kisi jatak ki kundli men chaturth bhav ka sthan ati mahatvapurn hai. yah bhav mata ka bhav hai. iska shiksha se gahra sanbandh hai, kyonki bachche ki man uski pahli shikshak hoti hai. kundli ke pancham, ashtam aur navam bhav bhi utne hi mahatvapurn hain. bhav, bhavesh aur uske karak ki sthiti aur yogon ke anurup jatak shiksha grahan karega. jatak ki uchch shiksha ki prapti men nimnalikhit yogon aur grah sthitiyon ki bhumika aham hoti hai:
û gyan ka karak brihaspati uchch ho, mitrakshetri ho aur sarasvati yog banata ho.
û dashmesh-panchmesh ka sanbandh achcha ho.
û pancham bhav ka svami shubh sthiti men ho, apne navmansh men ho ya mitrakshetri athva svakshetri ho.
û gyan ke prayog ki abhivyakti ke lie budh grah ki sthiti uttam ho, balvan ho aur yog karkon se sanbandh rakhta ho.
û chandrama nirmal ho aur shukra bhi achcha ho. inke atirikt aur bhi anek yog ho sakte hain kintu sthanabhav ke karan unka varnan sanbhav nahin hai. aj rojgar ki samasya sursa ke munh ki bhanti vikral rup dharan kar chuki hai. ise dhyan men rakhte hue mata-pita apne bachchon ko unki ruchi ke anurup shiksha dilana chahte hain taki unhen rojgar ke chayan aur uski prapti men kathinai n ho.
vartaman shiksha pranali bhi rojgar ki isi samasya ko dhyan men rakhakar viksit ki gai hai. kintu yada-kada dekhne men ata hai ki apne sare prayason ke bavjud mata-pita apne bachchon ko unki manpsand shiksha nahin dila pate aur yadi unhen aisi shiksha mil bhi jati hai to ve uska labh nahin le pate. svarn padak prapt chatra jivan ki daur men pichar jate hain jabki apekshakrit kamjor chatra age nikal jate hain. sarvavidit hai ki ravindra nath taigor ne koi aupcharik shiksha grahan nahin ki thi, kintu apni kavya rachna ‘gitanjli’ par nobel puraskar prapt karne vale ve pahle eshiyai the. aisa kyon hota hai? is prashn ka uttar jyotish shastra men upalabdh hai. yah shastra batata hai ki manushya ko apne karmon ka fal bhogna hi hai. manushya ke jivan par parne vale kal ke prabhav ki jankari bhi isi shastra se milti hai aur kal hai, dasha aur gochar jinka gyan janmapatri se prapt hota hai.
kisi vyakti ke jivan men dhanagam kis prakar hoga ? uska karya kshetra kya hoga ? in aur in jaise anya anek prashnon ke uttar jyotish shastra men varnit siddhanton ke adhar par dhundhe ja sakte hain. janm, surya evan chandra lagnon se dasham bhav ka svami navansh kundli men jis grah ki rashi men hoga usi grah ki rashi ki prakriti par vyakti ki jivika nirbhar karti hai. ukt tinon lagnon men (sudarshan paddhati ke anusar) jo bali hoga uska fal adhik ho sakta hai. is kram men nimnalikhit binduon par dhyan dena avashyak hai.
û ukt tinon lagnon se dasham bhav men baithe grahon se dhan labh ki sthitiyon ka vichar karen.
û yahan dhan labhdayak grahon ka tatparya rojgar men sahayak grahon se hai. û dhanesh v labhesh ki sthitiyan, dhan nirman karne vale grahon ka karmeshon se sanbandh.
û arthik sthiti v karya kshetra ke liye sanbaddh varg yani chart jarur dekhen, jaise dhan ke liye hora chart. dashmansh kundali se jatak ke vyavsay, naukri adi ka vichar kiya jana chahie. arthat rojgar ke madhyam se jivan men hone vali samriddhi, unnati adi par dhyan den. dashmansh men jo grah balvan ho usse bhi karobar ki jankari milti hai.
iske atirikt arthik sthiti ke lie indu lagn ka avlokan karen. is lagn se jatak ki arthik sthiti kaisi hogi iska sahi anuman lagaya ja sakta hai. yah bhi dekh len ki us kundali men anayas hi dhan dene vale grah kaun se hain? anayas dhan se tatparya latri, satta adi se milne vale dhan se hai. mata-pita se milne vali chal-achal sanpatti ke yog bhi dekhne chahie. rajyog karak grah aur ajivika vale grahon se unka sanbandh kaisa hai in sab par vichar karen. yahan do udahrnon ke dvara in niyamon ka vishleshan prastut hai:
udaharan 1 : janm tarikh = 25.4.1956 janm samay = 06.10 pratah, 1. lagn aur surya se dashmesh-shani-budh ke navmansh men tatha chandrama se dashmesh- svayan chandrama-shani ke navmansh men aur surya aur lagn se dasham men - uchch mangal, chandrama se dasham men uchch brihaspati.
2. lagnesh mangal uchch ka hokar panchmhapurush namak ruchak yog bana raha hai.
3. labhesh-karmesh vakri hokar bali hai. lagnesh bali hai. uchch ka bhagyesh brihaspati chaturth men bali hokar gajkesri yog bana raha hai aur bali grah fal dete hain.
4. navmansh men mangal bali hai, dashmansh men bhi mangal uchch hokar bali hai.
5. jatak ka navmansh lagn pancham bhav arthat sanchit karm vala bhav hai, aur janm lagn navmansh men bhagya bhav bana.
6. uchch ke surya, mangal aur brihaspati janm aur chandra lagnon se kendra men hain. panchmesh-navmesh ka lagnesh se sanbandh vishesh raj yog bana raha hai. mangal ashtamesh hai kintu laghu parashri ke anusar lagnesh ko ashtamesh ka dosh nahin lagta hai, balki vah shubh sandhata ho jata hai .
7. dashmesh v ashtamesh ka rashi parivartan yog bhi hai. nishkarshatah kaha ja sakta hai ki puri kundali men mangal ka prabhav sabse jyada hai.
8. uchch ka surya: rajya ka pratik yani sarkari naukri ka pratik hai. uchch ka mangl: sena aur pulis ka pratik hai. mangal rajya bhav men baithakar rajya ke karak se sanbandh bana raha hai aur navmansh v dashmansh kundliyon men mangl-surya ka sanbandh hai .
shani: janm lagn v surya lagn se dashmesh hai aur chandra kundli se yogkarak hai (chandra kundli bali hai) shani naukri ka pratik hai aur lagnesh-shani mangal ko dekh raha hai. yah karmesh hone ke sath ayesh bhi hai, aur guptata ka bhi pratik hai tatha gupt rashi vrishchik v guptabhav ashtam men vakri hokar bali hai. nishkarsha: jatak pulis vibhag men uchch pad par aur gupt abhiyanon men karyarat hai. use aranbh se vyayam ka bhi shauk raha hai jiska karak mangal hai. karmajivi siddhantanusar shani janm v surya lagnon se dashmesh hokar budh ke navmansh men chandrama se dashmesh shani ke navmansh men hai. budh grah buddhi ka pratik hai. chandra se dasham brihaspati uchch ka hai. jatak ek uttam koti ka jyotishi bhi hai. uchch ka surya yagya adi men parangat banata hai. shani naukri karata hai. panchmesh uchch ka hai aur uska lagnesh se sanbandh rajyog bana raha hai, shashthesh ke sath lagnesh men budhaditya yog hai. jatak ek pratishthit jyotishi v yagya anushthan ka gyata bhi hai aur use donon hi karyon se dhan prapt ho raha hai.
jatak imandar v samaj sevi bhi hai.
udaharan 2 janaral parvej musharraf janm tarikh = 11.8.1943, janm ka samay = 06.45 pratah janm sthan = dilli
1. ruchak yog, yogkarak mangal digbali hokar janm kundali ke dasham bhav men sthit hai. mangal ka lagnesh chandrama se ekantar drishti sanbandh hai.
2. navmesh brihaspati rajya ke karak surya ke sath lagn men uchchasth hai
3. lagn v lagnesh yog karak se sakaratmak prabhav men hain.
4. navmansh men dasham bhav sthit shani shash yog ka nirman kar raha hai jo satta sukh ka dyotak hai.
5. janmank men hans aur ruchak yog sena v rajya adhikari hone ka sanket de rahe hain.
6. janm aur surya lagnon se dashmesh mangal guru ke navmansh men hai aur navmansh men hi mangal aur guru ka rashi-parivartan yog ban raha hai, jo sena aur satta sukh ka pratik hai.
7. chandrama se dashmesh surya rajya ka pratik v karak hai, shani ke navmansh men hai tatha shani svayan navmansh kundali men lagnesh hokar shash yog bana raha hai.
8. janmank men lagnesh-panchmesh tatha navmesh-dashmesh ka apas men sanbandh yogkarak hai aur rashish mangal rajya ke karak surya, bhagyesh guru ko v chandrama ko niyantrit kar raha hai. is kundali ke ye mukhya grah hain.
9. dashmansh men svayan mangal uchch hai aur bhagyesh budh ke sath janta ke chaturth bhav men hai. dashmansh men chaturthesh-bhagyesh ka rashi parivartan yog shubhta pradan kar raha hai. is prakar ham kah sakte hain ki jatak ki janm kundali us bij ke saman hoti hai jismen fal v ful ki sari sanbhavnaen hoti hain. atah janm kundali bhi jatak ke naukri, vyavsay anya sroton se jatak ko prapt hone vale dhan, yash aur samriddhi ko darshati hai aur vah kya banega iske sanket deti hai. bas avashyakta hai sahi adhyayan karne ki .