jyotish dvara vyavsay ka nirdharan karna v jatak kis vyavsay se dhan arjit karega iske lie jyotish ke vibhinn siddhanton v niyamon ko dhyan men rakhakar nirnay liya jata hai jo desh, kal, paristhiti v patra par nirbhar karta hai. is lekh men mukhya rup se ve kaun-kaun se jyotishiya bindu hain jo vyavsay nirdharan ko prabhavit karte hain unka varnan kiya gaya hai. yah lekh un sabhi ke lie labhdayak hai jo jyotish sikh rahe hain aur jo jyotish jante hain
unke lie yah lekh ek punrabhyas ka karya karega aur unhen kariyar ke kshetra men faladesh karne men sahayak siddh hoga. jyotish ke madhyam se yah anuman lagana ki jatak kis prakar se dhan v ajivika arjan karega ati mahatvapurn hota hai. sarvapratham dekhen ki lagn athva chandra se dasham bhav men kaun sa grah sthit hai. yadi dasham bhav men surya ho to paitrik sanpatti prapt hogi. chandrama ke dashamasth hone par mata se dhan ki prapti hogi. mangal ke dashamasth hone par shatruon se dhan prapt hota hai, budh ke dasham bhav men hone se mitron se, guru ke dashamasth hone se bhaiyon se tatha shukra ke dashamasth hone par striyon se v shani ke dashamasth hone se jatak ke lie naukar chakar arthat vyavsayik sanstha ke karmachari dhan kamakar dete hain.
kuch vidvanon ke matanusar sarvapratham yah nirnay karenge ki lagn v chandra men se kaun bali hai aur jo bali ho usse dasham bhav men baithe grah dvara dhan ke srot ka pata chalega. yadi dasham bhav men do ya adhik grah hon to in grahon ki dasha/ antardasha men ye grah jin vastuon ke karak hote hain unke dvara dhan ata hai. yadi dasham men koi grah n ho to surya se dashamasth grah se ajivika vichar karen. yadi yahan bhi koi grah n ho to dashmesh ke navanshesh se dhanagaman ka vichar karen.
- yadi dashmesh ka navanshesh surya ho to sugandhit padarth, itra, sona, un v davaiyon ke vyapar se dhan labh hota hai.
- yadi dashmesh ka navanshesh chandrama ho to mani, mukta, ratn, krishi utpad ya mahila ke ashram se dhan labh hota hai.
- dashmesh ka navanshesh mangal ho to use minaral, ispat, kampaund shastron, agni sanbandhi karyon se, patakhon se, ya rasoi athva injan parichalan adi agni karya se sanbandhit sthal, sahsik karyon se, sharirik kshamata sanbandhi karyon se dhan labh ho.
- yadi dashmesh ka navanshesh budh ho to lekhak, maikenik, pentar, murtikar, shilpakar, kavi, ganitagya, arkitekt ya itra adi se dhan labh hota hai.
- yadi dashmesh ka navanshesh guru ho to brahman, dharm guru, parhe likhe buddhijivi log, mandir, jan kalyankarya, main, aepreshan, mainyufaikcharing, anushasnshilta v tirth yatra adi se dhan labh hota hai.
- jab dashmesh ka navanshesh shukra ho to ratn, dhatu, gay, bhains adi se.
- jab dashmesh ka navanshesh shani ho to majduri karya, bojha uthane, jallad ka karya karne athva aise tuchch karyon ke karne se dhanarjan hota hai jo parivar ki paranpraon ke viprit hote hain. uprokt dhanapradayak grah jis tarah ki sthiti men baitha hota hai vaise hi prakar ka dhan srot deta hai jaise yadi yah svagrihi hai to jatak ko apne hi ghar se dhan prapt hota hai.
shatru rashi men sthit hone ki sthiti men shatru se dhan prapti hoti hai. yadi yah grah surya ho v uchcharashisth ya anyatha bali ho to svayan ke prayason se dhan prapt karta hai kyonki surya mangal ki rashi mesh men uchcharashisth hota hai. yadi sabhi shubh grah bali hokar lagn, dvitiya ka ekadash bhavasth ho to jatak vibhinn sroton se dhan kamata hai. aisa jatak jis kisi bhi vyapar men hath dalega nishchit rup se dhan labh prapt karne men safal hoga.
ek prachin lekhak ke matanusar yadi guru dashamasth ho to jatak jan kalyan ke karyon se jurakar kirti labh karta hai aur yadi shani dashamasth ho to garib v dabe kuchle varg ke logon ke lie karya karke man samman kamata hai. adhik satik vishleshan karne ke lie yah dekhna chahie ki arurh lagn se dasham v karkansh lagn se dasham bhav men kaun sa grah sthit hai aur vahan par kiski drishti hai. rishi jaimini ke matanusar yadi karkansh se dasham bhav men budh ko chorakar koi anya shubh grah sthit ho to aisa jatak iradon ka pakka hota hai ya ek aisa dharm guru banta hai jo anya logon ke vivadon ko niptata hai.
yadi karkansh se dasham bhav par keval surya ya guru ki drishti ho to aisa jatak gareriya ho sakta hai athva milk prodakts ka vitaran karta hai. yadi karkansh se chathe bhav men do pap grah sthit hon to jatak krishi karyon se labh uthata hai. yadi guru karkansh lagn se navam bhav men ho to bhi jatak krishi karyon se labh uthata hai. yadi surya v shukra donon karkansh lagan ko dekhen to aisa jatak sarkari naukri se labh prapt karta hai athva sarkar se uske achche sanbandh hote hain.
yadi karkansh lagn se dasham bhav ko budh dekhe athva vahan sthit ho to jatak sarkari naukri karega. yadi shani karkansh lagn men sthit ho to jatak kisi prasiddh vyavsay se jurakar ajivikarjan karega. yadi karkansh lagn ka ketu keval shukra grah se drisht hoga to jatak dharmopdeshak hoga. yadi karkansh lagn budh, chandra v shukra se drisht ho tatha dvitiyesh saptamasth ho to jatak daektar hota hai. yadi karkansh lagn men surya v rahu hon aur ye surya v rahu se sanyukt hon to jatak daektar ya vaidya hoga jo vish ka ilaj karne men kushal hota hai.
yadi karkansh lagn par shukra v chandrama ki drishti ho to jatak rasaynshastri hota hai. kariyar ke kshetra men shighra unnati prapt karne hetu janmakundli men bali grah yogon ka hona avashyak hai.
- yadi lagnesh, dhanesh v labhesh bali hokar kendra sthan men sthit hon tatha inmen se ek grah uchch rashisth ho to aisa jatak atyadhik dhanadhya vyakti banta hai.
- yadi lagnesh lagn bhav men hi sthit ho to jatak jivan bhar lakshmi kripa prapt karta rahta hai.
- yadi dvitiyesh, bhagyesh v labhesh sabhi grah kendra sthanon men sthit hon.
- yadi dvitiyesh uchcharashisth ho tatha dvitiya bhav men anek grah sthit hon .
- yadi dvitiyesh v lagnesh men sthan parivartan yog ho.
- yadi lagnesh, dvitiyesh, bhagyesh v labhesh sabhi uchcharashisth hon.
- yadi mesh ya vrishchik lagn ho v mangal, shukra, budh v shani sabhi lagn bhav men sthit hon.
- yadi dhanu ya min lagn ho tatha guru, chandra v mangal sabhi lagn bhav men hon.
- yadi mangal, shukra shani v rahu men sabhi kanyarashisth hon.
- yadi dvitiyesh bali ho v guru, chandra v surya kramshah pancham, navam v tritiya bhav men sthit hon.
- yadi mangal svarashisth, mulatrikon rashi ya uchcharashisth hokar kendrasth ho.
- yadi sabhi grah pratham, dvitiya, pancham, saptam, ashtam, dasham v ekadash bhav men sthit hon. adhunik kal men vibhinn grah nimnankit vyavsayon ke karak mane jate hain-
- surya prashasan, sarkar v medikal profeshan ka karak hota hai.
- chandrama haespitailiti v pablik rileshan ka karak hai.
- mangal sena, pulis v udyog se jure vyavsayon ka karak hai.
- budh vittaprabandhan, strakcharal dijaining, lekhan karya v jyotish ka karak hai.
- guru shiksha, kanun, paramarshadata, adhyatmikta v vitt prabandhan se jure vyavsayon se jorta hai.
- shukra telivijan, film udyog, paryatan, laif seving drags, sangit, nritya v lagjuriyas aitam ke vyapar adi vyavsayon se jorta hai.
shani udyog, naukri, shram karya, netagiri, rajniti v kutnitik karyon se jorta hai. janmakundli keval itna sanket deti hai ki jatak kis vyavsay se jurega. kariyar men tarakki ke lie jatak ke dashakram ka adhyayan karna hoga. kariyar men unnati ki sima janne ke vibhinn sutra hote hain. dasham bhav ka bal vyavsayik kshetra ki unnati men sarvadhik mahatvapurn bhumika nibhata hai.
yadyapi navam bhav ka adhyayan bhi avashyak hai kyonki jatak ke bhagya ko janne ke lie navam bhav ka mahatva adhik hai aur jatak ki pratishtha ke star ka anuman dvitiya bhav se lagaya jaega. dashmansh kundli vyavsay men bari saflta ki karak kundli hoti hai. dashmansh kundli men janmakundli ke dashmesh ke bal ki janch avashya karni chahie.
kariyar men unnati ki dashaen-
1. janmakundli ke dashmesh ki dasha.
2. dashmesh jis bhav men baitha us bhav ke svami grah ki dasha
3. dashmansh kundli ke lagnesh ki dasha.
4. dashmansh kundli ke lagn v dasham bhav men baithe grah ki dasha.
5. us grah ki dasha jo dashmansh men uchcharashisth ho.
6. dasham bhav v dashmesh par drishti dalne vale grah ki dasha, dashmesh se yukt grah ya dashamasth grah ki dasha. dasham bhav ka svami jahan baitha hai us bhav ke svami ke sath baithe ya drishti dalne vale grah ki dasha.
7. saptamesh ki dasha mahatvapurn gochr-- guru v shani ka sanyukt gochriya prabhav, drishti ya upasthiti lagn ya chandrama se nimn bhavon ya grahon par parta ho-
1. dasham bhav
2. dashmesh
3. saptam bhav
4. saptamesh yadi uprokt char men se do par prabhav pare to nishchit rup se padonnati ka sanket mana jae.