jyotishiya drishti se janmang ka saptam, dvitiya, dvadash (purushon ke mamlen men) aur ashtam (striyon ke mamle men) bhav, saptamesh, dvitiyesh, dvadshesh aur ashtamesh tatha vaivahik sukh pradata shukra vaivahik sukh, grihasth sukh se sanbandhit bhav, bhav ke svami grah aur unke karak adi sabhi anukul rahte hon to un dampattiyon ka grihasth jivan evan pati-patni ke sanbandhon ke lie mahatvapurn mane gaye hain. inke alava pancham bhav aur panchmesh evan brihaspati santan ke pratik mane gaye hain.
agar ye sabhi bhav, karak evan grah sudrirh hon tatha bali avastha men hon to vivah evan grihasth jivan sukh, santushti, prasannata aur samman adi se bhara rahta hai. unke madhya atyadhik sneh aur prem bana rahta hai, lekin jab yah bhav, unke svami aur karak pirit aur pratikul dasha men rahte hain, unke upar surya, mangal, shani, dvadshesh, rahu, ketu jaise prithkta evan tyagatmak karkon ka prabhav hota hai to un dampattiyon ka vaivahik jivan larai-jhagre, kalah, santap, dukh, dard, vaimanasyata adi se bhar jata hai aur unmen talak tak ki naubat paida ho jati hai.
vaivahik jivan men ane vale is prakar ke utar-charhav ko kuch janmangon ke madhyam se spasht karne ka prayas kiya ja raha hai - udaharan kundli-1 dhanu lagn ka yah janmang ek bahut hi abhagini nari ka hai. is nari ne apne vaivahik jivan men 29 varsh keval kasht hi kasht jhele. ise n to pati ka sukh mila aur n hi pati se talak hi mil paya. yah n to apne bachchon ko sath rakh saki aur n hi ise apne sasural ka sukh hi prapt ho paya. yahan tak ki yah pichle 23 varshon se apne bare putra se ek bar bhi nahin mil payi hai.
nari pichle 23 varshon se apne mayke men rahakar apna jivan vyatit kar rahi hai. inke janmang men saptam bhav men mangal ki upasthiti mangli dosh ki rachna kar rahi hai. saptam bhavasth mangal jivnsathi ke svasthya ko kshati pahunchane ke sath-sath dampatya jivan men kalah aur vyapar men nirantar uthl-puthal machaye rakhne ke lie jimmedar mana jata hai. yah dhan hani kutumbiyon men kalah aur unmen charitrik giravat ki sthiti tak paida karte dekha gaya hai. agar saptam bhav men mangal ko mithun ya kark rashi ka yog mil jae, to yah mangal jatak ko durachari se lekar vyabhichari tak bana dalta hai.
iske alava saptam bhav men panchmesh mangal ke sath ketu sthit hai tatha lagn bhav men rahu bhi baitha hai. saptam bhav men svagrihi budh bhadrayog bana raha hai. panchmesh aur saptamesh ke yog se sva-varan vivah ka yog bana lekin vivah ke uprant shighra kalah ka sanket bhi de raha hai. surya ki shashth bhav men sthiti bhi dampatya jivan ke lie shubh nahin hai. saptamesh budh saptam bhav men hai.
chandrama lagn se saptam bhav par uchch ke brihaspati aur chandrama ki shubh drishti par rahi hai. brihaspati ki uchch drishti kutumb bhav par bhi hai, atah saptam bhav aur saptamesh budh vivah badha se mukt hai. chandrama se saptam bhav men koi grah sthit nahin hai. yadyapi chandra lagn se bhi saptam bhav par mangal ka ashubh prabhav par raha hai. vivah karak shukra aur pati karak brihaspati bhi is janmang men uttam sthiti men hain, atah is janmang se ek ek tarah shighra vivah ka sanket hai, to dusri taraf kuch ashubh yogon ke karan grihasth sukh men badha ka sanket bhi hai.
javivah 20 varsh ki ayu men saptamesh budh ki mahadsha men bina kisi pareshani ke sanpann ho gaya. budh ki mahadsha men hi ise do putron ki prapti bhi hui kintu saptam bhav aur kutunb bhav par dvadshesh mangal ki ashubh drishti, shukra, saptam bhav evan saptamesh par rahu ke prabhav tatha lagn se ashtam bhav men sukhesh brihaspati ki sthiti evan un par papamay shani ki drishti ne jatika ko pati evan grihasth sukh se sadaiv vanchit hi banae rakha. parinam yah hua ki is jatika ko sasural aur mayke, donon men se kisi bhi sthan par parivar ka sukh bhi nasib n ho paya. iske atirikt saptam bhav men pap grah ashubh yog banakar baitha hai.
chandrama aur shukra par bhi pap grah shani ki drishti hai. shashthesh shashth bhav se barhven bhav men sthit hai. ye sabhi yog pati ka charitra patan karne ke karan ban rahe hain. janmang men in yogon ke karan pati ka dusri striyon ke sath anaitik sanbandh bana aur usne apne se kam umra ki striyon ko rakhail banakar apne pas rakha. isi prakar shashthesh aur ashtamesh par shani ki drishti, dvitiya aur saptam bhav par mangal ka prabhav nishchit hi vivah vichched ka yog bana raha hai. is yog ne sadaiv is jatika ko pira pahunchayi. jatika ko disanbar, 1990 se ketu ki mahadsha shuru hui. kintu janmang men saptamesh budh ke sath saptam bhav men hi sthit hai.
atah isi dasha ke shuruat se hi pati-patni ke madhya, ghrina kalah aur larai, jhagre ne ganbhir rup dharan karna shuru kiya. kuch samay men hi inki nafarat is had tak barh gayi ki inka ek sath rah pana mushkil ho gaya. 1991 se jatika apne chote bete ke sath apne mayke men a gayi. disanbar 1997 se ise shukra ki dasha shuru hui aur dhanu lagn ke lie shukra, ashubh grah ki bhumika nibhata hai. atah shukra ne inke madhya sadaiv prem ki jagah avishvas aur ghrina ko hi barhava diya. shukra ki mahadsha men surya ki antardasha lagte hi inmen talak ka mukadma shuru ho gaya.
surya jatika ke shashth bhav men sthit hai aur mahadsha svami shukra ka bhi ghor shatru hai atah inmen talak ka mukdma hua aur antatah donon ka talak bhi ho gaya. udaharan kundli-2 yah janmang ek aisi stri ka hai, jiska vivah 27 varsh ki ayu men ek sanpann parivar men hua kintu vivah ke tatkal bad hi use kai tarah ki pareshaniyon ka samna karna para. vivah ke kuch samay bad hi pati-patni ke bich avishvas ghirne laga aur sthitiyan is kadar bigar gayin ki inka ek sath rah pana mushkil ho gaya, parinamasvarup sat mahine bad is jatika ne apne pati ke ghar ko tyag diya aur apne pita ke ghar chali gai aur fir vapis nahin lauti aur anttah inke madhya talak ke bad hi shanti ho saki. jatika ke janm chakra men mangal chaturth bhav men sthit hokar mangli dosh utpann kar raha hai, chaturth bhavasth mangal yadyapi grih, bhumi, khet, khalihan jaisi achal sampatiyon ke lie anukul raha hai.
parantu chaturth mangal ki yah sthiti grihasth sukh ke lie kadapi anukul nahin mani ja sakti. yadyapi saptamesh ke rup men mangal ki saptam bhav par svagrihi drishti vivah sanpann karane, vyapar aur naukri adi ke lie kuch had tak anukul mani ja rahi hai, kintu saptamesh ke rup men is mangal par aur saptam bhav par papi shani ki bhi krur drishti hai, saptam bhav par mangal shani ke atirikt ashtamesh brihaspati evan rahu ki bhi drishti hai, atah is jatika ke vivah men kuch pareshaniyan to avashya ayin aur do bar sagai hokar bhi tut gayi, par brihaspati ki drishti evan svagrihi mangal ke prabhav se anek badhaon ko par karke sanpann parivar men jatika ka vivah sanpann kara diya.
vivah karak shukra is janmang men apni uchch rashi ka hokar ekadash bhav men surya aur budh ke sath sthit hai aur us par mangal ki ashtam drishti bhi hai. surya ke sath shukra ast hai. atah uchch ka shukra hone ke bavjud yah samanya hi bana hua hai. pati karak brihaspati yadyapi lagn bhav men sthit hai, lekin us par rahu ke atirikt shani ka kendriya prabhav aur surya ka rashi prabhav par raha hai. yahan rahu,, surya aur shani adi brihaspati par prithkta janak prabhav dal rahe hain. itna hi nahin brihaspati vrishabh rashi men shunya ansh aur 42 kala lekar uday ho raha hai. in sabne pati karak brihaspati ko is janmang men lagabhag balhin hi bana diya hai.
yadyapi saptamesh par brihaspati ki shubh drishti vivah karane men saksham hai. is jatika ka vivah chandrama ki mahadsha lagte hi mangal ki antardasha ke dauran 27 varsh ki ayu men sanpann hua. lekin chandra ke madhya rahu ki antardasha lagte hi inke madhya vaimanasya panpne laga. vivah ke keval sat mah bad yah jatika apne pati ko chor mayke chali gai aur rahu bhukti ke lagabhag ant men sitanbar 1994 men in donon ka talak ho gaya. udaharan kanudli-3 is janmang men bhi ashtam bhav men mangal, shani, rahu ki sthiti ke karan prabal manglik dosh bana hua hai.
iske atirikt janmang men bhagyesh mangal lagn se ashtam bhav men tatha navam se dvadash bhav men sthit hokar jatak ke bhagya, sukh, grihasth jivan adi men avnti hone ka sanket de raha hai. shashth bhav men shatru kshetri surya aur ashtam bhav men shani, mangal, rahu ke karan saptam bhav evan dvitiyesh (kutamb bhav ka svami) budh par papakartari yog bana hua hai. inka viprit prabhav lagn se dvitiya aur dvadash bhavon par bhi hai. atah saptam aur lagn ke sath-sath dvadash aur dvitiya bhav par bhi bura prabhav par raha hai, svayan lagnesh surya bhi shashth bhav men sthit hai.
in sabhi par kisi tarah ka koi shubh prabhav nahin hai. islie is jatak ko sharirik svasthya ke sath-sath patni ka sukh, grihasth ka sukh aur parivar ka sukh bhi bahut kam hi nasib hua. yadyapi saptam bhav men budh ki sthiti, us par panchmesh brihaspati ki shubh drishti, vivah karak shukra ki pancham bhav men sthiti aur us par chandra ke sath brihaspati ki pancham drishti ne tamam badhaon ke bavjud 25 varsh ki ayu men hi jatak ka vivah sanpann to karva diya, lekin jatak papi grahon ke viprit prabhavon se bachne men saksham nahin ho paya. ashubh grahon ne apna prabhav diya aur jatak ko vaivahik sukh prapt nahin hone diya.
in bure grahon ke prabhav se uski apni patni se pat nahin payi. patni ke sath vaicharik matbhed bane rahne se unmen nirantar anaban rahne lagi aur anttah un donon ne 5 varsh ke vaivahik jivan ke bad ek-dusre se alag hone ka nishyay kar liya. is prakar talak ke rup men unke grihasth jivan ka ant ho gaya. 1988 men unka talak sanpann hua. us samay jatak ko shani ki mahadsha men budh ki antardasha chal rahi thi. shani janmang men shashth bhav ka svami hai aur budh kutumb bhav ka svami hokar saptam bhav men sthit hai.
budh ki rashi men kalah karak ketu bhi sthit hai. is janmang men kemduram namak ashubh yog bhi nirmit ho raha hai is yog ke karan bhi jatak sadaiv putra evan stri sukh se vanchit, sanbandhiyon se duahkhi aur bevajah idhr-udhar bhraman karta raha. is janmang men ek se adhik vivah ki sanbhavna bhi bani hui hai. agar iske janmangon ka milan thik se kiya jata to sanbhvtah ise bhi vaivahik sukh mil sakta tha.