astagrahon ke bare men kaha gaya hai -‘trini aste bhave jarvt’ arthat kisi janm chakra men tin grahon ke ast ho jane par vyakti jar padarth ke saman ho jata hai. aisa vyakti sthir bana rahna chahta hai, uske sharir, man aur vachan sabhi men shithilta a jati hai. kaha jata hai ki grahon ke nirbal hone men unki astangtta sabse bara dosh hota hai. ast grah apne naisargik gunon ko kho dete hain, balhin ho jate hain aur yadi vah mul trikon ya uchch rashi men bhi hon to bhi achche parinam dene men asamarth rahte hain. jyotish shastra men ek ast grah ki vahi sthiti ban jati hai jo ek bimar, balhin aur asvasth raja ki hoti hai. yadi koi ast grah nich rashi, duahsthan, balatva dosh ya vriddh dosh, shatru rashi ya ashubh grahon ke prabhav men ho to aisa ast grah korh men khaj ka kam karne lagta hai.
uske fal aur bhi nikrisht milne lagte hain. atah kisi kundli ke fal nirupan men ast grah ka vishleshan avashya kar lena chahie. ast grah ki dashantardasha men koi ganbhir durghatana, duahkh ya bimari adi ho jati hai. jab kisi vyakti ki janmakundli men koi shubh grah yatha brihaspati, shukra, chandra, budh adi ast hote hain to astangtta ke parinam aur bhi ganbhir rup se milne lagte hain. kai kundliyon men to dekhne ko milta hai ki kisi ek shubh grah ke purn ast ho jane matra se vyakti ka sanpurn jivan hi abhavagrast ho jata hai aur parinam kisi bhi rup men a sakte hain jaise kisi priyajan ki mrityu ho jana, kisi ke paitrik sanpatti ka nasht ho jana, sharir ka koi ang bhang ho jana ya kisi pariyojna men bhari hani hone ke karan bhari dhanabhav ho jana adi.
yah bhi dekha jata hai ki yadi koi grah ast ho parantu vah shubh bhav men sthit ho jae athva us par shubh grah ki drishti ho to ast grah ke dushparinamon men kami a jati hai. yadi kisi vyakti ki kundli men lagnesh ast ho aur is ast grah par se koi pap grah sanchar kare to fal atyant pratikul milte hain. yadi koi grah ast ho aur vah pap prabhav men bhi ho to aise grah ke dushparinamon se bachne ke lie dan karna shreshth upay hota hai. kisi grah ke ast hone par aise grah ki dasha antardasha men anavashyak vilanb, kisi karya ko karne se mana karna athva anya prakar ke duahkhon ka samna karna parta hai. yadi vyakti ki kundli men koi grah surya ke nikatatam hokar ast ho jata hai to aisa grah balhin ho jata hai. ab ham grahon ke ast hone par unke samanya falon par vichar karte hain ki kisi grah vishesh ke ast ho jane par unki antardasha men kaise parinam prapt hote hain:- chandrama: yadi kundli men chandrama ast ho to uski antardasha men mansik ashanti, man ka asvasth hona, paitrik sanpatti ka nasht hona, jan sahyog ka abhav, vyakti ka ashant ho jana, daure ana, mirgi hona, fefron men rog hona adi ghatnaen hoti hain. yadi ast chandrama ashtamesh ke pap prabhav men ho to vyakti dirghakal tak avsadagrast rahta hai, isi prakar dvadshesh ke prabhav men ane par vyakti nashe ka adi ho jata hai athva kisi bimari ki nirantar dava khata hai.
mangl: kisi vyakti ki kundli men mangal ke ast hone par uski antardasha men vyakti krodhi, nason men dard, rakt ka dushit ho jana, uchch avsad grastata adi kasht ho jate hain. yadi ast mangal par rahu/ketu ka prabhav ho to vyakti durghatana, mukdmebaji ya kainsar ka shikar ho jata hai. yadi mangal shashthesh ke pap prabhav men ho to asvasth, dushit rakt, kainsar ya vivad men chotagrast ho jata hai. isi prakar ashtamesh ke pap prabhav men hone par vyakti ghotalebaj ho jata hai, bhrashtachar men lipt rahta hai. dvadshesh ke pap prabhav men hone par vyakti kisi nashile padarth ka sevan karne lagta hai. budh: ast budh ki antardasha men vyakti bhramit, sanvednshil nirnay lene men vilanb karta hai. ati vishvas ya nyun vishvas ka shikar hokar tanavagrast ho jata hai, ashant rahta hai. uske sharir men lakva/ainthan, shvans rog athva charm rog ho jate hain. yadi ast budh shashthesh ke pap prabhav men ho to vyakti tanava/charm rog ya lakvagrast hokar asvasth rahta hai. yadi budh ashtamesh ke pap prabhav men ho to vyakti dama rog se grasit, mansik avsad athva kisi priyajan ki mrityu ka shok bhogta hai. yadi budh dvadshesh ke pap prabhav men ho to vyakti kisi nashe ka shikar ya rog grast rahta hai. brihaspati: yadi kisi vyakti ki kundli men brihaspati ast ho aur brihaspati ki antardasha a jae to vyakti livar ki bimari aur jvar se grasit rahta hai.
vah adhyayan se kat jata hai. uski adhyatmik ruchi kshin ho jati hai. vah svarthi ho jata hai. yadi ast brihaspati par anya dushit prabhav hon to vah purush santan se vanchit ho sakta hai. brihaspati ke shashthesh ke pap prabhav men hone par uchch jvar, tayfaid, madhumeh tatha mukdme men fansna, ashtamesh ke pap prabhav men hone par pratishtha men hani, kisi priyajan ka viyog athva kisi bujurg ki mrityu ho jana. isi prakar dvadshesh ke pap prabhav men hone par vyakti ke vivahettar sanbandh ban jate hain aur vah kisi vyasan se grasit ho jata hai. shukra: jab kisi vyakti ki kundli men shukra ast ho aur uski antardasha a jae to vyakti ki patni rog grast ho jati hai athva uske garbhashay ya bachchedani men samasya ho jati hai. vyakti netra rog, charm rog se bhi grasit ho jata hai. ast shukra ke rahu-ketu ke prabhav men ane par vyakti ki pratishtha nasht ho jati hai. vah kidni vikar ya madhumeh ka shikar ho jata hai. yadi ast shukra shashthesh ke dushprabhav men ho to mutrashay rog, yaunangon men vikar athva charm rog se grasit hota hai.
ashtamesh ke dushprabhav men hone par danpatya jivan men katuta, kisi priyajan ki mrityu ka dukh tatha dvadshesh ke dushprabhav men hone par vyakti yaun sankraman rog aur nashe ka adi ho jata hai. shani: yadi kisi vyakti ki kundli men shani ast ho aur uski dasha antardasha a jaye to vah asthi bhang hone, tangon ya pairon men dard, rirh ki haddi men dard adi se pirit rahta hai. use kathor parishram karna parta hai. uska karya vyavhar nich prakriti ke logon se rahta hai. uski samajik pratishtha samapt hone lagti hai. shani ke rahu-ketu se prabhavit hone par joron men dard rahta hai. ast shani ke shashthesh ke pap prabhav men hone par rirh ki haddi men dard, joron men dard, sharir men jakaran rahne lagti hai. mukdmon ka samna karna parta hai. ast shani ke ashtamesh ke pap prabhav men hone par asthi tut jane, rojgar men samasya athva kisi priyajan ka abhav ho jana hota hai. shani ke dvadshesh ke pap prabhav men hone par vyakti kisi bimari se grast rahne lagta hai athva vyasan men dub jata hai.