mahabharat ke samay kurukshetra men jab bhagvan shrikrishn ne kaurv-sena ko yuddh ke liye upasthit dekha to unhonne arjun se unke hitke liye kaha - he mahabahu arjun ! tum shatruon ko parajit karne ke nimitt ranbhimukh khade hokar pavitra bhav se durga (shakti) ka stavan karo. sangram men buddhiman vasudevnandan ke aisa kahne par arjun rath se utar pade aur hath jodakar durga ka dhyan karte hue is prakar stavan karne lage- he siddha-samuday ki netri ayen ! tum mandarachal ke vipin men nivas karti ho, tumhara kaumar (brahmacharya) vrat akshunn hai, tum kal-shakti evan kapal-dharini ho, tumhara varn kapil aur krishnapingal hai, unhen mera namaskar. bhadrakali tatha mahakali ke rup men tumhen namaskar.
atyant kupit chandikarup men tumhen pranam. he sundari ! tumhin sankton se par karne vali ho; tumhan sadar namaskar! tum mor-pankh ki dhvaja dharan karti ho aur nana bhanti ke abhushnon se bhushit rahti ho. he mahabhage ! tumhin katyayni, karali, vijya tatha jaya ho. atyant utkat shul tumhara shastra hai, tum khag tatha charm dharan karti ho. he jyeshthe ! tum gopendra shrikrishnaji ki choti bahin aur nandgop ke kul ki kanya ho. he pitanbar dharini kaushiki tumhen namaskar hai. uma, shakambhari, maheshvari, krishna, kaitbhnashini, hiranyakshi, virupakshi aur ghumakshi adi rupon men mera pranam hai. he dev ! tumhin ved-shravan se hone vala mahan punya ho, tum ved evan brahmanon ki priya tatha bhutkal ko janne vali ho.
jambudvip ki rajdhaniyon aur mandiron men tumhara nivas-sthan hai. he bhagvti ! kartikey janni ! he kantarvasini ! durge ! tum vidyaon men mahavidya aur praniyon men mahanidra ho. he devi ! tumhin svaha, svadha, kala, kashtha, sarasvati, savitri, vedmata aur vedant adi namon se kahi jati ho. he mahdevi ! mainne vishuddh chitt se tumhari stuti ki hai, tumhare prasad se ranakshetra men meri sada hi vijay ho. bihad path, bhayajanak sthan, durgam bhumi, bhakton ke grih tatha patal-lok men tum nivas karti ho aur sangram men danvon par vijay pati ho. tumhin jambhani (tandra), mohini (nidra), maya, lajja, lakshmi, sandhya, prabhavti, savitri tatha janni ho.
tushti, pushti, dhriti tatha surya aur chandrama ko adhik kantiman bananevali jyoti bhi tumhin ho. tumhin bhuti-manon ki bhuti (aishvarya) ho aur samadhi men siddh tatha charanajan tumhara hi darshan karte hain. is prakar stuti karne ke anantar manushyon par kripa rakhne vali bhagvti durga arjun ki bhakti ko samajhakar bhagvan shrikrishn ke samne hi akash men sthit hokar bolin- he pandunandan ! tum svayan nar ho aur dudrvarsh narayan tumhare sahayak hain; atah tum thode hi samay men shatruon par vijay prapt kar loge. ran men shatruon ki kaun kahe sakshat indra ke bhi tum ajey ho. aisa kahakar yah vardayini devi usi kshan antadhryan ho gayi.