ank hora dvara muhurt acharya bhavna bhatiya jyotish shastra men muhurt nikalne ki vidhi vistar se batai gai hai, usi sandarbh men ank hora dvara muhurt ki ganna ank hora sarni dvara kaise ki jati hai janie is lekh se. karya-siddhi ke lie hora muhurtt purn faldayak aur achuk mane gae hain. sat grahon ki sat hora hain, jo din-rat ke 24 ghanton men ghumakar manushya ko karya-siddhi ke lie ashubh samay men bhi susamay suavasar pradan karti hain. surya ki hora raj-seva ke lie uttam hai, pravas ke lie shukra ki hora; gyanarjan ke lie budh ki hora; sabhi prakar ki karya siddhi ke lie chandrama ki hora; dravya-sangrah ke lie shani ki hora; vivah ke lie, guru ki hora tatha yuddh, kalah aur vivad ke lie mangal ki hora uttam hoti hai.
bhartiya paddhati se kisi bhi var ki ganna suryoday se aranbh hoti hai. atah var ki pahli hora (ghanta) ki ganna bhi suryoday se hi aranbh hoti hai. ek din ke suryoday se dusre din ke suryoday tak ka samay bharat men lagabhag 24 ghante hota hai. ganna ka adhar sthaniya suryoday hone se, antarrashtriya star par uska prayog lagabhag asanbhav hai.
buy detail numerology report
atah ank hora ki khoj ki gai. sefriyal ne 100 varsh purva sabse pahle hora ke lie madhya ratri se madhya ratri tak ka samay ka prayog apni pustak 'kanbala auf nanbarsa' men kiya. hora ganna ka adhar grahon ki prithvi se duri man sakte hain. prithvi se shani grah ki duri sabse adhik hain. kramshah guru, mangal, surya, shukra v budh grah ki duri hai. chandra grah ki duri sabse kam hai. rahu v ketu chaya grah hain atah unhen is ganna men nahi liya jata hai. nimnalikhit chitra se ham sabhi grahon ki prithvi se duri dekh sakte hain.
shanivar ko pratham hora (madhya ratri se) shani ki, dusri hora guru ki, tisri hora mangal ki, chauthi hora surya ki, panchvi hora shukra ki, chathi hora budh ki aur satvin hora chandra ki hoti hai. sat hora purn ho jane par 8 se 14 v 15 se 21 tak, fir ek se sat vali hora chalti hai. 22vin hora fir shani ki hogi, 23vin guru ki, 24vin hora mangal ki evan 25 vin hora surya ki ane par agle din ki pahli hora jo ki surya ki hai shuru ho jayegi. isi kram aur adhar par nimnalikhit hora sarni banai gai hain. hora sarni se pratidin kis samay kaun si hora hogi.
iski jankari li ja sakti hai. kis hora men kaun sa karya karen?
ank 1/4 som (ravi) ki hora : rajyabhishek, prashasnik karya, navin pad grahan, raj-darshan, rajyaseva, aushdhi ka nirman, svarna-tamradi karya, yagya, mantropdesh, gay-bail evan vahan ka kray adi karya karen.
ank 2/7 chandra (som) ki hora : krishi sambandhi karya, navin vastra athva moti ratn, abhushan dharan, navin yojna, parikalpana, kala sikhna, bag-bagicha lagana, vriksharopan evan chandi ki vastuon ka nirman karya karen.
ank 9 mangal ki hora : vad-vivad, mukaddama, jasusi karya, chal karna, asad karya, rin dena, yuddha-niti, sahas kritya, khanan karya, svarna-tamradi karya, shalya-kriya (apreshn) evan vyayam karya karen.
ank 5 budh ki hora : sahityarambh, pathn-pathan, shiksha-diksha, lekhan, prakashan, adhyayan, shilpakala, maitri, krira, dhanya-sangrah, chaturya, bahi-khata, hisab-kitab, lok-sampark evan patra vyavhar karya karen.
ank 3 guru ki hora : dharmik karya, vivah, grah-shanti, yagya-havan, dan-punya, manglik karya, devarchan, dev-pratishtha, nyayik karya, navin vastrabhushan dharan, vidyabhyas, vahan kray-vikray evan tirthatan karya karen.
ank 6 shukra ki hora : nritya-sangit, stri-prasang, prem-vyavhar, priyajn-samagam, utsav, vastra alankar dharan, lakshmi-pujan, pravas, vyaparik karya, krishi-karya, aishvaryavarddhak kay evan filma-nirman karya karen.
ank 8 shani ki hora : grih-pravesh, naukr-chakar rakhna, seva vishayak karya, mashinri kal-purjon ke karya, asatya bhashan, chal kapat, arka-nishkasan, visarjan, dhan-sangrah evan pad-grahan karya karen. bina sarini ke kisi var ko abhisht hora nikalne ka niyam kisi bhi var ki pratham hora usi var se prarambh hoti hai. us var se viprit kram se varon ko ek-ek ke antar se ginen. jaise, budhvar ko pratham hora budh ki, tatpashchat viprit kram se mangal ko chorakar som (chandra) ki hora hogi evan ravi ko chorakar shani ki hora hogi. isi kram se age shesh 21 hora us din ayengi. kisi karya ki siddhi ke lie upar jo hora shreshth likhi hain,
kisi bhi din us hora ke 1ghante-muhurtt men vah karya karenge to saflta apke hath rahegi. udaharan ke lie man lijie, aj guruvar hai aur aj hi apko kahin pravas karna hai. upar pravas ke lie shukra ki hora shreshth likhi gai hain, atah pata lagana hai ki aj guruvar ke din shukra ki hora kis-kis samay rahegi. sarni men guruvar ke samne khane men dekha to chauthe, gyarhven evan attharhven ghante men shukra ki hora mili. ataev pravas ke lie uparyukt hora shubh hai.
jvalant udaharan ke lie pashchim bangal ki nayi mukhymantri mamta banarji ne 20 mai 2011, shukravar ko dopahar 1 bajakar 1 minat par shapath grahan ki. ank hora sarni ke anusar 20 mai 2011 ko shukravar ki sarni men dopahar 13 baje, 14vin hora surya ki thi. jo ki rajyabhishek v naya pad grahan karne ke liye ati uttam muhurt mana ja sakta hai.
muhurt nikalne men sarvapratham ham us karya ke lie safal samay ki ganna karte hain. is ke bad vyakti vishesh ke liye us samay ki shubhta ka avlokan karte hain. muhurt ke bare men ek aur manyata hai ki karyon ko karne men jab man men utsah ho to vah karya siddh hota hai.