kai bar aisi ghatnaen ghatit ho jati hain jo hamare jivan ki dasha aur disha donon ko hani pahuncha kar hamen andar tak itna jhakjhor deti hain ki hamen ghatna ke ghatit hone se purva ka samay ek tuta hua sapna sa lagne lagta hai. apratim saundarya ki dhani kalpana ke jivan men bhi kuch aisa hi hua aur palak jhapkte hi uska saundarya khak ho gaya. akhir aisa kaisa grah yog tha jo use yah din dekhna para. aie dekhen. sha ririk aur atmik saundarya par charcha ki jae to bahut se vyakti atmik sundrta ki prashansa kar sakte hain. parantu sharirik saundarya ke paksh men vot dene vale adhik hi honge. kyonki kisi bhi vyakti se pahli mulakat men ham uske sharirik akarshan se hi prabhavit hote hain. uski atma ki achchaiyan to dhire-dhire bad men hi pata chalti hain. samaj men kurup aur viklang vyaktiyon ko n keval parayon balki apnon ki bhi avhelna jhelni parti hai.
do sagi bahnon men bhi sundar vali beti man bap v anya sadasyon ki jyada ladli hoti hai aur kam sundar ko utni tavajjo nahin milti. parantu aisa sabhi ke sath hona jaruri nahin hai. bahut se vyakti aise hote hain jo vyakti ki antrik sundrta ko pahchante hain aur sharirik rup unke lie gaun ban jata hai. abhi kuch din pahle mainne ‘vivah’ film dekhi usmen hiro aur hiroin ka vivah nishchit hua hai dono hi ek dusre ko bahut chahte hain par thik vivah se ek din pahle hiroin ek aiksident men buri tarah jal jati hai aur vivah mandap ke bajae aspatal pahunch jati hai. parantu hiro jo apni hone vali patni se sachcha pyar karta hai, aspatal jakar vahin par uski mang bharta hai aur uska pura ilaj karvata hai aur apni patni ko pura man, samman aur vah sanbal deta hai jiski usko us vakt bahut jarurat thi. yah to ek film hai parantu asal jindgi men bhi aisa hi hadsa kalpana ke sath hua. kalpana bahut hi sundar aur charhre badan ki thi.
uska vivah shahar ke bahut bare v dhanadhya parivar men hua tha. uske pati sas sasur sabhi unka bahut khyal rakhte aur usko ji jan se chahte the. usko apne ghar ki lakshmi batate hue nahin thakte the. pati ka karobar dinon din unnati kar raha tha aur kalpana ka ghar mahal ki tarah bara aur sundar tha. vivah ke pashchat do varsh men kalpana do atyant sundar bachchon ki man ban gai. kalpana ko tarh-tarah ki momabattiyan banane ka shauk tha. vah kalatmak tarike se alg-alag dijainon ki momabattiya banati aur apne khas mitron kon gift karti kyonki apne hath se banai gai vastu ko gift karne ka maja kuch aur hi hota hai aur pane vala bhi jyada hi anandit mahsus karta hai. dipavli par kalpana ne bahut se sundar dijainon ki momabatti banane ka ayojan kar liya tha.
usne sabhi dijainon par bahut mehanat ki thi aur vah vahut khush thi ki is bar uski bahut prashansa hogi aur vah sabhi logane ki list bhi fainal kar rah thi jin-jinko uske vishesh gift set gift ke taur par jane the. uske pati akhilesh bhi us list men roj ek do nam jor dete the. unhen bhi kalpana ki kriti par naj tha aur ve bahut hi garva se sabko batate the ki unki kalpana ki kalpana kitni sundar hai. kalpana ne tin char logon ko kam par laga rakha tha. mom ko bare karhae men garm kiya ja raha tha tatha unko sanchon hi men dalna tha. tabhi achanak kaise uske chote bete ki bael vahan par akar giri aur beta uske piche-piche tir ki tarah daurta hua vahan a gaya.
kalpana kisi hone vali ashanka men chikhti hui vahan pahunchi aur bete ko dhakka diya par pata nahin kaise uski sari karhai ke kunde se ulajh gai aur khaulte hue tel ne kalpana ke sharir par pani ki tarah girakar use pura nahla diya. ghar par naukron ke alava koi nahin tha. naukron ko kato to khun nahin jaisi sthiti ho gai unhen ekadam samajh hi nahin aya ki kya karen. kalpana madad ke lie bahar ki or bhagi jisse ki sharir ki khal pighl-pighal kar niche gir gai. khaulte hue tel ne uske sundar sharir ko jala kar khak kar diya tha. kalpana dard se buri tarah chilla rahi thi. use uske pati charted plen se use munbai le gaye par is bich uski halat bahut bigar gai thi aur vah jindgi aur maut ke bich jhul rahi thi. munbai men bich kaindi aspatal men vah 6 mahine tak rahi aur bare se bare daektar ne uska ilaj kiya aur anek aepreshan bhi huye.
kalpana ka adha sharir buri tarah se jal gaya tha. apreshan ke bad ek tang kuch choti ho gai. puri tvacha sikur gai thi. plastik sarjari men skin grafting ki gai par tab bhi sara sharir thik nahin ho paya tvacha jhulsi si hi rahi aur ab sankraman ka khatra sada hi bana rahta hai. bahut jaldi infaikshan ho jata hai aur bahut hi saeft kapre pahnne parte hain. kalpana ke ilaj par kai karor rupya kharch hua par akhilesh ji ne pure tan man aur dhan se kalpana ki seva ki. jiske falasvarup kalpana aj sakushal hai aur apne bachchon ke sath sukhi jindgi ji rahi hai. sharirik dukh aur jale ki tis to shayad hi kabhi khatm hogi par pati aur bachchon ka sath v sabka pyar shayad uske lie sabse bara sukh hai aur akhilesh bhi kalpana ka pahle se bhi adhik dhyan rakhte hain. kyonki ab unhen sharir ki bajay uski atma se adhik pyar hai.
aiye janen kalpana ki janmakundli men sthit grahon ki jubani jinhonne kalpana ke sundar sharir ko jala kar khak kar diya. kalpana ki janmakundli men lagnesh shukra chathe bhav arthat rog sthan men mangal ke nakshatra men sthit hai aur akarak mangal aur ashtamesh guru v shani ki drishti men hai. saptamesh mangal dvadshesh hokar apni nich rashi men shani ki drishti men rahu ke sath sthit hain. navansh men bhi mangal ashtam bhav men ketu aur shukra ke sath sthit hain. chaturth bhav ka svami surya agni tatva grah hote hue agni tatva grah mangal ki rashi men sthit hai aur dvitiyesh markesh budh ast hokar baithe hain. surya aur budh donon rahu ki drishti men hai. guru ashtamesh aur labhesh hokar kendra sthan men mangal ki drishti men hai tatha navansh men nich rashi men chale gaye hain. rajyog karak shani apne ghar men bhagya sthan men chandra evan ketu ke sath rahu aur mangal ko dekh rahe hain.
chandrama aur shani ki yuti se vish yog banta hai. is kundli men bhi vish yog ki drishti mangal aur rahu ko pratikul rup se prabhavit kar rahi hai. mangal surya adhishthit rashi ka svami hone se tatha rahu ki yuti ke karan agni ka murt svarup ban gaya hai. shani bhi ketu adhishthit rashi ka svami hone se agni ka prabhav shukra par dal rahe hain arthat lagnesh shukra par mangal, shani, rahu, ketu tatha surya sabhi pap grahon ka kuprabhav hai. kendrasth guru ne hi jan bakhsh di hai. kundli men agni, vayu aur jal tatvon ka pratinidhitva karne vale samast grah pirit hain.
mangal v rahu ki yuti angarak yog ka nirman karti hai. kalpana ka mangal n keval akarak hai apitu nich rashi ka hone ke atirikt shani ke sath paraspar drishti yog ka nirman karke aur bhi adhik kupravritti aur kuprabhav vala hokar vidhvansatmak rahu ke sath prabal angarak yog ka nirman kar raha hai aur is prabal angarak yog ka tandav lagnesh shukra, jivan rakshak guru ke sath-sath kundli ke samast grahon ko kuprabhavit kar raha hai.
kendrasthit balvan guru ne jivan raksha to ki parantu pirit guru angarak yog ke tandav ko n rok saka aur parinamasvarup kalpana ko apne apratim rup, saundarya, yauvan, svasth sharir v jivan ki khushiyon se hath dhona para. gochar men durghatana ke samay janmang ke dashamasth ashtamesh guru par mangal, shani aur rahu ki purn drishti thi tatha surya guru ke upar hi chal rahe the. arthat ghatna vale din gochar ke shani, mangal, surya v rahu adi sabhi pap grahon ka janmakundli ke ashtamesh par kuprabhav hone ke karan ashtamesh guru ashtam bhav ki raksha karne men kuch chuk gaya aur agni, vayu aur jal ke mishrit yog se pighle hue garm mom se kalpana ka sharir jal gaya. gochar ke sabhi pap grahon ka prabhav dashanath guru par hone ke karan ashtamesh guru ki dasha atyant ashubh siddh hui.
arthik rup se kalpana ka sasural bahut hi dhanadhya parivar hai aur unhonne us par pani ki tarah paisa bahaya kyonki kalpana ki kundli ke anusar bhi labhesh guru labh sthan ko dekh rahe hain aur chaturthesh v panchmesh surya aur budh saptam men baith kar raj yog ka nirman kar rahe hain. parashar ke siddhant ke anusar prakritik shubh grah lagn, chandra evan surya se kendra men balvan sthiti men hai tatha ayu karak grah shani balvan hone se purn ayu ka yog hai. kalpana ki kundli men guru lagn se kendra men chandrama se shukra kendra men tatha surya se bhi guru kendra men hain tatha rahu, mangal tritiya men hain. isilie itni bhayankar durghatana hone ke bad bhi vah bach gai aur akarak grah guru ki dasha chalne ke karan vah abhi tak puri tarah se thik nahin ho pai hai aur abhi bhi sharirik kasht se jujh rahi hai. lekin kalpana atyant hi sahnshil aur bahadur hai.
usko bimari ke dauran akhilesh tatha apne pure parivar ka purn sahyog prapt hua aur bad men bhi ve n keval uske svasthya ka khyal rakhte hain. balki manoranjan ki drishti se use pure yurop, yu.es. aur anya deshen men bhi ghumane le gaye akhilesh ne kalpana ke atmik saundarya ko jyada mahatva diya n ki sharirik saundarya ko kyonki atmik saundarya hi shashvat hota hai.