vakri grahon ke sanbandh men jyotish prakashatatva men kaha gaya hai ki-“krura vakra mahakruraah saumya vakra mahashubha..” arthat krur grah vakri hone par atikrur fal dete hain tatha saumya grah vakri hone par ati shubhafal dete hain. jatak tatva aur saravli ke anusar yadi shubhagrah vakri ho to manushya ko rajya, dhan, vaibhav ki prapti hoti hai kintu yadi papagrah vakri ho to dhan, yash, pratishtha ki hani hokar pratikul fal ki sanbhavna rahti hai.
janm samay men vakri grah jab gocharavash vakri hota hai to vah shubhafal pradan karta hai basharte aise jatak ki shubh dashantardasha chal rahi ho. kya hain vakri grah: falit jyotish ke anusar jab koi grah kisi rashi men gatishil rahte hue apne svabhavik parikrama path par age ko n barhakar piche ki or (ulta) gati karta hai to vah vakri kaha jata hai. jo grah apne parikrama path par age ko gati karta hai to vah margi kaha jata hai. vakri grah kundli men jatak vishesh ke charitra-nirman ki kriya men sahayak hote hain. jis bhav aur rashi men ve vakri hote hain us rashi aur bhav sanbandhi faladesh men kafi kuch parivartan a jata hai. surya evan chandra margi grah hain, ye kabhi bhi vakri nahin hote hain.
vakri hone par shubhashubh parivartana: bhartiya jyotish ke anusar brihaspati jis bhav men sthit hokar vakri hota hai, us bhav ke faladeshon men anukul v sukhad parivartan ate hain. amtaur par brihaspati ke vakri hone par vyakti apne parivar-kutunb, desh, santan, jimmedariyon, dharm v katrtavya ke prati jyada chitint ho jata hai. janm kundli ke dusre sthan men akar jab brihaspati vakri hota hai, tab apni dasha-antardasha men apar dhan-daulat deta hai. navam bhav men vakri hone par jatak ke bhagya dvar khol deta hai evan dvadash sthan men vakri hone par jatak ko janmabhumi ki or le jata hai. makar rashi men bhale hi nich ka guru virajman ho parantu yadi vah vakri ho to uchch ki tarah hi shubh fal pradan karega. vakri guru ka prabhav: guru vidya-buddhi aur dharma-karm ka sthai karak grah hai. manushya ke vikas ke lie yah ati mahatvapurn grah hai.
guru ka manushya ke antrik, mansik, manovaigyanik tatha adhyatmik jivan par samuchit prabhav parta hai. gocharavash guru ke vakri rahte hue dhairya v gambhirta se karya ki pakar kar nai yojna v nae karyon ko gati deni chahie. jin jatkon ke janm samay men guru vakri ho, unko gochar bhramanavash vakri hone par atke karyon men gati evan saflta milegi aur shubh falon ki prapti hogi. brihaspati aur anya rashigat prabhav: vartaman men kark rashi men gochar bhramanavash pahle, chaithe, athven, barhven guru ke ashubh prabhav se prabhavit kark, mesh, dhanu evan sinh rashi ke vyaktiyon ko rahat milegi, jab brihaspati vakri hota hai to aise vyaktiyon ke bhagya men parivartan ata hai. kark rashi men gatishil vakri guru apni pancham purn drishti se vrishchik rashi men gatishil naisargik rup se papagrah shani ko dekhega. jab koi shubh grah vakri hokar kisi ashubh grah se drishti sanbandh banata hai to uske ashubh falon men kami akar shubhatva men vriddhi hoti hai.
atah is dauran shani ki dhaiya se pirit mesh v sinh rashi ke jatak evan sarhesati se prabhavit tula, vrishchik v dhanu rashi ke vyaktiyon ko rahat milegi, unke bigde aur atke kam banne lagenge. vakri guru ke prabhav se anya samast rashiyan bhi prabhavit hongi. kab hote hain guru vakri: brihaspati apni dhuri par 9 ghanta 55 minat men puri tarah ghum leta hai. yah ek sekend men 8 mil chalta hai tatha surya ki parikrama 4332 din 35 ghati 5 pal men puri karta hai. sthul man se guru ek rashi par 12 ya 13 mahine rahta hai. ek nakshatra par 160 din v ek charan par 43 din rahta hai.
brihaspati grah ast hone ke 30 din bad uday hota hai. uday ke 128 din bad vakri hota hai. vakri ke 120 din bad margi hota hai tatha 128 din bad punah ast ho jata hai. kark rashi men vakri guru ke gochar bhraman se pahle, chaithe, athven, barhven brihaspati ke ashubh prabhav se prabhavit kark, mesh, dhanu evan sinh rashi ke jatkon ko rahat milegi. sath hi shani par vakri guru ki kripa drishti se mesh, sinh rashi par gatishil shani ki dhaiya evan tula, vrishchik, dhanu rashi ke jatkon ko shani ki sadhesati ke ashubh prabhav se mukti milegi. guru ki dasha lagne par baron ka adar samman karen. apne bujurgon ka ashirvad len tatha guruvar ka vrat karne se guru ke shubh falon men vriddhi ho jati hai jabki ashubh falon men kami ati hai. vakri guru ki dasha hone par guru se sanbandhit vastuon yatha kesar, haldi, pile kapre, ful, sona, pital adi ka dan dena bhi shubh fal deta hai.