manav sharir panch bhautik tatvon-prithvi, jal, vayu, agni evan akash se bana hai. in panchon tatvon ki kshatipurti ke lie manushya ko santulit bhojan ki avashyakta hoti hai. bhojan ke abhav men manav sharir rugn ho jata hai. santulit bhojan ke mukhya tatva-protin, vasa, karbohaidrets, khanij lavan, vitamin evan jal hai. santulit bhojan manushya ko svasth, nirogi evan pusht banae rakhta hai. sabhi bhojya padarth dharti se utpann hote hain tatha unke nirman men in panchon tatvon ki nirdharit matra shamil hoti hai. yahi panchon tatva pratyek grah ke nirman men bhi sahayak hai, atah grah apni prakriti, avastha, sthiti, akar, tatva, karakatva, dhatu evan gochar ke anusar prithvi par nivas karne vale samast praniyon ko janm se mrityuparyant prabhavit karte hain. islie yadi ham pratyek grah ke pratinidhi din ko us grah se sanbandhit bhojya padarth ka sevan karen tatha pratinidhi prani ko dan karen to ham bina kisi atirikt prayas ke grahon ke dushprabhav se bach sakte hain tatha arogya evan aishvarya prapt kar sakte hain. yahan grahon se sanbandhit bhojya padarthon ke santulit ahar ka minu diya ja raha hai. is minu ka shukla paksh ke sanbandhit grah ke pratham var (din) se shubharanbh karen tatha sanbandhit grah se prabhavit ya pirit vyakti ke hath se nirdharit sankhya men mantrochcharan karvakar pratinidhi prani ko bhojan ka pahla ansh dan karaven. ishvar ki kripa se yah apke sanpurn parivar ke lie hitkari siddh hoga.