akash men jab koi grah vakri hota hai to us kal men janme sabhi praniyon manushya, pashu, pakshi, jalachar, kit, vrikshadi par evan sanpurn bhumandal (medniya jyotish) par saman rup se prabhav parta hai. yahan tak ki gochriya sthiti men grahane ki vakrata ka prabhav bhi parta hi hai. yadi koi grah vakri ho aur vah do rashiyon ka svami ho to do guna prabhav hoga, jaise-mangal mesh tatha vrishchik rashiyon ka svami hai. vaigyanik drishtikon yah hai ki mesh aur vrishchik rashi vale to prabhavit honge hi, sath men jin vyaktiyon ka janm surya, mesh v vrishchik rashi men hai, ve bhi prabhavit honge aur mangal jis ghar men hai, jahan uski drishti hai, ve bhav bhi prabhavit honge. sath hi gochar men mangal jis kundli ke jis bhav men se gati kar raha hai, vah bhi prabhavit hoga hi. jab do grah vakri ho jate hain to ve jatak ki kundli par amit chap chor jate hain.
aisa avasar 15 navanbar 1975 ko aya tha jab do-do rashiyon ke svami tin grah ek sath vakri hue the, us samay shani (makar, kunbh rashi), brihaspati (dhanu aur min) aur mangal (mesh$vrishchik) ek sath vakri hue the. ab jab ek kundli lagn ke 6-6 bhav vakri grahon se prabhavit ho jaen to atyant sukshm adhyayan avashyak ho jata hai. 15 agast 1975 ko jab brihaspati vakri hua to bangladesh ke rashtrapti shekh mujiburrahman ki parivar sahit nrishans hatya kar di gayi. us samay shekh sahab ke janm lagn par se ‘nepchyun’ pahle se hi vakri chal raha tha evan shukra unke dasham bhav men janm se vakri baitha tha.
30 janvri 1948 ko mahatma gandhi ki jab hatya hui us samay nepachyun, yurenas, shani evan mangal sabhi grah vakri the falasvarup deshavyapi hatyaen huin, dange-fasad men lakhon log mare gae. pratham vishva yuddh (28 jun 1914) tatha dvitiya vishva yuddh (3 sitanbar 1939) ke samay tin-tin grah vakri the tatha lagn men mangl-ketu-chandra ki visfotak yutiyan thin. donon hi vishva yuddh ki kundliyon men guru nich ka hokar duahsthan men tha tatha lagn shubh grahon se drisht nahin tha. aitihasik purushon ki kundliyon men vakri grahon ka prabhav
1. frans ke nepoliyan ki kundli men budh vakri tha.
2. gret briten ke shasak king jaerj ki kundli men budh v nepachyun donon vakri the.
3. benito musolini ki kundli men shani vakri tha tatha dvitiya vishvayuddh men inka pramukh hath tha.
4. bharat ke pratham rashtrapti dae. rajendra prasad ki kundli men budh vakri tha.
5. edolf hitalar ki kundli men budh vakri tha.
6. netaji subhashchandra bos ki kundli men shani vakri tha.
7. dalailama ki kundli men budh vakri hai.
8. shekh mujiburrahman ki kundli men shukra v shani vakri tha.
9. lal bahadur shastri ki kundli men shani v guru vakri the.
10. ameriki president kainedi ki kundli men budh v mangal vakri the.
11. shrilanka ki pradhanmantri bhandarnayke ki kundli men tritiyesh v dashmesh mangal vakri tha.
12. ijipt ke raja faruk ki kundli men shani, guru v nepchyun tin grah vakri the. inki kundli men vakri grahon ne inke vyaktigat vikas men bahut bari sahayta ki. sankshep men grahon ki vakrata ka prabhav: janmakal ka vakri budh vale jatak sanket, antardrishti ki bhasha samjhte hain. inki tivra kalpanashakti evan rachnatmak pravritti hoti hai. lekhak ke rup men ye vatavaran evan charitra chitran par jyada evan ghatnaon par kam dhyan dete hain.
jyotishi ke rup men thos v satik fal par kam tatha bhav varnan aur charitrik visheshtaon par jyada dhyan dete hain. logon ki alochna par kam tatha atmachintan par jyada dhyan dete hain. musibat men jyada ghabra jate hain aur jyada galtiyan kar jate hain. ghatnaon ke ghatit ho jane ke pashchat jyada sakriya ho jate hain. guru: kathinatam karyon men saflta prapt kar lete hain, inmen karya karne ki adbhut kshamata v shaili hoti hai. jahan sab asafal ho jate hain vahan se ye karya ko pura karne aur sanvarne ki chunauti svikar karte hain, ye duradarshi, dhairyavan v ganbhir svabhav ke jadugar hote hain.
ye hath aye avasar se labh uthane se nahin chukte. vakri mangl: aise jatak shighra krodhi, bharkau bhasha bolne vale, vahmi tatha jhagralu svabhav ke hote hain. ek bar karya men lag jane par ye use pura karke hi chorte hain. vaise ye nishkriya svabhav ke hote hain. ye jatak vaigyanik, daektar v rahasyamay vidyaon ke janakar hote hain. ye aise karya hath men lete hain jinmen sharirik shakti kam se kam lage. ye neta, planar evan prabandhak hote hain. sharirik shram inko mansik pira pahunchata hai. vakri shukra: vakri shukra vale vyakti bare kalakar, sangitagya, kavi, lekhak, jyotishi adi hote hain. ye bhavuk, premi evan vidrohi svabhav ke hote hain. inmen srijnatmak shakti hoti hai. inko yadi samman evan prashansa n di jay to jaldi nirash ho jate hain.
ye dharm marmagya, manvtavadi, sevabhavi v paropkari svabhav ke hote hain. inki prashansa karen tabhi inko jit sakte hain. vakri shani: ye apne shankalu v shaki svabhav ke karan apne logon ko shatru bana lete hain. ye bhagyavadi, ekantapriya, laprvah, darpok evan lachile svabhav ke hote hain. ye jansanpark se ghabrate hain, bahut kuch karna chahakar bhi kuch nahin kar pate, dohra jivan jite hain, dikhakar adhik karte hain. sharirik shram kam, thos kam kam, jivan ka vyavharik paksh kam parantu adhyatmik paksh par jyada safal hote hain. vakri yurens: adbhut shakti, pratibha ki dhani, tivra kalpana shakti, shighra buddhi evan karya karne ki shakti tatha manviya sadgunon se sanpann vyaktitva vale ye jatak hote hain. inmen adbhut akarshan shakti, pratikul paristhitiyon evan kathin pariksha kal men bhi ye vichlit nahin hote. satya ke anveshak, darshanik, dayalu, manvtavadi, sahyogi, paropkari evan sahishnuta ke gunon se bharpur hote hain.
vakri nepachyun: ye jatak sadguni, shubh karmon ke prati sachesht, vishvasi, paropkari v udar hote hain. ati vishvas karne ka bura fal milta hai. ye adhyatmik, vinamra, krantikari, rurhiyon ke virodhi, sarvadharm samanvayi, manvtavadi, adhunik spasht vichar, shaikshanik anusandhan ke sath adarshavadi jivan inki visheshta hai. parantu ye log dikhava jyada karte hain. vakri pluto: ye vyakti samajik kranti men agrani hote hain. inka adhikatam samay samajik sudhar evan vikas men vyatit hota hai. ye har samay kuch n kuch karne ke adi hote hain.
ye akele hi musibton se takkar lete hain. aise vyakti prakhar vakta evan samajik neta ke rup men pratishtha prapt karte hain. ye samaj sudharak, grihasth, sadhu, dharm pracharak, manavadharm rakshak hote hain. aise vyakti apne jati, dharm, kul, parivar ki pratishtha ke prati bahut satark rahte hain. surya, chandra sadaiv margi hi rahte hain, vakri nahin hote. rahu tatha ketu sadaiv vakri hi rahte hain.