ye sach hai ki lobh ka jadu admi ke sir charhakar bolta hai aur adarshon ka mithya avaran lobh ke jhatke se chinna-bhinn ho jata hai. is katha ke nayak kashmiri lal ke sath bhi kuch aisa hi hua jiski sanpushti karte hain uski janmakundli ke grah nakshatra aur dashakram jiske parinam ve abhi bhi bhog rahe hain.
anna hajare ko aj kaun nahin janta. desh ke bachche-bachche ki jaban par aj unka nam hai. aisa unmen kya hai ki har tabke ka vyakti unhen apne dil ke karib manta hai aur man hi man unko bhrashtachar ke khilaf cheri muhim men apna samarthan de raha hai. unmen am admi ko ek masiha ka rup najar ata hai jo desh men faile hue bhrashtachar ko jar se samapt karke desh men aman chain, shanti, sadbhavna evan ramrajya lana chahte hain.
bhrashtachar ki bat karen to shayad hi koi aisa vyakti hoga, jo kisi n kisi rup men ismen lipt nahin hoga. har sarkari mahkme men yadi chote se chota kam bhi samay par karvana hai to chaprasi se lekar babu tak ko kuch n kuch charhava charhana parta hai, tabhi fail age khiskti hai. anyatha charhava n charhane ki sthiti men dinon, mahinon, varshon men samay gujrta chala jata hai aur jab dekho tabhi vahi dhak ke tin pat najar ate hain.
dekha jay to- rishvat dene vala ya lene vala donon hi bhrashtachar men lipt hote hain kyonki dene vala hi is abhishap ko age barha raha hai aur lene valon ke hausle buland kar raha hai. lekin kahte hain n, pap ka ghara ek n ek din to bharna hi hota hai aur upar vale ki lathi men avaj nahin hoti. aisa hi kuch kashmiri lal ke sath hua. kashmiri lal inkam taiks dipartament men inspektar ke pad par karyarat the.
shuru-shuru men to karya ke prati kafi sajag aur imandar the, parantu samay ke sath bhrashtachar ke kiron ne unhen nahin bakhsha arthat yah to vahi bat hui ki aye the hari bhajan ko aur otne lage kapas, iske anusar- kashmiri lal ko pad to mila tha bhrashtachar mitane ko lekin kashmiri lal bhi khud hi bhrashtachar men sanlipt hokar sarkar ki nak ke niche hi dhan batorne lage. rishvat men kamae paise se apna ek alishan makan v khubsurat kar bhi kharid li. unke bachche shahar ke sabse mahange skul men parhte the.
patni roj kisi parti men hajaron ke danv lagati aur pura parivar aisho aram men khud ko kisi karorpti se kam nahin samjhta tha. lekin aefis jate hue kashmiri lal hamesha apne tu-vhilar skutar ka prayog karte kyonki ve nahin chahte the ki aefis valon ko unke stetas ki bhanak bhi lage. unke samne ve hamesha paise ki tangi hi jataya karte kyonki ve jante the ki sabse pahle unke sathi hi unki ati hui lakshmi se jalenge.
dusre ke paise par aish karna to bahut asan hota hai par khud mehanat kar ke paise ko lutana mushkil hota hai. isi bich unhonne taiks ke silsile men ek sunar ki dukan par chapa mara. chunki uske pepars men kafi garbri thi, unhonne mote paise ki dimand rakhi. sunar kafi tajurbekar tha usne atyant vinamra hokar unhen agle din ane ka ashvasan diya aur das lakh dene ki peshakash ki. kashmiri lal apne ai.ti.o. ke sath agle din uski dukan par ja dhamke aur turant paise dene ki mang karne lage.
dukandar ne unhane das lakh ki gaddiyan pakra din. jaise hi kashmiri lal ne paise pakren, vaise hi si.bi.ai. ki tim udhar a gai. unhen aur ai.ti.o. ko range hath pakar liya aur unko rishvat lene ke jurm men turant jel bhej diya gaya. kashmiri lal ne kabhi sapne men bhi nahin socha tha ki aisa kuch bhi ho sakta hai. vah apni tanashahi ke danbh men khud ko vahan ka badshah samjhne lage the, har vyakti ko harkane men unhen bahut anand ata tha.
lekin jel men jane ke pashchat unhane apni asliyat ka ahsas hua. midiya ko jaise hi is bat ki khabar lagi turant unke ghar pahunch gai aur unki patni aur bachchon se tarh-tarah ke saval karne lage. sabhi akhbaron aur nyuj chainlon ne is khabar ko namk-mirch lagakar pesh kiya. hal hi men uske bete ki sagai tay hui thi. beti vale ne jab yah suna to unhonne turant sagai tor li. javan beti ko bhi koi larka nahin mila.
sari biradri men thu-thu hone lagi aur sabne unse apna rishta tor diya aur khud v unke pure parivar par musibton ka pahar tut para tatha unhin ke sath pakre hue ai.ti.o. ko itna jabaradast dhakka pahuncha ki uska jel men hi dehant ho gaya. unke ritayar hone men kuch mahine hi shesh the, ve to jivan se hi ritayar ho gaye. kashmiri lal bhi unka ant dekhakar bahut dar gaya aur apne kiye par kafi pachtava bhi hua.
un par rishvat lene ka kes chala aur karib chah mahine pashchat ve jel se bahar a gaye. bahar ane par sabhi mitra v rishtedar unse kanni katne lage aur unse bat karne men bhi jhijhkte. kal ke kashmiri lal jo kisi ko apne age kuch nahin samjhte the, aj bhigi billi ki tarah sabse najar bacha kar chalne lage. as- paraus ke log bhi unhen age piche tane dene lage.
kashmiri lal naukri se saspend ho gaye aur un par rishvat lene ke apradh men lanba kes chala. isi bich ritayar bhi ho gaye lekin kes abhi tak chal raha hai penshan bhi nahin mil rahi hai. ab unhen pata chal raha hai ki am admi apni jindgi kaise bitata hai. aiye, karen kashmiri lal ji ki patri ka vishleshan aur janen, kaun se grah vyakti ko rishvatkhor banate hain
- kashmiri lal ji ki kundli men lagn men mesh rashi ke rahu kafi balvan sthiti men hai. lagn ke rahu ne unhen atyant mahatvakankshi, ahankari tatha bhrasht prakriti ka vyakti bana diya. lagnasth rahu jahan ek or vyakti ki nirnaya-shakti ko kamjor bana deta hai, vahin vah apne nirnay, lakshya purti ke lie, bina kuch soche-samjhe le leta hai.
û kashmiri lal ji ki kundli men lagnesh mangal bhagyesh brihaspati ke sath bhagya sthan men bhagyashali rajyog bana rahe hain jiske prabhav se dhan se sanbandhit vibhag men ek uchchadhikari ke rup men niyukt hue.
û kundli men sukshmata se vichar karen to chalit kundli men donon grah guru aur mangal, karm sthan arthat dasham bhav men chale gaye hain. yahan labhesh brihaspati nich rashi men tatha lagnesh mangal uchch rashi men hone se inhonne apne adhikaron ka apne niji svarth ke lie galat upyog kiya.
û labhesh shani kundli men labh sthan, dhan sthan tatha dhanesh shukra, sabhi ko purn drishti se dekh raha hai. jiske karan inki dhan kamane ki mahatvakanksha atyant barh gai.
û labhesh v karmesh shani par pap grah rahu ki purn drishti bhi hai. iske sath-sath dhan karak guru ki bhi drishti hai jiske falasvarup karm sthan se dhan to kamaya, par sidhe raste ki bajay rishvat aur ghus khori se turant dhan kamane ki yojnaon ko anjam diya.
û inki kundli men man karak chandrama chaturthesh hokar vyay bhav men baithe hain tatha mangal ki purn drishti men hai.
navansh men bhi chandrama apni nich rashi men hai jiske prabhav se inke hriday men chal v kapat adhik raha aur galat kam karte hue inka man apradh-bodh se grasit nahin hua. kashmiri lal ke sath chandra ki mahadsha men budh ki antardasha men hi yah ghatna ghati. sukhkarak chandrama ki dvadash bhav men sthiti tatha budh ki ashtam bhav men surya ke sath sthiti ne apna pratikul prabhav dikhaya aur ve rishvat lene ke arop men range hath pakre gaye tatha jel ki hava khani pari.
ant men yahi kahna chahungi ki dhan har vyakti kamana chahta hai, kamana bhi chahie lekin iske lie apne karm aur bhagya par bharosa karen, uchit marg apnaen. apna vivek khokar bhrashtachar se paisa kama kar jivan ki tarangon ka sukh shayad hi prapt kiya ja sakta hai.