon ka, 'svaha svadhayai namah, ishvaray namah' se donon ke mukhmandal ka, 'ashok madhuvasinyai namah' se aishvarya pradan karne vale othon ka, 'sthanve namah, chandramukhapriyayai namah' se munh ka, 'arddhanarishvaray namah, asitangyai namah' se nasika ka, 'ugray namah, lalitayai namah' se donon bhaunhon ka, 'sharvay namah, vasavyai namah' se keshon ka, 'shrikanthanathay namah' se keval shiv ke balon ka tatha 'bhimograrupinyai namah, sarvatmane namah' se donon ke mastakon ka pujan karen. is prakar, shiv aur parvati ki vidhivat puja karke unke age saubhagyashtak rakhen. ikh, rasraj (para), nishpav (sem), rajdhanya (shali ya aghni), gokshir (kshirjirk), kusunbh (kusum namak pushpa), kunkum (kesr) tatha namak ye ath vastuen arpit karne se saubhagya ki prapti hoti hai, islie inhen 'saubhagyashtaka' ki sangya di gai hai. is prakar, shiv-parvati ke age sari samagri arpit karke rat men singhara (jalfl) khakar bhumi par shayan karen. fir pratah uthakar snan aur jap karke pavitra hokar mala, vastra aur abhushnon se brahman dampati ka pujan karen. iske bad saubhagyashtak sahit shiv aur parvati ki suvarnamayi pratimaon ko lalitadevi ki kripa ke lie brahman ko dan karen. dan ke samay is prakar bolen- lalita, vijya, bhadra, bhavani, kumuda, shiva, vasudevi, gauri, mangla, sati aur uma prasann hon. is prakar, saubhagya ki abhilasha karne vale manushyon ko ek varsh tak pratyek tritiya ko bhaktipurvak vidhivat pujan karna chahie. ek varsh tak is vrat ka vidhipurvak anushthan karke bhakti ke sath shiv ki puja karen. vrat ki samapti ke samay sanpurn samagriyon se yukt shayya, shiv-parvati ki suvarn pratima (yadi sanbhav ho), bail aur gau ka dan karen. kripnta chorakar drirh nishchay ke sath bhagvan ka pujan karen. jo stri is prakar uttam 'saubhagyashyn' vrat ka anushthan karti hai, uski kamnaen purn hoti hain. yadi vah nishkam bhav se is vrat ko karti hai to use nityapad ki prapti hoti hai. prati mas iska acharan karne vale purush ko yash aur kirti ki prapti hoti hai. jo barah, ath ya sat varshon tak saubhagyashayan vrat ka anushthan karta hai, use shivlok ki prapti hoti hai. atah varnashram ke achar-vichar men rat rahne vale, nishkapat, nirlobh, satyavadi, sabhi praniyon ka hit chahne vale, ved ke anuyayi, buddhiman tatha kritsankalp hokar karm karne vale guni janon ke lie is vrat ka palan karna shreyaskar hai.