shri shaunak ji ne sutji se pucha - sarvashaktiman vyas bhagvan ne devarshi narad ji ke abhipray ko sunakar v chale jane par kya kiya? shri sutji ne kaha - brahmanadi sarasvati ke pashchim tat par shamyapras ashram ke nikat charane or se ghire hue ber ke vanon se sushobhit apne ashram men vyas ji ne baithakar bhakti yog ke dvara apne man ko purnataya ekagra aur nirmal karke adipurush parmatma men sthir kar purneshvar bhagvan aur unke ashram men rahne vali maya aur usse sanbandhit alaukik shaktiyon v lilaon ka darshan kiya tatha jiv matra ke kalyanarth bhaktiras men nimagn karne vali parmhanson ki sanhita shrimadbhagavat ki rachna ki. bina vishad prasad prapt nahin hota, bina bhukh svadisht bhojan bhi achcha nahin lagta tatha bina shram nind bhi nahin ati. kurukshetra men arjun ka vishad-bhagavadgita, balmiki ka vishad balmiki ramayan, siddharth gautam ka vishad - tyagaparak (dhamm pad) evam vyasji ka vishad - shrimadbhagavat mahapuran ki divya rachna ka karan bana. bhagavat granth ke dvadash skandh, parmatma shri krishn ke ek-ek ang ke pratik hain. pratham skandh-dayan bhag, dvitiya-bayan bhag, tritiya-dayan charan, chaturtha-bayan charan, panchm-dayin jangha, shashtha-bayin jangha, saptama-dayan hath, ashtama-bayan hath, navm-dayan vakshasthal, dashm-bayan vakshasthal, ekadsh-mastak aur dvadash skandh- bhagvan shrikrishn ka utha hua hath abhay v var mudra ka pratik yani sanpurnata ka dyotak, samast mano'bhilashaon ko purn karne vala hai.
isi karan vyasji ne is bhagavat - sanhita ko nivrittiprayan putra shrishukdev ji ko parhaya. shri shukdev ji to atyant nivritti parayan hain, apni atma men hi sarvada raman karte hain, fir bhi bhagvan ki heturhit bhakti karne vale shri shukdev ji ki man-buddhi-hriday bhagvan ke madhuryapurn gunon ke karan akarshit ho gae aur vivash hokar is vishal granth ka adhyayan kiya. bhagavat granth ka ek-ek shlok pyare shrikrishn ka v shlok ka arth (bhav) pyari radha ka svarup darshan karane vala hai. shrisutji shaunkji ko rajarshi parikshit ke janma-karm adi ka varnan karne lage. tab rishiyon ne kaha ki bhagvan! ham to shrikrishn ki katha sunna chahte hain. ap parikshit ko kyon suna rahe hain. shri sutji ne uttar diya ki ‘‘krishn katho dayam7 1/7/12 isi men se krishn ki katha niklti hai. bij dekhakar gyan nahin hoga ki ismen se vriksh niklega aur bare-bare sundar fal niklenge, parantu yah sab bij se hi niklte hain. to, bat dvapar yug ki hai jis samay mahabharat yuddh men kaurav aur pandav donon pakshon ko bahut se vir virgti ko prapt ho gae the aur bhimsen ne gada ke prahar se duryodhan ki jangh tod di thi, ashniya pira v jivan ki antim shvanson ki or agrasar apne svami duryodhan ka priya karya manakar draupdi ke sote hue putron ke sir katakar use bhent kie.
yah ghatna duryodhan ko bari hi apriya lagi, kyonki aise nich karm ki sabhi ninda hi karte hain. draupdi apne kaleje ke tukron (putron) ka nidhan sunakar karun krandan karne lagi. draupdi ka vilap keval guru putra ashvatthama ke kalyan v mare hue putron (bachchon) ko bhagavatkripa bhagvdabhimukhya prapti ka sadhan matra tha. draupdi to bhagvan ke sanyog men khush hoti thi aur bhagvan ke viyog men roti thi. draupdi ke charitra se sansari jiv ko yah shiksha avashya hi apne jivan men grahan kar leni chahie ki bhagvan ke sanyog men prasannata aur viyog men aprasannata ka anubhav ho, svajan sanbandhi adi ke sanyog-viyog se koi prayojan hi n ho. ashru pravahit draupdi ke netron ko dekhakar arjun ne use santvana dete hue kaha ki kalyani. main tumhare ansu tab pochunga, jab us atatayi brahmanadham ko pakarakar le aunga aur sir gandiv dhanush ke banon se katakar tumhen bhent karunga.’’ tab apne mitra bhagvan shrikrishn ko sarthi banakar virochit veshbhusha dharan kar rath par savar ho guruputra ashvatthama ke piche daur pare. pran raksharth ashvatthama prithvi par jahan tak bhag sakta tha, bhaga.
rath ke ghore thak gae, bhaybhit ho gaya aur yah janakar ki main bilkul akela hun, tab usne lautane ka gyan n hone par bhi brahmastra ka hi arjun par sandhan kar diya. sachchidanandasvarup anantashakti sanpann shrikrishn ki prerna se arjun ne bhi sprishtapastan parikramya brahman brahmayan sanddhe (1-7-29) achaman aur bhagvan ki parikrama karke brahmastra ke nivaran ke lie brahmastra ka hi sandhan kar diya. brahmanon ke divya tej se charon taraf hahakar mach gaya. lokon v lokon ke jivon ka nash hote dekhakar bhagvan ki agya se arjun ne un donon ko hi lauta liya. unhonne jhapatakar krur ashvatthama ko balpurvak rassi se bandhakar shivir ki or le jana chaha, tab unse kamalanayan bhagvan govind ne kupit hokar kaha - mainan partharhasi shratun brahmabandhumiman jahi. (1-7-35) arjun ! brahmanadharm ko chorna thik nahin hai, isko to mar hi dalo. isne rat men soye hue nirpradh balkon ki hatya ki hai. tumne ise marne ki pratigya ki hai. arjun ne bhagvan ke vachnon ko svikar nahin kiya aur kaha- madhav ! yah brahman hai, hamare guru ka putra hai isne hamare bachchon ko mara to kya hua, ham vivek gyan shunya, rathhin aur bhaybhit shatru ko nahin marenge. iske bad shrikrishn ke sath arjun ne shivir men pahunchakar apne mrit putron ke shok men nimagn draupdi ko ashvatthama ko saunp diya. nich mukh kie hue apmanit guru putra ashvatthama ko dekhakar komal hriday vali tatha prem karuna se paripurn draupdi ne ashvatthama ko namaskar kiya aur apne kasht ki bhanti ashvatthama ki mata pativrata gautmi ke kasht ka dhyan kar kaha muchyatan muchyatamesh brahmanon nitran guruah .
(1-7-43) ‘‘chor do inhen, chor do. ye brahman hain, ham logon ke atyant pujniya hain.’’ praupdi ki kaptrhit, dharm aur nyas sangat vani ko sunakar bhimsen ko chorakar sabhi ne samarthan kiya. tab bhagvan shrikrishn ne sabhi ki vani aur pratigyaon ko dhyan men rakhakar arjun ki or dekhakar kuch muskurate hue se kaha- patit brahman ka bhi vadh nahin karna chahie aur atatayi ko mar hi dalna chahie.’’ sutji kahte hain - arjun bhagvan ke hriday ki bat jan gae aur apni talvar se ashvatthama ke sir ki mani uske balon ke sath utar li. hatya ke dosh se shrihin to pahle hi ho gaya tha ab mani v brahmatej se bhi rahit ho gaya. iske bad rassi ka bandhan kholakar ashvatthama ko shivir se bahar nikal diya. pandvon ne apne mrit bhai bandhuon ko dahadi antyeshti kriya sanpann ki v gangatat par mare hue svajnon ka tarpanadi karya kiya. agyat shatru maharaj yudhishthar sinhasnarurh hue aur bhagvan shrikrishn ne tin ashvamegh yagya karakar yudhishthir ke pavitra yash ko sau yagya karne vale indra ke yash ki tarah sarvatra faila diya. bhagvan shrikrishn pandvon se vida lekar dvarka jane ke lie rath par savar ho gae. tabhi bhay se vihval samne se dauri chali a rahi uttara ne shrikrishn se kaha- pahi pahi mahayogindevdev jagatpate. nanyan tvadbhyan pashye yatra mrityuah parasparam. (1-8-9) devadhidev jagishvar! ap mahayogi hain.
ap meri raksha kijie, raksha kijie. apke atirikt is lok men mujhe abhay dene vala aur koi nahin hai. bhaktavatsal bhagvan shrikrishn uski bat sunte hi pandvon ke vansh ko nirvij karne vale ashvatthama ke dvara chore gae brahmastra ka rahasya janakar sarvasamarth sarvashcharyamay prabhu ne nij astra sudarshan chakra se amogh brahmastra ke tej ko shant karte hue uttara ke garbh ki lila karte hue hi raksha kar di. jab bhagvan shrikrishn punah dvarka jane lage tabhi kunti ne apne putron v draupdi ke sath bhagvan shrikrishn ki vibhinn lilaon ka smaran v vibhinn apdaon vipattiyon se raksha ke prasang ke smaran karte hue stuti ki aur rath ke sthan se shrikrishn ko hastinapur vapis lauta layi. stuti karte samay kunti ne bari sundar, marmik, hridayagrahi bat kahi- vipdah santu nah shashvantatra tatra jagatduro. bhavto darshanan yatsyahpunarbhavadarshanam.. (1-8-25) ‘he jagadguro. hamare jivan men sarvada pad-pad par vipattiyan ati rahen, kyonki vipattiyon men hi nishchitrup se apke darshan hua karte hain aur apke darshan ho jane par fir janma-mrityu ke chakkar men nahin ana parta.
vastav men manav jivan prabhu bhakti v prabhu darshan ke lie hi hai, bhog ke lie nahin. bhog to kisi bhi yoni men prapt ho sakta hai, parantu bhagavadbhakti manav yoni men hi prapt hoti hai. bhagvan shrikrishn, vyas adi maharshiyon ne unko shokmukt karne ke anek itihas kahe, parantu fir bhi mahabharat yuddh men sabhi ko mare jane ka apna hi karan samjhte hue maharaj yudhishthir ka shok shant nahin hua. vastavikta men to shrikrishn ke dvarka n jane ka karan unka paramapriya bhakt bhishm pitamah hi the, unka hriday bhaktavar se milne ko lalayit tha, isi karan devkinandan shrikrishn ne dharmaraj ke hriday men bhishmaji ke milan ki utkantha ka bhav jagrit kar diya. pandav, shrikrishn, vyas, dhaumya adi brahmanon se ghire hue dharmaraj yudhishthir sabhi dharmon ka gyan prapt karne hetu kurukshetra men sharashayya par anand men nimagn pare hue bhishm pitamah ke pas divya rathon par savar hokar pahunch gae. sabhi ne pitamah ko pranam kiya.
usi samay bhartvanshiyon ke gaurvpurn bhishm pitamah ke darshan ki abhilasha v gyan prapti hetu brahmarshi, devarshi, rajarshi, munigan adi apni-apni prajaon v shishyon sahit padhare. pitamah ne un barbhagi rishiyon ka yathayogya samman kar jagdishvar ke rup men hriday men virajman bhagvan shrikrishn ki bahar tatha bhitar donon jagah puja ki. tab dharmaraj yudhishthir ke dvara puche gae nivritti aur pravritti rup dvividh dharm, dan dharm, rajadharm, mokshadharm, stridharm aur bhagavaddharm adi ka alg-alag varnan kiya. draupdi hansne lagi aur kaha dada ji vastra haran ke samay apka yah gyan kahan gaya tha? shrisukt ji kahne lage beti us samay mainne duryodhan ke dushit ann ka sevan kiya tha ab mera man nirmal hai. sutji shaukji se kahte hain ki vibhinn dharmon ke varnan ko shravan kar yudhishthir mritak parijnon adi ke shok se mukt ho gae. tab bhishm pitamah ne man, vani aur drishti ki vrittiyon se atmasvarup bhagvan shrikrishn men apne ap ko lin karte hue bhagvan ki sundar stuti is prakar ki- iti matirupakalpita vitrishna bhagvti satvatpundve. vibhumi.
svasukhmupgte vavachidvihartu prakritimupeyupi yadvapravahah (1-9-32) prabho mrityu ke samay men yah apni buddhi jo anek prakar ke sadhnon ka anushthan karne se atyant shuddh evan kamnarhit ho gayi hai, yaduvansh shiromni anant bhagvan shrikrishn ke charnon men samarpit karta hun. mano is bhav ko vyakt karte hue pitamah govind se kahna chahte hain ki madhav mere jivan ki antim ichcha hai ki meri suputri ka vivah ap jaise tribhuvn-sundar evan shyam tamal ke saman sanvle varn se yukt, karoron kamdev ki chavi ko bhi dhumil karne vale ap se sanpann ho jave. bhagvan shrikrishn mand-mand muskurate hue- se kahne lage-pitamah ! ap ajivan brahmachari rahe, fir yah kanya ka sanyog kaise ban gaya? kya apne sansar ke samaksh kuch kaha aur chupakar pani grahan sanskar kar, kanya ratn ko janm diya. bhishm pitamah bole- govind ! ap sabke atma ho, sab kuch jante hue bhi anjan ban rahe ho. meri to ek hi kanya hai- ‘‘buddhi rupi’’. is kanya ka sanbandh svikar kar lo. mainne is kanya ko sansar ke logon ki drishti se ajatak surakshit rakha hai, yah kanya sarvagun sanpann hai keval bhakti tatva men hi raman karne vali hai. devatva ka samman karti hai. isi karan yah apke divya gunon par rijh gayi hai aur sanbandh ki pragarhta ka bhav meri vani ke dvara vyakt kar rahi hai. shyamsundar ne pitamah ki kanya ka varan kar liya. bhishmaji ashvast ho gae.
panchon karmendriyon, pancho gyanendriyon, gyarhvan man, buddhi tatha antahkaran chatushtay pravritti ko bhagvan, shrikrishn ke svarup men sthit kar diya. shrikrishn ke madhuratimdhur mukharvind ke darshanon ka labh prapt karte hue bhishm ne apne pranon ko vahin vilin kar diya aur aur unke sharir ka divya tej bhagvan madhav ke vigrah men samahit ho gaya. is shubh avasar par devta v manushya nagare bajane lage, akash se pushpon ki varsha hone lagi. yudhishthir ne unke mrit sharir ki antyeshti kriya karayi tatha sabhi apne hridyon ko shrikrishnamay banakar apne-apne ashramon ko laut gae. dharmaraj shrikrishn ke sath hastinapur ae tatha chacha dhritrashtra aur tapasvini gandhari ko dhiraj bandhaya aur bhagvan vasudev ki agya se vansh paranpragat samrajya par dharmapurvak shasan karne lage.