shastron men sena ke vyavsay ka sanbandh kshatra dharm se hai. is dharm ko bhagavadgita men is prakar paribhashit kiya gaya hai- shauryan tejo dhritirdakshayan yuddechapyaplayanam . danmishvarbhavashch kshatran karm svabhavajam.. yah sabhi gun paranpragat rup se mangal grah se jure hote hain. mangal shakti, parakram, sahas v shaurya ka pratik hai. sena vibhag men utkrishtata siddh karne ke lie sahas sabse bari sampada hai. mangal pradhan vyakti apni pratibha ko pratyek aisi jagah par asani se siddh kar leta hai jahan virta hi shreshthata ka mapadand ho. jyotish men guru, shukra ko brahman, mangal, surya ko kshatriya, chandra, budh ko vaishya aur shani ko shudra mana gaya hai. senanayak banne ke lie kshatriya bal (parakram, shakti, shaurya v bahu bal) ke karak mangal ka bal sarvadhik mahatvapurn v avashyak hai.
islie sena vibhag men saflta ke lie janmakundli men mangal ke bal ki naptaul karni hogi. yadi mangal mesh, sinh, vrishchik ya makar rashi men sthit ho to bali samjha jata hai. mesh rashi ka mangal chamkdar v sundar vyaktitva ka dhani to banata hi hai sath hi jatak ko hamesha hi urjavan, sakriya, karmashil, nirbhik, khatra uthane ki kshamata se yukt v garmajoshi vala banae rakhta hai. aise mangal jatak ko aise karya karne ki prerna deta hai jinke bare men anya log soch bhi nahin sakte. aise jatak maulik, sadhan sampann, chatur, yantrik karya karne ki yogyata vale v adhik sahsi hote hain.
aise jatkon men atyadhik utsah hota hai aur unhen khelon tatha manspeshiyon ke vyayam men vishesh anand ata hai. sinh rashi ka mangal jatak ko rajsi pravriti v sahas se bhar deta hai. aisa jatak svabhavik rup se netritva shakti sampann v viprit paristhitiyon se nibtne ki kshamataon se yukt hote hain. aise jatak nirbhik, mehnti v man-samman ke prati sajag tatha jimmedariyon ko samjhne v nibhane vale hote hain. aisa mangal jatak ko sharirik urja v shakti sampann banata hai. vrishchik rashi ka mangal jatak ko jasusi svabhav vala banata hai.
makar rashi ke mangal se jatak men jabardast atmabal tatha kisi bhi paristhiti se larne ki kshamata v svayan ko paristhitijanya halat men dhalne ki yogyata deta hai. is prakar ki yogyataen sainik banne ke lie nitant avashyak hoti hain. yadi mangal kundli ke pratham, tritiya, shashth ya dasham bhav men uprokt rashiyon men baithakar sanbandh banae to sena vibhag men avashya saflta dega. kundli men lagn se sharirik shakti, tisre bhav se parakram v dasham bhav ko rajkripa ka karak bhav mana jata hai. islie is prakar ke kariyar ke lie lagn, tritiya v dasham bhav bali hona avashyak hai.
jahan tisre bhav se larne-bhirne ki shakti v turant nirnay lene ki shakti ka vichar kiya jata hai vahin chathe bhav se turant nirnay lekar shatru par tut parne ki kshamata v vijyi hone ke samathrya ke bare men vichar kiya jata hai. budh bauddhik kshamata, guru gyan v prashasnik yogyata tatha surya man-samman v rajkripa ka karak hai to in grahon ke uttamoÿam yog bali mangal vale jatak ko sadharan sainik ki apeksha ek safal sainik adhikari bana denge. yadi mangal v shani ka dasham bhav/dshmesh se sanbandh ho to jatak sena vibhag men naukri karta hai. bali guru aur mangal ka yog pulis vibhag men adhikari banne ke lie uÿam mana gaya hai. bali budh, guru aur mangal ke prabhav se ai.e.es. adhikari banne ka bara yog banega. surya rajkripa ka karak hai
islie yadi uprokt yogon ka dashamasth surya se shreshth sanbandh bane to jatak uchch sarkari padon par shighrata se unnati v promoshan adi prapt karta hai. yadi ashtamasth mangal bali ho to jasusi yogyata hone se jatil mamlon ko suljhane men saflta milti hai. islie jatak ko sikret sarvis, si.bi.ai. ya ami ke aise vibhag men saflta prapt karte hue dekha gaya hai jahan is prakar ki yogyata ki avashyakta hoti hai. surya, mangal v shani ke sanbandh ko bhi sukshmata se samjha jana chahie kyonki in grahon par pap grahon ka prabhav rahne ya inke shatrurashigat rahne se jatak apne parakram v shakti ko sarkar ke viruddh prayog karta hai. mangal v shani ke atirikt rahu-ketu ka mahattva bhi kam nahin hai. rahu shanivat v ketu mangalavat hota hai.
islie uprokt yogayog men inka vichar karna bhi atyant mahatvapurn hota hai. parantu rahu-ketu chaya grah hain islie ye gupt prakar ke vyavsayon men saflta ke karak mane gaye hain jaise andarakavar ejent (khufiya ejent), jasus, andrhaind dilings, sikret aepreshan ya gorilla yuddh adi. rahu, ketu nich v pirit adi avastha men nahin hone chahie anyatha jatak bhay v bhram ka shikar hoga v is prakar ke karya ka kushltapurvak sanpadan nahin kar sakega jahan atmavishvas v sahas ki adhik avashyakta hoti hai.
fyuchar paeint men 500 se adhik kundliyon par kie gaye ek anusandhan ke anusar sena men karyarat jatkon ki kundliyon ke bare men nimn nishkarsh nikale gaye- surya adhikatar kundliyon men dasham bhav men paya gaya tatha chaithe v panchvane men nahin paya gaya. isi prakar budh navam, dasham v ekadash bhav men dekha gaya jabki chaithe, panchvane men nahin tha. shukra adhikatar ashtam, navam, dasham, ekadash v dvadash bhav men tha v chaithe, panchven, chathe v satven bhav men nahin tha. mangal dasham bhav men adhik paya gaya. shani bhi dasham bhav men adhik hota hai. surya adhikatar dasham men v mangal surya se dasham bhav men adhik paya gaya. yadi surya pancham bhav men ho to mangal surya se tritiya v pancham arthat lagn se saptam ya navam bhav men hota hai.
yadi surya chathe bhav men ho to mangal dasham ya ekadash bhav men paya gaya. agar surya pancham men hai to chandrama surya se navam ya dasham men hoga. surya adrra nakshatra men, shani vishakha, v guru shravan nakshatra men adhik paya gaya. surya mithun rashi men, shani vrishchik, mangal mesh v vrishchik rashi men tatha rahu vrish rashi men adhik paya gaya. is prakar kah sakte hain
ki mangal, shani, surya, rahu, ketu tatha lagn, tritiya, chathe v dasham bhav ka shubh hona sena v pulis vibhag men saflta ke lie avashyak hai. rashiyon men agni tatva rashiyan mesh, sinh aur dhanu ka bal mahatvapurn hai. yadi dashmesh ka agni tatva rashiyan aur surya, mangal se sanbandh ho to yah sena men safal kariyar deta hai.