devas -(param jagrat shakti tirtha) navin rahuja 51 shaktipithon ka varnan hamare dharmashastron men hai parantu prachin manyataon ke adhar par aisa praman milta hai ki mata sati ke angon se jo rakt nikla uski kuch bund isi devas parvat par giri usi rakt se man chamunda evan man tulja bhavani ka prakatya mana jata hai. donon mataon ka raktavarn hona hi is katha ki satyata ko pramanit karta hai. madhyapradesh men aitihasik pauranik rishi-muniyon evan yogiyon ki tapasthali nagar devas hai jo man chamunda ki nagri ke rup men prasiddh hai. ek eaisa daivik nagar jahan par man chamunnda sakshat rup men virajman hai aur jaisa nam se hi vidit hota hai devas arthat devi ka vas, jiska uchcharan hi devi ke sakshat rup men nivas hone ka bodh karata hai. malva ki mahkti hui mati ke is devas nagar men man chamunda apni bahan man tulja bhavani ke sath virajman hai.
yah nyayvadi virangna devi ahilya ki bhavya vishalatam nagri indaur evan mahakal evan man harsiddhi ki nagri ujjain se lagabhag 35 kimi. ki duri par agra munbai rajmarg par sthit hai. samudra tal se 620 mi. ki unchai par sthit yah nagar man nivas ki parvatiya sundrta ko apne anchal men sameti hui anupam sundrta ka pratik hai. aisi karunamyi punit nagri ko hamara koti-koti naman. jaisa ki sarva vidit hai ki man chamunda ajanma hai. man chamunda hi rajrajeshvari bhagvti durga ka rup hai. shastron men jo bhi devi shaktiyon ke namon ka ullekh hai ve sabhi nam ek hi parashakti bhagvti ke vibhinn rupon ka nam hain. ek hi mahashakti bhinna-bhinn rupon men anek sthanon par virajman hai. kahin man ka purn rup hai to kahin ang vishesh, jagdanba kahin chaturbhuj rup men virajman hai to kahin ashtabhuja rup men. kahin man durga ke nam se jani jati hain to kahin kali aur jvala ke nam se bhi prasiddh hain.
kashmir men vaishnon devi ke nam se prasiddh hain to mehar men sharda ke nam se puji jati hain. ujjain men man harsiddhi ke nam se pahchani jati hain to munbai men mumba devi ke nam se prasiddh hain. brahmaputra nadi ke tat par kamakhya nam se prasiddh to bansvara (rajasthan) men tripursundri ke rup men puji jati hain. man ke anant rup evan nam hain. shastron ke anusar man bhagvti ke 51 shakti pith mane gaye hain. saikron aise bhi sthan hain jinki mahima shaktipith se kam nahin hai. man chamunda ki apar mahima ka varnan hamare dharm shastron men milta hai. parantu man chamunda devas parvat par kyon aur kaise virajman hain. yah sabhi ke liye jigyasa bhara prashn hai. bhakton ki is manojigyasa ka samadhan ho jaye iska spasht praman dharm shastron men nahin hai. parantu prachin manyataon ke adhar par man ke pragatya ki katha milti hai jo bari rochak evan anokhi hai. jab mata sati ne apne pita daksh prajapti ke yagya men apna evan apne svami bhagvan bholenath ka apman dekha to krodh ke avesh men akar yagya kund men kud pari aur apne pranon ki ahuti de di.
yah dukhad evan hriday vidarak samachar sunakar bhagvan bholenath ne apne yakshon se kaha ki daksh ke yagya ko dhvans kar dalo aur svayan hi sati ke mrit sharir ko apne kandhe par uthakar krodh se kanpte hue vikat nritya karne lage. bhagvan shankar ka yah vinashkari tandav dekhakar triloki kanp uthi. devtaon ko yah abhas hua ki brahm ki srishti ka ant hone vala hai. kyonki bhagvan shankar ki krodhagni ko shant karne ka upay dikhai nahin de raha tha. sabhi devtaon ko bhaybhit dekhakar jagat ke palanakarta bhagvan vishnu ne bhagvan shiv ka krodh kam karne ke liye apne sudarshan chakra se sati ke sharir ko khand-khand kar diya. man sati ke ang jahan-jahan gire vah sthan siddh shaktipith ban gaye. 51 shaktipithon ka varnan hamare dharmashastron men hai parantu prachin manyataon ke adhar par aisa praman milta hai ki mata sati ke angon se jo rakt nikla uski kuch bund isi devas parvat par giri usi rakt se man chamunda evan man tulja bhavani ka prakatya mana jata hai.
donon mataon ka raktavarn hona hi is katha ki satyata ko pramanit karta hai. sarva pratham is parvat par mahakal ki nagri ujjain ke maharaj samrat vikramaditya ke bare bhrata apni patni pingla ke kukarm ke karan grihasth ashram ka tyag kar nath sanpraday men diksha lekar man bhagvti ki aradhna karne ke liye is ekant parvat par aye. ve din-rat man ki aradhna karte aur jab unhen nind ati to kuch samay ke liye shila par hi sir rakhakar vishram kar liya karte the. kabhi-kabhi unhen apni patni pingla ke kukarmon ki yad ati to ve gusse se lal ho jate the. bad men unka hriday parivartit ho gaya aur ve man hi man apni patni pingla ko dhanyavad dene lage ki he ! pingla tu dhanya hai yadi tu mere sath is prakar ka durvyavhar nahin karti to main kaise adhyatmik sukh ko prapt kar pata. main to tere sath keval bhog-vilas men hi lipt rahta. atah tu koti-koti dhanyavad ki patra hai.
bahut samay tak unhonne man ki aradhna ki, man ne unhen sakshat darshan dekar anugrahit kiya. uske kuch samay pashchat hi nagnath baba ka agaman hua jo rajasthan ke rajghrane ke rajkumar the. unhonne nath sanpraday men diksha lekar sadhna hetu is pavitratam sthan ko chuna. ve apne shishyon ke sath is parvat par aye the. ve bahut bare sadhak the. unki sadhna itni prakhar ho gai thi ki man parashakti (chamunda) ne unhen sakshat darshan diye the. iske pashchat maharaja prithviraj chauhan ke raj gharane ke prasiddh kavi chand bardai apne maharaja evan sainik dal ke sath jab raste se nikal rahe the to is parvat ke samip jakar unhonne is pavitratam sthan ko vishram hetu chuna. rat ko sabhi vishram kar rahe the parantu chandrbrdai ka to man se janmon-janmon ka nata tha. man ki prerna se ve tekri par charh gaye aur man ke samip jakar unhonne man ki aradhna ki, man chamunnda ne bhi prasann hokar unhen sakshat darshan diye.
man ke darshan pakar unki ankhon se ashru nikal pare aur ve ro-ro kar man ka badan karne lage. man ne unhen apni bhakti dene ka ashvasan diya. ant men is pavitra evan anupam sthan men nath sanpraday ke mahayogi shri shilnath baba ka agaman hua. ve lanbe kad ke vyakti the aur apne sharir par bahut kam vastra dharan kiye hue rahte the. ve din-rat dhuni lagakar man ki aradhna men lin rahte the. unhonne man chamunda ki bahut samay tak aradhna ki, tab man ne prasannavadan hokar unhen darshan diye or unke jivan ko sarthak kiya. ukt kathaen mahayogi evan shaktipataricharya shri shri 1008 svami vishnutirth maharaj ne apne shishya shri shri 1008 svami shivom tirth maharaj se kahi thi. sadhna shivir sahitya anusar aisa bataya jata hai ki svayan man chamunda ne darshan dekar ukt kathaon ka varnan svamiji ke samaksh kiya tha. dhanya-dhanya devas hai, dhanya dhanya nar nar. man chamunda charan men, pate nishdin pyar॥