britni spiyars  

britni spiyars pan. sharad tripathi amerika ke kentvud kasbe men rahne vale jaimi spiyars aur unki patni lin ne kabhi sapne men nahin socha tha ki unke ghar janm lene vali ek sadharan larki ek din puri duniya men paep star ke rup men jani jaegi. 2 disanbar 1981 ko jis larki ka janm jaimi spiyars ke ghar hua vah age chalakar britni spiyars ke rup men prasiddh hui. kentvud men us samay matra 1000 (ek hajar) ki abadi thi. spiyars danpti yah dekhakar hairan the ki jab britni ne chalna bhi nahin shuru kiya tha tabhi se vah gane lagi thi. barhti umra ke sath-sath uski avaj nikhrne lagi. shuruati daur men britni ki man ko uska gana akhrta tha. unhen lagta tha ki vah apni sakaratmak urja ko yun hi barbad kar rahi hai. jivan ka pahla sarvajnik manch use kentvud ke charch men mila. charch men ae hue jan samuh ke samne britni ne anek git gae. use kai puraskar bhi mile, parantu dhire-dhire vah sthaniya pradarshanon se ub gai. us samay miki maus klab ka aedishan chal raha tha. ath varsh ki britni ne man se vahan jane ki jid ki. yah 50 ke dashak ka purana klab tha. iske lie atlanta tak jana un dinon bari bat thi. fir bhi uski man lin use vahan le gai, lekin vahan use kharij kar diya gaya, kyonki uski umra bahut kam thi. vaise uski pratibha ko dekhakar us karyakram ke prodyusar ne nyuyark ke ek ejent se uski sifarish kar di. fir britni ko mainahattan men nritya, sangit aur dusri kalaon ko sikhne ka mauka mila. isi dauran usne bradve ke ‘ruthles’ namak ek natak men hatyari bachchi ki bhumika bhi nibhai. ab tak vah das varsh ki ho chuki thi. usne ‘star sarcha’ namak ameriki ti. vi. program men hissa liya aur vijeta bhi bani. usne ek grup men bhi kam kiya, par do varsh men hi vah grup bikhar gaya. bad men britni ke lairi rudolf namak ek shubhchintak ne use myujik indastri men a rahe badlav ke bare men samjhaya. paep sangit vapas a raha tha aur uske jaisi akeli larki ke lie koi skop nahin tha. usne ‘ai haiv nathing’ namak git gaya aur hnitni hastan ne use laiv rikard ke lie sain kar liya aur vah paep sangit ke guru maiks martin ke sath rikarding karvane svidan pahanuch gai. aie, ab jyetishiya vishleshan karte hain. paep star ka matalab hota hai tej gati aur purn urja ke sath gana gana. sinh lagn ki kundli men urja ka sabse bara karak grah mangal lagn men sthit hai. gayan kala ka sabse bara grah budh chaturth bhav men mangal ki rashi men lagnesh surya ke sath sthit hai, jis par mangal ki purn drishti hai arthat sur-sangit ka pratinidhitva karne vale dvitiya bhav ke svami budh par dvitiya bhav men sthit shani ki tisri drishti par rahi hai. kul milakar mangal, surya, budh aur shani ka yah anutha yog is jatka ko tej gati aur urja se purn lanbe samay tak tan khinchne (shani ke karn) vale svar ki svamini bana raha hai jo ek safal paep star banne ke lie ati avashyak hai. britni ke janm ke samay chandra ki bhogya mahadsha 3 varsh 9 mah shesh thi. chandra is kundli men vyayesh hai aur chathe bhav men sthit hai, islie apni is alp avdhi men usne koi madad nahin ki. iske atirikt sharirik pareshani bhi di. mangal is kundli men bhagyesh aur sukhesh hai aur surya ke nakshatra men sthit hai. san 1985 men britni ki 4 varsh ki umra men apni mahadsha shuru hote hi mangal ne uske jivan ko naya mor dena shuru kar diya. 1991 men mangal men shukra ka antar chal raha tha. dashmesh shukra ki isi dasha men britni ne natkon ke madhyam se dhanarjan shuru kiya. san 1996-97 men, jab britni 15 sal ki thi, uska pahla rikard aur 16 varsh ki umra men nanbar van elabam aya. in donon ne bilvord chart ke sare rikard tor die. britni ke pahle elabam ne amerika, kanada, briten, jarmani, svidan, taivan aur frans ke atirikt kai anya deshon men tahlka macha diya. ‘bebi van mor taim’ britni ka ekal git tha jo briten men matra ek saptah men itna bika ki vah varsh ka sabse jyada chalne vala git ban gaya. amerika men bhi is gane ne panch hafton men lokapriyata ke sare rikard tor die aur britni nanbar van paep star ban gai. britni is samay tak thi to tin ejar, par amiri aur prasiddhi donon uske pas a chuki thin. san 1999 men uske elabam ‘ups ai did it agen’ ne bhari dhum machai. is samay tak britni ek brand ban chuki thi. vah ek gayika ke sath-sath midiya aikaen ban gai thi. britni aur uski man ne ‘hart tu harta’ nam se apni atmakatha bhi likhi hai. laykos, yu.bi.el, gugal, aur em.es.en. sarch injnon par britni sabse jyada khoja gaya shabd hai aur britni nam se sanbandhit sare domen nem bik chuke hain. ‘d faundeshn’ namak britni ki apni ek samaj sevi sanstha hai. ‘smaish hitsa’, ‘bravo’, ‘paep maiksim’ ‘kaesmopolitn’, ‘roling ston’, ‘dablu’ ‘vog’ jaisi patrikaen britni ke intaravyu ki lain men lagi rahi hain. iske purva maidona ko chorakar midiya kisi paep singar ka itna divana nahin hua. britni ki saflta ka shrey ‘maiks martin’ ko bhi jata hai. britni ne maiks martin ke intaraneshanal tur men bhi shirakat ki jiska nam tha ‘drim vidin e drim’ jismen yatharthavadi hote hue bhi sapne dekhte rahne ki vakalat ki gai hai. san 2002 ke ant tak ‘britni’ aur ‘drim vidan e drim’ ki bikri lagabhag ek saman ho gai. isi ke bad britni ne apne purane bvaey franed jastin timbaralek se vivah kar liya aur 48 ghante men hi donon alag bhi ho gae. fir ek varsh ke lie britni ne sannyas lene ki ghoshna kar di. upar varnit ghatnaon ko jyotishiya drishti se dekhne par ham pate hain ki jatka ki 1992 se rahu ki mahadsha praranbh hui. rahu vyakti ko apne jivan men kahan se kahan tak pahuncha deta hai yah is janm kundli men saf najar ata hai. jyotish men rahu ki sabse achchi sthiti ekadash bhav men mani gai hai. matantar se jyotishiyon ka ek varg mithun rashi men rahu ko uchch ka manta hai. is kundli men uchch ka rahu gyarhven bhav men sthit hai. rahu 290 39’ ka hai jo guru ke nakshatra men hai. guru is kundli men panchmesh aur ashtamesh hai. pancham bhav se jatak ki bahumukhi pratibha, gyan, santan aur dav chalne ki prakriya ka vichar kiya jata hai. ashtam bhav se vyakti ke chupe dhan, ayu, shakti, sasural ityadi ka vichar kiya jata hai. ashtam bhav ekadash bhav se dasham bhi parta hai arthat rahu ki dasha praranbh hote hi jatka ke karya kshetra men atyadhik labh prapti ka yog bana. tritiya bhavasth guru 7024’ ka hokar rahu ke nakshatra men sthit hai. ise daiviya sanyog kahen ya prakriti ka karishma. kundli men guru rahu ke aur rahu guru ke nakshatra men hai aur ekadash bhav men sthit rahu apni panchvin drishti se guru ko tatha tritiya men sthit guru apni navam drishti se rahu ko dekh raha hai. is sthiti ne jatka ko shikhar tak pahunchaya. 1995-96 evan uske bad, jab britni ke rikard aur elabam ae, rahu men guru ka antar chal raha tha. 2002 mane rahu men budh ka antar chal raha tha. labhesh aur dhanesh hone ki vajah se budh ne labh to karaya, lekin chaturth bhav men surya sthit hai jo ek prithktavadi grah hai. iske sath sthit hone ke karan dampatya ka sukh diya, par usse algav bhi kara diya. san 2003 men midiya britni ke piche lag gaya. britni ko ab apne elbmon ki bikri ki koi chinta nahin thi. vah apna chaitha elabam jari karne aur apne git aur sangit ko puri tarah apne niyantran men lene ki puri taiyari men lagi thi. isi dauran paep star maidona ne britni ka ‘mi agenst d myujik’ suna aur britni ko salah di ki vah uska antarrashtriya upyog kare. britni ne maidona se pucha ki ‘‘kya vah uske sath gana chahegi? ‘‘maidona bhi taiyar ho gai. maidona ne kuch aur bol taiyar kie aur uski rikarding briten men hui. yah traik bhi khub bika aur isne bhi bikri ke sare rikard tor die. iska vastavik pradarshan bhi britni aur maidona ke paraspar chunban ki vajah se khasa vivadaspad raha. yah pradarshan emtivi vidiyo myujik ke dauran kiya gaya tha. iske bad britni aur maidona men khasi dosti ho gai. duniya bhar men yah vidiyo nanbar van par raha, keval briten men nanbar do par raha. fir britni ne kevin fedrlain se vivah kar liya. ek bar fir britni surkhiyon men a gai aur uska dhyan paep sangit se bhatkne laga. uska dhyan forensik sains men jyada lagne laga. uske man men yah vichar briten ke jane mane dharavahik ‘kraim sin investigeshn’ dekhakar aya. 4 janvri 2005 ko britni ne apne is vichar ki ghoshna bhi kar di. is prakar britni ka jivan jahan saflta ki kahani kahta hai, vahin vivadon se bhi bhara raha hai. maidona ka chunban lena ek bahut bara vivad ban gaya tha. uska pahla vivah bhi vivadaspad raha jo sirf 48 ghante hi chal saka aur tut gaya. fir ‘kevin fedrlain’ se vivah hua aur do bachche bhi hue, parantu britni ka fir shadi se man uchat gaya aur vah mansik rup se asvasth ho gai. pati se talak ka kes chalne laga. bachchon ka sanrakshan bhi adalat ne mansik sthit thik n hone ke karan uske pati ko de diya. ek din achanak britni ne apna sir murva liya aur ghar men bhi tor for karne lagi. patrakaron se bhi uski jharap hone lagi. iske lie use rihaibiliteshan sentar men daktaron ki dekh rekh men rakha gaya. halanki vahan bhi vah nahin rah saki aur kuch hi samay bad bahar gai. is darmiyan uski apne mata-pita se bhi nahin pati. upar varnit tathyon ko jyotishiya adhar par dekhen to is dauran britni ki kundli men rahu men ketu ka antar chal raha tha. rahu men ketu ki antardasha jab kisi ke jivan men ati hai to viprit dhruvikaran samne a jata hai. ketu, jo pancham bhav men guru ki rashi men baitha hua hai, apni panchvin drishti se bhagya bhav ko tatha nauvin drishti se lagn tatha bhagyesh mangal ko dekh raha hai. pancham bhav prem sanbandhon ka bhav bhi hota hai, atah is samyavdhi men ketu ne in sab baton ko ubhara. vartaman men rahu ki mahadsha san 2010 tak prabhavi rahegi. abhi rahu men chandra ka antar chal raha hai. chandra ki sthiti aur svamitva donon hi is janm kundli men shubh nahin hain aur chandra apne hi nakshatra men sthit hone ke karan ashubhta ko aur barha raha hai. chandra ke mansikta ka dyotak hone ke karan hi jatka mansik rup se abhi svasth nahin hai, lekin jaise hi 2009 ke madhya se britni ke rahu men mangal ka samay praranbh hoga jo use punah naya josh v utsah dega aur vah fir se sangit ke kshetra men saflta paegi. 2010 ke bad guru ki mahadsha praranbh hogi aur us samay guru ka gochar bhi saptam bhav par hoga. tab britni fir se vivah ke bandhan men bandhanegi aur yah bandhan jivan bhar ka hoga.