hamare shastron men anek prakar ke yantron ka ullekh hai jaise mangal yantra, vijay yantra, chaintis yantra adi. parantu sanpurn yantra vigyan evan shastra men keval ‘shri’ yantra ko hi sarvopri evan mahatvapurn sthan prapt hai. sanpurn yantra vigyan evan hamare shastron men keval shriyantra ko hi sarvasiddhidata, dhandata tatha ‘shri’ data arthat lakshmi dene vala kaha gaya hai. shri yantra lakshmi ji ka sarvadhik priya yantra hai. hamare shastron men bhi shriyantra ko sabhi yantron men sarvashreshth kaha gaya hai. lakshmi ji svayan kahti hain ki shriyantra to mera adhar hai, ismen meri atma tatha svayan main vas karti hun. vastavikta men iske prabhav se daridrata vyakti ke pas bhi nahin fatkti.
lakshmi ji ko yah yantra kitna priya hai tatha iski chamatkari mahima ka ham hamare shastron men ullekh is satya katha dvara bhi samajh sakte hain- ek bar man lakshmi ji kisi karan se aprasann hokar baikunth dham chali gai thi. isse prithvi par vibhinn prakar ki samasyaen prakat ho gain. brahman, vaishya adi sabhi log lakshmi ke abhav men din-hin aur ashay hokar idhr-udhar mare-mare ghumne lage. tab brahmanon men shreshth vashishth ne nishchay kiya ki main lakshmi ji ko prasann kar is prithvi par launga. vashishth tatkal jakar baikunth men lakshmi ji se mile to unhen gyat hua ki mamtamyi man lakshmi aprasann hain tatha kisi bhi sthiti men bhutal par ane ko taiyar nahin hain. tab vashishth vahan baithakar bhagvan shri vishnu ji ki aradhna karne lage. jab bhagvan shri vishnu prasann hokar prakat hue to vashishth ne kaha-‘‘he prabho! lakshmi ke abhav men ham sabhi prithvi vasi pirit hain.
ashram ujar gaye hain. sabhi varg ke log dukhi hain. sara vyavsay tahs-nahas ho gaya, mukh murjha gaye hain, asha-nirasha men badal chuki hai tatha jivan ke prati utsah aur umang samapt ho gaya hai.’’ shri vishnu turant vashishth ko sath lekar lakshmi ke pas gaye aur unhen manane lage, parantu lakshmi ruthi hi rahin aur aprasann rup men drirhtapurvak kaha- ‘‘main kisi bhi sthiti men prithvi par jane ke lie taiyar nahin hun.’’ udas man aur khinn avastha men vashishth punah prithvi lok men laut aye aur lakshmi ji ke nirnay se sabko avagat kara diya. sabhi kinkartavyavimurh the ki ab kya kiya jae? tab devtaon ke guru brihaspati ji ne kaha ki ab to matra ek hi upay hai aur vah hai ‘‘shriyantra’’ ki sadhna.
yadi shri yantra ko sthapit kar pran-pratishtha kar puja ki jae to lakshmi ko avashya hi ana parega. guru brihaspati ki bat se rishi-maharshiyon ke man men anand vyapt ho gaya aur unhonne brihaspati ke nirdeshan men shriyantra ka nirman kiya aur use mantra siddh evan pran-pratishtha kar dipavli se do din purva arthat dhan teras ko sthapit kar shodshopchar se pujan kiya. puja samapt hote hi lakshmi vahan upasthit ho gai aur kaha ki main kisi bhi sthiti men yahan ane ke lie taiyar nahin thi parantu apne jo prayog kiya usse mujhe ana hi para. lakshmi ji ne svayan kaha- ‘‘shriyantra hi to mera adhar hai aur ismen svayan main tatha meri atma vas karti hai.’’ shriyantra ki rachna bhi bahut anokhi hai. panch trikon ke niche ke bhag ke upar char trikon jinka upri bhag niche ki taraf hai, is sanyojan se 43 trikon bante hain. in 43 trikonon ko gherte hue do kamal dal hain.
pahla kamal asht dal ka hai aur dusra bahri kamal shodash dal ka hai. in do kamal dal ke bahar tin vrit hain aur uske bahar hain tin chairas jinhen bhupur kahte hain. sanpurn yantra vigyan evan hamare shastron men keval shriyantra ko hi sarvasiddhidata, dhandata tatha ‘shri’ data arthat lakshmi dene vala kaha gaya hai. shriyantra sthapit karke lakshmi ko apne jivan men sthai rup se sthapit kijie.