ishvariya vidya kahlane vale jyotish se aj sanpurn manav jagat men koi achuta nahin hai. brahmand men gatishil grah, nakshatra, sitaron ke prabhav men aj hi nahin, varan jabse srishti ki rachna hui, usi samay se prithvivasi inke prabhav men hai. manav jagat ne inka gyan samy-samay par le kar apne jivan ko kafi uchchastariyata pradan ki hai
tatha jivan ko kafi saral banaya hai. manushya ko apne bhavishya ke garbh men chupe rahasyon ko janne ki jigyasa adi kal se hi rahi hai. inhin jigyasaon ke karan hi manushya ko aise gyan ki avashyakta pari, jo uske jivan ko margadarshan pradan kar sake tatha unke jivan ko gatishil bana sake. isi kari men manav ne akash men vicharan kar rahe tare, akashiya grah, dhumketuon adi ka adhyayan aranbh kiya. srishti ke nirman ke sath hi manav mastishk men is tarike ke khyal paida hote gaye ki ishvar ne manushya ko kyon banaya hai aur manushya ke jivan ka uddeshya kya hai? uska jivan kitna hai?
in baton ka adhyayan karne ke lie usne khagoliya gannaon, grah-nakshatron, niharikaon, ulkaon, dhumketuon adi ki gati ka adhyayan kiya, use laga ki ye manav ke jivan par gahra asar chorte hain. iske lie usne kai tarike ki bhavishya janne sanbandhi vidhiyon ka vikas kiya. is kari men jyotish gyan use sarvada uchit laga. prachin kal men bhavishya sanbandhi is gyan ko, param ishvar brahma ke dvara, tinon lokon tak pahunchaya jata tha. fir bhartiya prachin shastron ke anusar brahma se yah vidya sankadi rishi ke pas pahunchi. sankadi rishi ke pashchat yah, narad, bhrigu tatha anya anekanek rishiyon se hote hue, aj adhunik manushya ke pas pahunchi, jisne ise kanpyutar tak pahunchaya.
kintu fir bhi aj jyotishiyon tatha am vyakti ki yahi pareshani hoti hai ki bhut kal to mil jata hai, vartaman bhi kuch sima tak mil jata hai, kintu bhavishya sanbandhit gannaen sahi hone par bhi, vyakti ke bhavishya sanbandhi sthiti spasht nahin ho pati hai. vaise to jyotish men kai vidhiyan hain, kintu sabhi men, sukshm gannaon ke bavjud bhi, bhavishya kathan sahi nahin utrta hai, to use aj tak bhrigu sanhita ka rahasyamay gannaon se parichay nahin hua.
bhrigu rishi dvara rachit bhrigu sanhita men bhut kal, bhavishya kal evan vartaman kal ki sahi ghatnaon ka vivaran likha hua hota hai. vah jinke prachin bhrigu sanhita se liye gaye hain. in sutron ko kafi bhali bhanti jancha aur parkha gaya hai. 10ven ghar men surya, ya shani, ya rahu, ya mangal hone par jatak ka pita ke sath mataikya nahin hota, arthat vaicharik matbhed hote hain. makar aur kunbh rashi men agar surya ho, to vah vyakti, apne parivar ki yojnaon, ya karyon par amal nahin kar ke, apna rasta svayan rhurhta hai. vah apne jivan men sangharsh karta hai. uske pashchat use saflta milti hai.
pita ko shuruati daur men parivartanashil banata hai, arthat pita ke lie kashtakarak hota hai. tritiya bhav men mangal, shani, athva rahu hone par bhaiyon se nahin banti. bhaiyon men matbhed hote rahte hain. dhanu rashi ka shukra hone par jatak ka vaivahik jivan sukhamay nahin hota. vah jatak ke sahaj sukh men, kisi bhi karan se, kami lata hai; karan chahe kuch bhi ho.
dvitiya, athva ashtam sthan ka brihaspati jatak ke karyon men ekrupta nahin lata. aisa jatak ek se adhik karya karta hai tatha vyapar ke prati uska lagav adhik rahta hai. aise jatak ka svayan ka vyapar bhi karib 13 mah tak achcha chalne par, uske uprant vah vyapar par adhik dhyan nahin deta, par vah vyapar ko karib sarhe 3 sal chalane aur ant men band karne ko vivash ho jata hai.
aisa jatak svayan kamai n kar ke balki dusre vyaktiyon ke lie kamata hai; arthat vah dusre vyaktiyon ko kama kar deta hai. kanya rashi men brihaspati ke sath ketu hone par jatak men kafi had tak ekrupta, arthat sthirta hoti hai. jatak yashasvi banta hai aur rank se raja ban jata hai. lekin ant inka bura hota hai. udaharan hai hitalar ki janmapatrika. brihaspati ke sath chandrama hone par jatak ko pratyek kshetra men dhokha khana parta hai.
pratham, dvitiya, ya 12ven ghar men ketu hone par pitri dosh hota hai. is karan ghar ke pas men ek makan ka band hona, makan men koi nahin rahna, vidhva aurat rahna athva makan ki jarjar sthiti hona, makan ke pas kachre ka dher (ubhra hua unchai tak) hona, darvaje ke pas, ya samne bijli, ya telifon ka khanbha hona, ya ghar ke ek vyakti ko rat men nind nahin ana, ya us vyakti ko bhay mahsus hona, in men se koi ek ya adhik bhi ho sakte hain aur ajakal kutta palte hue bhi dekha gaya hai.
mangal chathe, ya dusre ghar men hone par jatak 28 se 32 sal aur 51 se 54 sal ke madhya jamin-jaydad sanbandhi sthayi sanpatti leta hai. chandrama 12ven ghar men hone par vyakti mansik chintaon se grasit rahta hai. brihaspati uchch ka (kark rashi men) hone par nakaratmak parinam dega. agar koi grah vakri hoga, to apne se 7ven ghar ka fal dega. larke ki kundli men tisre ghar ka ketu ho, to jatak bhaiyon men aur agar larki ki kundli men ho, to vah bahnon se sabse chota hoga, basharte ketu apni rashi ka n ho tatha apne sath men kisi anya grahon ko nahin baitha, rakha ho aur uchch, ya nich ka n ho. ketu (uparyukt se) ke viprit rahu hone par jatak bara hoga.
ketu brihaspati ki rashi (dhanu,min) ka nahin hona chahie tatha rahu shani ki rashi (makar, kunbh) ka bhi nahin hona chahie. panchven ghar men mangal, shani, athva rahu hone par shadi ke purva ki sthiti darshata hai. ismen ‘pratham prem’ ya sagai chutti hai tatha chamk-damak ke jivan men asflta milti hai. intaravyu, ya pratispadrdha men upay nahin kiya jae, to asflta hath lagti hai. lagn men brihaspati uchch ka (yani kark rashi ka) hone par vah jatak ke charitra ka hanan karata hai. aisa jatak bahan ke samakaksh aurat ke sath vyabhichar karm karta hai, ya fir jisse shadi hoti hai,
use bahntulya manta hai. uchch ka brihaspati jis bhav men baitha ho, to usse nauven bhav ko kharab karta hai. surya aur shani ek sath baithne par shukra ko hani pahunchate hain. saptamesh ka budh ejentasvarup karya deta hai; arthat aisa jatak kamishan, ya ejent shabd ka upyog karen. shani aur rahu pahle, dusre, ya barhven ghar men ho, to jatak tantrik vyabhichar karm karta hai.
varsh kundli, ya gochar men bhi yadi pahle, dusre aur barhven bhav men shani aur rahu hon, athva rahu ki dasha, antardasha, pratyantar, ya sukshmantar men shani ki yukti ho, to bhi jatak tantrik vyabhichar karm karta hai. surya ke sath ketu hone par bhi pitar dosh hota hai. kark rashi ka budh ayu ke 32 se 36 varsh ke madhya karjadar banata hai tatha arthik rup se hani pahunchata hai.
kark ka surya aur 12ven ghar ka brihaspati vaivahik jivan ko kashtaprad banaega. kendra men mangal, ya anya sthan men svarashi, ya uchch ka hone par krodhi svabhav hota hai. dusre ghar men mangal, shani, ya rahu ho, to shiksha (digri star par) men rukavat karta hai.
chaithe ghar men chandrama, ya dvadash bhav ka chandrama videsh yatra ke yog banata hai. saptam bhav men surya aur budh hone par vivah men deri hoti hai, ya fir sagai lanbi avdhi tak chalti hai. pancham bhav, ya ekadash bhav men brihaspati hone par ya to 3 larke, ya 3 larkiyan honge.