surya sulabh drisht, prakashvan v jvalant grah hai. vah jivni shakti, pita, saflta, satta, sona, lal kapra, tanba, urja, svasthya, arogya, aushdhi adi ka karak hai. iska ankhon ki jyoti, sharir ke merudand, tatha pachan kriya par prabhutva hai. surya ke tej ke karan anya grah- chandra, mangal, shani, shukra, brihaspati v budh uske pas ane par ast hokar prabhavhin ho jate hain, parantu rahu v ketu surya ke samip ane par use grahan lagate hain. surya ko grahon ka raja mana gaya hai. vah 24 ghante men bhachakra men 10 pragti kar ek rashi ka gochar 30 din men pura karta hai. surya sinh rashi ka svami hai, mesh men uchch tatha tula rashi men nichasth hota hai. uski vinshottari dasha chah varsh ki hoti hai. surya ke viprit shani grah prakashhin, durbin se drisht aur thanda grah hai. vah alas, dasta, garibi, lanbi bimari aur mrityu ka mukhya karak hai. shani kale til, tel, urad, loha, koyla v kale vastra adi ka karak hai.
bhachakra men shani do rashiyon- makar v kunbh ka svami hai. vah tula rashi men uchch tatha mesh rashi men nichasth hota hai. shani ek rashi ka gochar dhai varsh men pura karta hai. vah kundli men shashth, ashtam aur dvadash (trik) bhavon ka karak hai jo kasht, duahkh aur hani darshate hain. atah use naisargik papi grah ki sangya di gai hai, parantu vah tula, makar, kunbh aur vrish lagnon men shubhkari hota hai. balvan shani jatak ki pragti men purn sahayak hota hai. anya grahon par shani ke dushprabhav se unke karakatva men nyunta ati hai. surya se ast hone par shani adhik kashtakari ban jata hai. hriday ko khun le jane vali nariyon ke sankuchit hone se jatak hriday rog se grast hota hai. shani grah ke bare men hindu dharmik granthon men anek mahatvapurn tathya prapt hote hain. jaise shani surya ke putra hain. inka surya ki patni ki chaya se janm hone ke karan ye krishn varn, kurup tatha pita saman gyani aur balvan grah hain. inki hanikarak drishti se bachne ke lie pita surya dvara janm ke turant bad brahmand men bahut dur fenke jane ke karan yah prakash rahit aur shital grah hai. kundli men ashubh bhav men sthit hone par shani shit-janit aur dirghakalin rog v kasht deta hai.
inka apne pita surya se shatruvat vyavhar hai. shani shivji ke param priya shishya hain. shani ke dharmik, satvik aur nishpaksh acharan se prasann hokar shivji ne inhen sabhi praniyon ke karmafal ka nirnayak banaya tha. vinshottari dasha men shani ko 19 varsh prapt hain. saptam drishti ke atirikt shani ki tisri aur dasvin purn drishti hoti hai. shani jis bhav men sthit hon usmen sthirta tatha drisht grah v bhavon ke karyakal ko hani pahunchate hanai. shani kashtakari hone par shivji tatha hanuman ji ki aradhna labhkari hoti hai. kundli men in do viprit prakriti vale shaktishali grahon ki yuti svabhavtah jatak ka jivan kathinaiyon se bhara aur hatashapurn banati hai. is bare men kuch manad jyotish granthon ka margadarshan is prakar hai:- faldipika (a. 18) ke anusarah ‘surya v shani sath-sath ho to jatak dhatu ke bartan nirman aur vyapar dvara apna nirvah karta hai arthat mehanat se jivan yapan karta hai. saravli (a. 15.7) ke anusar: jatak dhatushilpi hota hai. yah yuti 6, 8, 12 (trik) bhavon men hone par jatak parivarik kleshon se ghira rahta hai. punashch, (a. 31, 22.25) ke anusar: lagn men surya-shani ki yuti hone par jatak ki mata ka charitra sandigdh hota hai. jatak svayan dushcharitra, malin aur dushkarmi hota hai. chaturth bhav men dhan ki kami, rishtedaron se kharab sanbandh aur mata ka sukh kam prapt hoga. saptam bhav men yuti se jatak alsi, mandbuddhi, durbhagi aur nashe ka sevan karta hai tatha pati-patni ke sanbandhon men katuta rahti hai. dasham bhav men yuti hone par jatak videsh men ya svadesh men nimn star ki naukri se dhan kamata hai, aur vah bhi chori chala jata hai jisse jatak dhanhin aur duahkhi rahta hai.
surya-shani ki yuti ke faladesh ka adhyayan darshata hai ki shani ke dushprabhav se yuti vale bhav tatha usse saptam bhav ke faladesh men nyunta ati hai. yah yuti surya ke karakatva pita ki sthiti, unka svasthya tatha jatak ke apne karyakshetra tatha man-samman men kami karti hai. jatak ke apne pita se sanbandh achche nahin rahte. surya ke adhik nirbal hone par pita ka saya jaldi uth jata hai ya jatak apne pita se alag ho jata hai. isi prakar sanbandhiyon se bhi algav hota hai. atah kuch acharya is yuti ko ‘vichchedkari yog’ ki sangya dete hain. lekhak ke sangyan men surya-shani yuti fal darshati kuch kundliyan is prakar hain:- udaharan kundli 1 men lagn men surya tatha shani ki yuti hai. sath men shukra bhi hai. jatak ka vaivahik jivan duahkhi hai. chaturth men rahu-chandra ki yuti se apnon se dhokha mila jisse vah chintit rahta hai. shani apni 10vin drishti se dasham bhav sthit ketu ko dekh raha hai aur ketu ki dvitiya bhav sthit budh aur mangal par drishti hai. jatak ko naukri men santushti nahin hai aur dhan ki kami rahti hai. budh ki dasha 27.11.2013 se chal rahi hai tatha 10-9-2009 se sarhesati bhi chal rahi hai. udaharan kundli 2 men dvitiya bhav men surya, shani v dashmesh budh ki yuti hai. jatak ne bi. tek kiya hai. naukri dhundh raha hai. 2.11.2014 tak shani dhaiyya thi. 3-2-2018 tak budh ki dasha chal rahi hai. parivar men dhan ka sankat hai. chaturth bhav men pirit chandrama ke karan mata bhi bimar rahti hai. jatak ashant rahta hai. udaharan kundli 3 men chaturth bhav men surya, shani, shukra aur guru ki yuti hai. panchmesh mangal shashth bhav men ketu ke sath hai. pancham se ashtam (dvadash bhav) men rahu sthit hai. jatak ka pita lakva se pirit hai.
jatak em. bi. e. pura nahin kar paya. rahu ki dasha 8-11-2001 se chal rahi hai. jatak ka vivah nahin hua hai. udaharan kundli 4 men surya shani lagn se shashth tatha chandrama se ashtam bhav men, dashmesh shukra ashtam bhav men rahu aur shani se drisht hain. jatika v pita ka svasthya kharab hai. jatika ke em. bi. e. ki shiksha men kathinai a rahi hai. pancham bhav papakatrtari yog men hai. panchmesh brihaspati kanya rashi men vakri hai tatha ketu se drisht hai. pita ki arthik sthiti achchi nahin hai. shani dasha 28-4-2011 se chal rahi hai. udaharan kundli 5 men nich navmesh mangal, rahu ke sath pancham bhav men hai. surya, shani aur dashmesh brihaspati saptam men hai. jatak ka jivan kashtapurn hai. usko pet ki bimari hai. pita bhi bimar hai. jatak abhi tak avivahit hai. 29-3-2010 se shani dasha hai tatha 10-9-2009 se sarhesati bhi chal rahi hai. surya-shani yuti janit kashton ko sahnshil banane ke lie age diye gaye upay labhdayak siddh ho sakte hain:- upay 1. surya ko bal dene ke lie jatak ko suryoday se pahle jagakar apne pita ke charan sparsh kar unka ashirvad prapt karna chahie. pita ki umra ke vyaktiyon ka adar karna chahie. 2. snan ke bad ugte surya ko tanbe ke bartan men jal, thora gangajal, roli, khand aur lal ful dalakar ‘un’ adityay namah. ‘un’ bhaskaray namah. ‘un’ suryay namah ka uchcharan karte hue dhire-dhire surya ko aghrya dena chahie. dhyan rakhen ki chinte pair par n paren tatha charhe hue jal se apna tilak karna chahie. uske bad ek mala ‘nun adityay namah’ mantra ka jap karna chahie. 3. pratyek ravivar ko anar farakar surya ko aghrya ke bad bhog arpan karte samay surya mantra ka dhire-dhire jap karna chahie.
kuch anar ke dane prasadasvarup grahan karna chahie. sath hi shani ki shanti ke lie 1. pratyek shanivar sayankal shanidev ka tailabhishek karke kuch tel ko mitti ke dipak men dalakar samipasth pipal ke per ki jar ke pas prajjvalit karna chahie aur ‘un shan shanaishcharay namah’ mantra ka kuch samay jap karna chahie. 2. uske bad mandir ke samne baithe apahij bhikhariyon ko urad dal-chaval ki khichri ya urad dal ke bare yathashakti bantna chahie. dhan ka dan nahin dena chahie. 3. apne naukrane aur safai karmachariyon se achcha vyavhar aur samathrya anusar kabhi-kabhi unki sahayta karte rahna chahie. uprokt upay shraddhapurvak kuch mah karne se jivan men sukh-shanti ka anubhav hona aranbh ho jaega.