parhai-likhai men saflta ke shastriya upay v upyogi jyotishiya samagri ankur nagauri vidyarthi jagat ki upalabdhiyon men pustak, vidyalay aur shikshak ke alava jin mahatvapurn baton ka vishisht yogdan rahta hai. unmen parivesh arthat vastu evan anya karkon ka sahi yogdan hone aur kuch choti-choti baton par dhyan dene se upalabdhi ki gunavatta nishchit rup se kai guna barh jati hai. yahan aise kuch ghatak tatvon aur karkon ka ullekh hai jinka labh sabhi vidyarthi utha sakte hain. vastu shastra : adhyayan kaksh ek aisa sthan hai, jahan par vyakti gyan, buddhi ke sath-sath parhne ke shauk ko pura karta hai. is kaksh ka vastavik kshetra, bhavan ke uttara-purva men hota hai. iske alava yah kaksh uttar, purva tatha pashchim disha ke bich bhi ho sakta hai.
dakshin-pashchim (naitya kon) dakshin, vayavya kon adhyayan kaksh ke lie upyukt nahin hote. uttara-pashchim disha ke barhe hue bhag men bachchon ko kabhi adhyayan n karne den. yahan adhyayan karne se bachche ke ghar se bhagne ki ichcha hogi. adhyayn-kaksh men vidyarthiyon ko sadaiv purva, uttar ya ishan kon ki taraf munh karke parhna chahie. isse vah vilakshan pratibha ka dhani v gyanvan hoga. purva disha ki or munh karke parhne vale bachche doktar, injiniyar, aiees adhikari tak ho sakte hain. purva disha likhne-parhne ke lie sarvottam hoti hai. uttara-purva men rahne vale bachche ki sehat bhi kafi achchi rahti hai. makan ke uttara-purva kon ke bane kamre men dakshin ya pashchim ki thos divar ke sahare baithakar parhne se saflta jaldi milti hai. is kamre men uttara-purva ki divar par roshndan ya khirki jarur honi chahie. bachche ko agney kon men baithakar parhne se mana karen, kyonki yahan baithne se raktachap barhta hai aur bachcha hamesha hi pershan rahta hai. mehanat karne ke bavjud bhi saflta hath nahin lagti.
parhai ho ya daftar, pith ke piche khirki shubh nahin hoti. isse parhai/naukri chut jati hai. piche v kandhe par roshni ya hava ka ana ashubhta ko hi darshata hai. jis makan men, jahan kahin bhi tin ya isse adhik darvaje ek sidh men ho ya gali ki sidh men hon to uske bich men baithakar nahin parhna chahie. iske bich men baithakar parhne se bachche ki sehat thik nahin rahti, sath hi parhne men bhi man nahin lagta. vidyarthiyon ko kisi bim ya duchatti ke niche baithakar parhna ya sona nahin chahie, anyatha mansik tanav utpann hota hai. adhyayan kaksh ki divar ya parde ka rang halka pila, halka hara, halka asmani ho to behatar hai. kundli ke anusar shubh rang janakar agar divaron par karvaya jaye, to jyada behatar parinam samne ate hain. yadi vidyarthi kampyutar ka prayog karte hain to kampyutar agney se dakshin v pashchim ke madhya kahin bhi rakh sakte hain. ishan kon men kabhi bhi kampyutar n rakhen.
adhyayn-kaksh ke tebal par uttara-purva kon men ek gilas pani ka rakhen. iske alava tebal ke samne ya pas men munh dekhne vala aina n rakhen. adhyayan kaksh men sona mana hai. is karan se vahan par palang, gadda-rajai adi nahin honi chahie. vaise sote samay bachche ka sir purva disha ya dakshin disha ki or achcha rahta hai. rudraksh ratn kavach : yah kavach char mukhi rudraksh evan panna ratn ke sanyukt mel se nirmit hota hai. char mukhi rudraksh brahma ji ka svarup hone se ise vidya prapti ke lie dharan karna shubh hota hai. panna ratn se buddhi ka vikas hota hai, jisse parhai men achchi saflta prapt hoti hai. sarasvati yantra : jin vidyarthiyon ko adhik mehanat karne par bhi pariksha men achche ank prapt nahin hote, unhen yah yantra ghar men sthapit karna chahie aur shraddha se dhup, dip, gandh, akshat adi se pujan tatha nimn mantra ka jap karna chahie. mantra : un ain hrin klin sarasvatyai namah॥ ya devi sarvabhuteshu vidyarupen sansthita.
namastasyai namastasyai namastasyai namo namah॥ fengshui : agar bachche ka parhai men man nahin laga raha ho, to tebal par ejukeshan tavar lagana chahie. iske prabhav se bachche ki parhai men ekagrata barhegi aur parhai men bachche ka man lagne lagega. bachche ki pariksha men shandar saflta ke lie adhyayan kaksh men sfatik gole uttar disha men latkane chahie. navaratn ka paudha bachche ke navagrah ko thik karta hai. ise uttar disha men lagana chahie. vidyarthi apni mej par glob rakhen aur ise din men tin bar ghumaen. piramid : piramid ka jal agar bachche ko pilaya jaye to bachche ki sehat thik rahegi aur bachche ki parhai men ruchi barhegi. tantra v totke : agar bachcha parhai men man nahin laga raha ho to ek sabut ninbu lekar bachche ke sir ke upar se sat bar utaren, utarte samay ninbu se nivedan karen ki 'amuk ki har bala tere sar'.
iske pashchat ninbu ko ara katakar kisi chaurahe par faink den aur bina mure vapis a jayen. bachche ko agar najar lagi ho to bachche ka padhai men man nahin lagta. iske upay ke lie 7 lal mirch, 1 chammach rai ko lekar bachche ke sir par se viprit disha men sat bar utarakar agni men dal den. isse bari se bari najar turant utar jati hai. bachche ko najar lagne par apne makan ki dehli par bithakar kali urad, namak v mitti ko barabar matra men lekar sat bar utarakar dakshin disha men faink den. 11 gomti chakra bachche ke sir par se sat bar utarakar pravahit karen. yah upay lagatar sat somvar karen.
bachche ka parhai men man lagna shuru ho jayega. pratyek budhvar ko gay ko hara chara dalen, isse bachche ko vidya aur buddhi ati hai. jin bachchon ki smaran shakti kamjor ho, unhen niyamit rup se 11 tulsi ke patton ka ras mishri ke sath dene se smaran shakti men vriddhi hoti hai.