jahan ek or sadharan jan-manas shani ki sarhe-sati v dhaiyya (kantak shani) ko lekar bhaybhit rahta hai, vahin ek vidvan v anubhvi jyotishi yah janta hai ki gochar fal adhyayan ke lie jatak ki kundli ko anek kasautiyon par parkhna parta hai. matra shani ke janmakalin chandrama, usse 2 ya 12 bhavon par 4 athva 8ven bhav par gocharasth hone se bhaybhit hone ka koi karan nahin. gochar ka sukshmata se adhyayan karne hetu maharshi parashar dvara batai ashtakavarg ki vidhi ka prayog ek anubhvi jyotishi karna kabhi nahin bhulta. ashtakavarg paddhati men grah ki gochar men sthiti n keval janmakalin chandrama tatha janm lagn se sanbandh rakhte hain, apitu pratyek grah ki sthiti janmakalin surya, mangal, budh, guru, shukra v shani se vibhinn bhavon men dekhi jati hai.
inmen rahu-ketu jo ki chaya grah hai, ko sammilit nahin kiya jata. maharshi parashar krit brihat parashar hora shastra men rahu-ketu ke ashtakavarg banane ka koi ullekh nahin hai. rahu-ketu ka gochar yadyapi bhrigu (nari) men bahut mahatvapurn hai, parantu shastriya granthon ke anusar ashtakavarg men inka koi sthan nahin. ashtakavarg paddhati men pratyek grah ko lagn tatha anya sabhi grahon se uski vibhinn bhavon men janmakalin sthiti ke anusar vibhinn rashiyon men 0 (shunya) athva 1 (ek) ank prapt hota hai. isi ke adhar par pratyek grah ka bhinnashtak varg banaya jata hai.
tatpashchat sabhi satane grahon ke bhinnashtak varg ke adhar par sarvashtak varg ki ganna ki jati hai. sarvashtak varg ke adhar par trikon shodhan tatha ekadhipti shodhan ke pashchat shodhya pind ki ganna ki jati hai. iske bad shubh-ashubh fal dene vale nakshatron ki ganna ki jati hai, jisapar surya, chandra adi grahon ke gochar ke parinam svarup jatak ko vibhinn grahon ke karak tatva anusar falon ko bhogna parta hai. samanyatah sarvashtak varg men jis rashi ko 18 se kam ank prapt hane vah rashi nirbal mani jati hai, 25 ank par madhyam, 30 ya usse adhik ank par shubh. shani tatha anya grahon ke gochar men sanbandhit faladesh men sarvashtak varg tatha unke apne bhinnashtak varg men achche bindu hone par shubh kam bindu hone par ashubh fal kahe gaye hain.
grahon ke bhinnashtak men 4 se kam bindu kisi rashi men hona ashubh mana gaya hai tatha 4 ya usse adhik bindu shubh mane jate hain. parantu in samanya niyamon ke kuch apvad bhi hain. jaise 6, 8 athva 12 bhavon men sarvashtak varg tatha grahon ke bhinnashtak varg men kam bindu hona achcha mana jata hai. sath hi yadi vinshottari dasha achchi chal rahi ho to anya bhavon men (6, 8, athva 12 ko chor) bhi yadi kam bindu hon tab bhi bure fal nahin prapt hote. arthat shubh grahon ki prabal dasha men yadi shani ka gochar ashtakavarg men kam bindu liye rashi se ho tab bhi shubh fal hi prapt honge. aiye ab ashtakavarg ke in samanya niyamon ko kuch udahrnon ki sahayta se samjhte hain:
udahrn
1 ka vivechan ah vartaman pradhanmantri shri narendra modi ki kundli vargottam vrishchik lagn ki hai. apne rajnaitik kariyar men ye rashtriya star par surkhiyon men sarvapratham tab ae jab inhen aktubar 2001 men, shukra-budh ki vinshottari dasha men gujrat ka mukhyamantri bana diya gaya. us samay shani vrishabh rashi men sarvashtak varg men 24 bindu lekar tatha apne bhinnashtak varg men matra 1 bindu lekar gocharasth tha. ashtakavarg men kamjor bindu tatha ashtamesh budh ki antardasha ne modi ji ko varsh 2002 ke gujrat dangon ke bad mushkil halat men dal diya. rajnaitik partiyon tatha midiya men unki alochna hui. kintu ye apne pad par bane rahe aur shandar karya se udyog jagat v janta ka dil jitne men safal hue. gat mai 2014 men jab ye lok sabh chunavon men shandar jit ke bad pradhanmantri bane to us samay ye shani ki sarhesati men the. tula men shani sarvashtak varg men 17 ank liye hai, jo ki achcha hai kyonki 12ven ghar men kam ank ashtakavarg paddhati men achche mane jate hain.
shani ke bhinnashtak men keval 3 ank tula rashi ko prapt hai. sath hi chandrama men guru ki shubh dasha ne anukul ashtakavarg ka bakhubi sath nibhaya aur ye apni sarhesati men ek shaktishali rajneta ban kar ubhre. ab gocharasth shani vrishchik rashi men modi ji ke janmakalin chandrama tatha lagnesh v shashthesh mangal par gochar karega. sarvashtak varg men vrishchik rashi ko 30 ank tatha shani ke bhinnashtak men 1 ank prapt hai. yah madhyam fal dene vala gochar tatha march 2015 se shuru ho rahi chandrama men shani ki ashubh vinshottari dasha unke rajnaitik kariyar men kuch mushkilen laengi. bijepi dvara 2015 men ram mandir, kaeman sivil kod, govadh pratibandh, dhara 370 men badlav jaise ugra hindutvavadi muddon ko jor-shor se uthaya jaega jiske karan modi ji ko anek alochnaon ka samna karna parega.
udaharan kundli 2 ka vivechan ah sinh lagn ki yah kundli ‘am admi parti’ ke sansthapak arvind kejrival ki hai. disanbar 2013 men guru-budh-chandra ki vinshottari dasha men ye dilli ke mukhyamantri bane. inhonne shrimti shila dikshit ko vidhan sabha chunavon men karari mat dekar bharat ki rajniti men sansni faila di. kintu gochar men shani inke sarvashtak varg men tula rashi men matra 23 ank liye tha. bhinnashtak men shani ke tula men matra 2 ank hain. kamjor gochar tatha tula-mesh ke aksh par grahan ke prabhav se inhonne ek bhari bhul karte huye 14 farvri 2014 ko guru-budh-mangal ki vinshottari dasha men svayan mukhyamantri pad se tyagapatra tak de diya tatha bad men mai 2014 ke lok sabha chunavon men karari har jheli. ab vrishchik rashi men gochar karte hue shani, inke janmakalin chandrama se ashtam bhav men tatha lagn se chaturth men ashubh sthiti men ane vale hain. vrishchik men shani ko sarvashtak varg men keval 23 ank tatha bhinnashtak men matra 2 ank prapt hain. atah arvind kejrival ko abhi apne rajnaitik jivan men aur sangharsh v badhaon ka samna karna hoga. agami guru-ketu ki vinshottari dasha, jo ki march 2015 se shuru ho rahi hai, men unke fir se mukhyamantri banne ki achchi sanbhavnaen hongi.
udaharan kundli 3 ka vivechan ah kark lagn ki yah kundli tin bar dilli ki mukhyamantri rahi shrimti shila dikshit ki hai jo ki disanbar 2013 ke dilli vidhan sabha chunavon men karari har ke bad ab kathin daur se gujar rahi hain. rahu-rahu-guru ki vinshottari dasha men ye chunav harin tatha rahu-rahu-budh ki dasha men agast 2014 men inhonne keral ke rajyapal pad se istifa diya. tula ka gocharasth shani inke janmakalin chandrama se ashtam men hai tatha lagn se chaturth bhav men punah kharab sthiti men gochar kar raha hai. ab vrishchik rashi men jane par bhi shani kuch khas achcha nahin kar paega kyonki sarvashtak varg men vahan, tula ki bhanti, keval 27 bindu hain. shani ke bhinnashtak men tula tatha vrishchik men keval 2 ank hain. lagatar do kamjor rashiyon men shani ka gochar tatha rahu-rahu ki ashubh vinshottari dasha ne rajnaitik kariyar ko barbadi ki or dhakel diya.
udaharan kundli 4 ka vivechan ah sinh lagn ki yah kundli jammu-kashmir rajya ke vartaman mukhyamantri shri umar abdulla ki hai. umar abdulla 5 janvri 2009 ko chandrama-shukra ki vinshottari dasha men rajya ke mukhyamantri bane the. us samay shani sinh rashi men 30 sarvashtak bindu (ank) liye gocharasth tha. shani ke bhinnashtak men sinh rashi ko 6 ank prapt hain, jo ki bahut achche ank hain. parantu vartaman men shani tula rashi men sarvashtak varg men 27 ank tatha bhinnashtak men keval 2 ank lekar gochar kar raha hai jo ki bahut achchi sthiti nahin hai. hal hi men kashmir ghati men ai barh ke bad paida huye halaton men inki sarkar ko rajya men janta ka gussa jhelna para. ab vrishchik rashi men ja rahe shani inke janmakalin chandrama se ashtam tatha lagn se chaturth men buri sthiti men gocharasth honge. sarvashtak varg men vrishchik men 30 ank tatha bhinnashtak varg men shani ko vrishchik men 2 ank prapt hain jo ki sadharan hai. mangl-shukra ki vartaman vinshottari dasha men inki parti ke disanbar 2014 men hone vale rajya vidhan sabha chunavon men har ki sanbhavna hai. umar abdulla ki kundli is bat ka achcha udaharan hai ki sarvashtak varg aur bhinnashtak men milne vale ankon ka mahatva shani ke gochar fal adhyayan men kitna mahatvapurn hai.
uprokt char udahrnon men di gai rajnetaon ki kundliyan darshati hain ki shani ke rashi parivartan se ane vali sarhesati ya dhaiyya se ghabrane ki bajay, ashtakavarg tatha dasha ki kasauti par shani ke gochar ko janmakundli men lagakar hi koi faladesh karna chahie. aise anek udaharan diye ja sakte hain jinmen mahatvapurn vyaktiyon /rajnetaon ne shani ki sarhesati ya dhaiyya men ullekhniya safltaen pain. inmen gocharasth grahon ko ashtakavarg men milne vale ank v anukul dasha ka adhik mahatva tha. narendra modi, rajiv gandhi, chaidhri charan sinh, indira gandhi adi kai netaon ne sarhe-sati ya dhaiyya men pradhanmantri ban apne rajnaitik jivan ki unchaiyon ko chua hai.