ham sabhi jane-anjane jo bhi karya karte hain, ve karm kahlate hain. achche ashay se kiye gaye karm satkarm tatha durbhav se kiye gaye karm dushkarm kahe jate hain. achche aur bure sabhi karm sukh-dukh men parivatartit hote hain. pratyek karm ka fal sanbandhit vyakti ko lakshyanusar bhogna hi parta hai. aur yah bhi jaruri nahin ki karm falon ka niptara ek hi janm men ho jaye.
yah ek se adhik aur kai bar kai janmon tak aur kuch vishesh sthitiyon men yug-yugantaron tak bad men bhi ho sakta hai. apne dekha hoga ki ham sabhi vakt jarurat ke lie ek bachat khata kisi bhi vittiya athva sarkari sanstha men sunishchit aur suvidhajanak kredit tatha debit transafar karne ke lie kholte hain jismen ham apni ay ka kuch bhag anivarya halat se niptne ke lie rakhte hain.
khata kholte samay kuch rashi praranbhik rashi ke rup men jama ki jati hai. uske bad hi vah khata shuru hota hai. is khate men khatadharak apni ichcha aur avashyaktanusar anek bar rashi ki jama aur ghata karta rahta hai. thik isi prakar vyakti dvara shubh karya kiye jane par uske karm khate men punya rupi fal jama hote rahte hain jiska samanyatah use pata bhi nahin rahta.
kabhi-kabhi to kuch vyakti achanak prapt hui kisi bahut bari rashi ko jama karke bhul jate hain lekin jab baink ke niyamon ke anusar us par vyaj adi ke rup men ek bahut bari rashi hath men ati hai to khatedar gadgad ho jata hai aur akash se barse punya salil ki tarah use batorta rahta hai. kai bar to aisi bari rashi se khatadharak ki kai pushten kritarth aur labhanvit ho jati hai.
isilie kaha gaya hai 'neki kar dariya men dal' kyonki neki ka fal jarur milega. khate ki rashi ko ek se dusre khate men sthanantrit bhi kiya ja sakta hai tatha chahe to use band bhi kiya ja sakta hain. apke khate men apke parivar ke sadasya tatha anya koi dendar ya lendar chaik dvara dhan jama kar sakte hain aur nikal bhi sakte hain.
aise hi vyakti ke purvajon dvara kie gae sad-asad karyon ke fal rupidhan uske ya usse jure sadasyon ke khate men nikat sanbandhi v rakt sanbandhi par lagu hone vale niyamon ke anusar khate men jurte ya ghatte jate hain. davedar athva namiti ke n hone par karmafal ki sari jama rashi sarkar ke khate men chali jati hai.
usi prakar nishkam (niji svarth rahit) karm fal rupi rashi us parmatmatva men vilin hokar sanpurn brahmand men jivatm tatva ka saman rup se poshan karti hai. jyotishiya manyataon ke anusar aur sansarik vidhi-vidhan ke anusar bhi pratyek jiv ko jahan apne kiye gaye karmon ke fal to avashya bhogne hi parte hain vahin karm ke svabhavik fal ki andekhi karne se vah sanchit (plas ya mains) nidhi lupt ya kshin nahin ho jati.
keval nishkamakarmi hi sukh-dukh ki anubhutiyon ke janjal se upar uthakar unse aprabhavit v asanprikt rah pata hai. vastutah vah sthiti bahut lanbe samay ke abhyas se hi prapt ho sakti hai. sharir se atma ka mukt hona hi mrityu kahlata hai.
lekin vahin khata band nahin ho jata. vah fir se kisi rup men jivit ho uthta hai aur pahle ki sabhi lendariyan ya dendariyon antim niptara hone tak niyamanusar barhti hi jati hain.
atah bharasak savdhani barten ki koi bhi lendari ya dendari bahut bhari n pare. dendari (bure karmon ka fal) jitni jaldi aur prasannata se nipta li jaye, utna hi achcha. age ke liye keval lendari baki rahe to laukik v atmik anand prapt kar sarvavidh age barh sakenge.
if you are facing any type of problems in your life you can consult with astrologer in delhi