janmadyasya yato'nvayaditarat shcharthesvabhigyah svarat tene brahn hrida y adikvye muhyanti yatsuryah. tejovarimridan yatha vinimyo yatra trisargo'mrisha dhamna sven sada nirast kuhkan satyan paran dhimhi.. jisse is jagat ki srishti, sthiti aur pralay hote hain, vah parmatma sat rup se sabhi sat padarthon men sthit hai aur asat padarthon se prithak hai. chetan hai, svatantra hai evan svayan prakash hai usi maya karya se purnatah mukt rahne vale param satyarup parmatma ka ham dhyan karte hain. mahamuni vedavyas ke dvara rachit is shrimad bhagavat mahapuran men mokshaparyant fal ki kamna se rahit param dharm ka nirupan hua hai. jis samay bhi mahanubhav mahapurush iske shravan ki kamna karte hain, ishvar usi samay avilanb unke hriday men akar bandi ban jata hai. yah shrimadbhagavat vedrup kalpavriksh ka paka hua fal hai. shri shukdev tote ke mukh ka sanbandh ho jane se yah divyatidivya parmanandamayi sudha se paripurn ho gaya hai. ismen tyajya vastu kuch bhi nahin hai. anyanya falon ki (guthli, chilka) tarah. yah murtiman ras hai. atah jab tak sharir men chetna rahe, tab tak is divya bhagavat ras ka aviram bar-bar pan karte raho.
yah ras keval aur keval prithvi par hi sulabh hai. ek bar param punyamay kshetra naimisharanya men shaunkadi rishiyon ne bhagavatprapti ki ichcha se jivmatra ke kalyanarth sutji ka pujan kar unche asan par baithakar bare adar se yah prashn kiya. bhagavan ! ap nishpap hain, apka hriday bara hi saral aur shuddh hai. ap kripa karke batlaiye ki is sansar men kaliyugi jivon ke param kalyan ka sahaj sadhan kya hai? yaduvanshiyon ke rakshak bhaktavatsal bhagvan shrikrishn vasudev ki dharmapatni devki ke garbh se kya karne ki ichcha se avtirn hue the? dharmarakshak brahman bhakt yogeshvar bhagvan shrikrishn ke svadham gaman par dharm ne ab kiski sharan li hai? rishiyon ke mangalamay vachan sunakar romaharshan putra ugrashrava ko bara hi anand hua aur kahne lage - rishiyon sanpurn vishva ke kalyan ke lie apne yah uttam prashn kiya hai; kyonki yah prashn shrikrishn ke sanbandh men hai aur isse samyak rup se atmashuddhi ho jati hai. vedon ka tatparya bhi shrikrishn men hi hai. yagyaon ke uddeshya shri krishn hi hain. yog shrikrishn ke lie hi kiye jate hain aur samast karmon ki parismapti bhi shri krishn men hi hai.
ve hi sanpurn lokon ki v lokon men sthit vibhinn jivon adi ki rachna karte hain evam devta, pashu-pakshi, manushya adi yoniyon men lilavtar grahan karke satvagun ke dvara jivon ka paln-poshan karte hain. sutji ne shaunkadi rishiyon ko bhagvan ke mahantatva adi se nishpann purush rup grahan evan usmen das indriyan, ek man aur panch bhut ka rahasya batate hue nabhi sarovar se kamal aur kamal se prajaptiyon ke adhipti brahmaji ki utpatti adi ka varnan karte hue
1. sanatkumar
2. sukar (varah)
3. devarshi nard
4. nar-narayan,
5. kapil,
6. dattatrey
7. yagya,
8. rishbhdev,
9. prithu raja,
10. matsya,
11. kachchap,
12. dhanvantari
13. mohini,
14. nrisinh,
15. vaman,
16. parshuram,
17. vedavyas,
18. shriram,
19. balram,
20 shrikrishn,
21-buddh,
22. kalki avtar
20 avtar to uparyukt hi hain. ram aur shrikrishn purnavtar hain. shesh char avtar shrikrishn ke hi ansh hain- kesh ka avtar, sutpa tatha prishni par kripa karne vala avtar, sankarshana-balaram tatha parabrahm aur in char avtaron se vishisht panchven sakshat bhagvan vasudev hain. kuch vidvanon ke mat se 22 to uparyukt hi hain inke atirikta- hans aur hayagriv hain. inka varnan kiya. is divya gyan ko shri shukdev muni ne apne pita vyasji se prapt kiya tha. punah raja parikshit ko ganga tat par yah gyan shri shukdev muni ne shravan karaya. vahin is gyan ki prapti mujh (sut ji) ko hui. yah param kalyankari v sanpurn dukhon ka nashak hai. shaunkji bole -sutji ! maharshi vyas ko yah gyan kaise kahan, kisse prapt hua? sutji bole-shaunkji. s kadachitsarasvatya upasprishya jalan shuchi. viviktadesh asin udite ravimandle.. 1-4-15.. dvapar men maharshi parashar ke is vasu kanya satyavti ke garbh se bhagvan ke kalavtar yogiraj vyasji ka janm hua. ek din snanadi krityon ko purn kar sarasvati nadi ke pavan tat par sthit shamyapras ashram men vyasji udvignamana ekant men virajman the. vedon ka vibhag, puran, mahabharat adi ki rachna se bhi mansik santushti prapt n ho payi, isi chintan men lin vishad grast vyasji ke samip devarshi narad ka agaman hua.
unhen dekhakar vyasji turant uthakar khare ho gae aur vividh upcharon se unka pujan kiya. nardji ne pucha - mahabhag . apke sharir evan man donon hi apne karm v chintan se santusht hain na? vyasji bole munivar . main abhi tak kisi bhi sadhan se santusht nahin hun. iska kya karan hai? apka gyan agadh hai. kripya karke meri santushti ka marg bataiye. narad ji ne kaha vyas ji. apne ved vibhag kie, puran v mahabhartadi ki rachna to ki parantu kisi shastra men bhagvan ke nirmal v pavitra yash ka gan prayah nahin kiya. mera aisa vishvas hai v manna bhi hai ki jisse bhagvan santusht nahin hote, vah shastra ya gyan apurn hai. he mahabhag ! apki drishti amogh hai. apki kirti pavitra hai. ap satyaprayan v drirhavrat hain. islie ap sanpurn jivon ko bandhan se mukt karne hetu samadhi ke dvara achintyashakti bhagvan ki lilaon ko smaran kar shastra ke rup men prakat kijie. bhagvan shrikrishn hi ekmatra sabke hitkari v sabhi ke hridyeshvar hain. bare-bare mahapurush jinki charn-dhuli ko apne sir par dharan karne ki ichcha rakhte hain, usi charn-dhuli ko ap bhi apne sir par dharan kar vishad se mukt ho jaiye. shri krishn nam ka sankirtan anand pradayak hai.
nardji punah bole - vyasji ! purva jivan men main vedvadi brahmanon ki ek dasi ka larka tha. ve yogi varsha ritu men ek sthan par chaturmasya kar rahe the. bachapan men hi mujhe unki seva ka suavasar prapt ho gaya aur unki prasadi juthan ko kha-khakar mera man hriday shuddh ho gaya. pratidin shrikrishn bhagvan ki divya lila kathaon ka shravan karte-karte mera man yashodanandan ke charnon men anurakt ho gaya. mujhe sansar ke vishyon se vairagya ho gaya. chitt ke rajogun aur tamogun ko nash karne vali bhakti ka mere hriday men pradurbhav ho gaya. mahatmaon ne jate samay mujhe guhyatam gyan ka updesh kiya, jiska updesh svayan bhagvan ne apne shrimukh se kiya hai. namo bhagvte tubhyan vasudevay dhimhi. pradyumnayaniruddhay namah sankarshanay ch.. (1-5-3).. prabho ! ap bhagvan shrivasudev ko namaskar hai, ham apka dhyan karte hain. pradyumn, aniruddh aur sankarshan ko bhi namaskar hai. jo chatuvryahrupi bhagavanmurtiyon ke nam dvara yagyapurush ka pujan karta hai, usi ka gyan purn evan yatharth hai. vyas ne narad ji se is katha ko shravan kar pucha - mahatmaon ke chale jane ke bad apne kya kiya? nardji ne kaha - us samay meri avastha choti thi, man ka snehpash hi prabal tha. mera man shrikrishn men hi raman karta rahta tha. par ek din meri man gau dohan ke lie rat ke samay ghar se nikli.
raste men unke pair se sanp sparsh kar gaya aur uske dasne matra se hi meri man ka dehavsan ho gaya. prabhu ki aisi hi ichcha thi. man ke sanskar ke bad uttar disha men jakar ghane jangal men sthit pipal vriksh ke niche mahatmaon se jaisa suna tha, usi rup ka dhyan karne laga. bhaktavatsal bhagvan mere hriday men prakat ho gae. mera hriday shant ho gaya, adbhut anand ane laga aur ekatak main unke anirvachniya rup ka darshan karne laga. asan se utha, par punah us rup ka darshan n kar saka. main vyakul ho gaya tabhi chitt ko shant karne vali akashvani hui- ‘is janm men tum mera darshan nahin kar sakoge.’ punah sadhna karo aur purnatva ko prapt karo. vasnaon ko dhvast kar do tabhi darshan hoga. main shri hari ke mangalamay namon ka smaran karta raha. hriday shuddh ho gaya. panch bhautik sharir nasht ho gaya. kalp ke ant men shrihri ke shayan karne par samagra srishti ko sametakar brahmaji jab unke hriday men pravesh karne lage tab unke shvans ke sath main bhi pravesh kar gaya. sahastra chaturyugi vyatit hone par brahmaji ne jab punah srishti ki tab unki indriyon se marichi adi rishiyon ke sath main bhi prakat ho gaya aur tabhi se abadhgti se lokon men vicharan karta hua prabhu nam ka sankirtan karta rahta hun. vyas ji se anumti prapt kar vina bajate hue devarshi chale gae.