27 aprail 2018 ki subah ki kiran apne sath anu kumari ke jivan men kabhi n dubne vala suraj lekar ai. is din sangh lok seva ayog ki pariksha ke parinam ae the. ghar men charon or khushi ka mahaul tha. khushi har kisi ke chehre par sushobhit ho rahi thi. sab anu ko badhai de rahe the. anu se adhik khush uski man thi. aj unki varshon ki tapasya ka fal jo unki beti ko mila tha. unka bhara pura parivar tha, parivar men sabhi the, bahut pyar karne vali man, aspatal se sevanivritt pita, ek keyar karne vala pati, ankhon ka tara beta aur ji bhar ke ashirvad dene vale sas-sasur. bas yahi thi anu kumari ki duniya. anu ne kabhi bhi mehanat se ji nahin churaya, han ek samay uske jivan men aisa avashya aya jismen vo sangh lok seva ayog ki pariksha ke parinam men ek ank se chuk gai thi. kuch pal ke lie uska dil tut gaya tha, par use vapas apni himmat ko sametne men samay nahin laga tha. uske pati ne use samjhaya tha ki koi bat nahin, is bar saflta nahin mili to kya hua, fir se koshish karo, is bar jarur safal ho jaogi.
anu ki man ko aj achanak se vo din yad a raha tha jab anu ka janm hua tha. anu se pahle bhi unke yahan ek beti thi, dusri beti ke ane par sabke chehre murjha gae the, sab ek bete, ghar ke chirag ki pratiksha kar rahe the. beti ko pakar vo bahut khush to n hue the, aspas ke logon ne baton hi baton men dusri beti ke janm par kitni baten suna di thi, par anu ke pita ne himmat nahin hari thi, unhonne usi samay sabse kah diya tha ki kya hua jo beta n hua, vo ise hi bete ki tarah palenge. bas usi din se uska paln-poshan ek bete ki tarah hone laga tha. jo sukh-suvidha ghar ke bete ko di jati hai, vahi use di gai. uski parhai men kisi bhi tarah ki kami nahin ane di gai. usi ka parinam tha ki aj anu kumari aiees ban apne mata-pita ka gaurav barha rahi thi.
anu kumari ne sivil sarvis men pure desh men dusra sthan prapt kiya tha. anu kumari ko prapt hone vale is saflta ke lie anukumari ke sath-sath uska parivar bhi badhai ka patra hai. ham sabhi dekhte hain ki hamare aspas ghar men betiyon aur bahu ko age barhne men parivar ka sahyog nahin mil pata hai. aur agar bat ho sasural ki to sanbhavnaen aur bhi kam ho jati hain. hamare desh men aj bhi lakhon-karoron larkiyan vivah ke bad jimmedariyon ke lie apne kariyar, apni mahatvakankshaon ki bali charhati a rahi hain, par anu kumari ka sasural isse juda tha, use vo sab apne sasural men mila tha jo usne apne mayke men paya tha, vahi man ke rup men sas ka dular aur pita ke rup men sasur ka margadarshan. anu kumari svayan kahti hain ki aj vo jo kuch bhi hain usmen uske pati, sas aur sasur ka bahut bara yogdan hai.
anu ka janm ek gramin parivesh men hua tha, vahan 12vin ki shiksha usne sonipat ke hi ek karibi skul se puri ki thi. hairani ki bat yah hai ki jis skul se usne 12vin tak parhai ki thi, usi skul men uska beta bhi shiksha prapt kar raha hai. anu bachapan se hi honhar chatra rahi thi, vah parhai men bhi ruchi leti aur khel aur sanskritik karyakramon ka bhi hissa banti. vah kisi kohinur se kam nahin thi, jise uske skul, ghar aur sasural ke sahyog ne tarash diya.,
anu ki kamyabi par hariyana sarkar ne ise beti bachao, beti parhao ki brand anbesadar banane ka adesh diya hai. ek sadharan se parivar ki beti ne apne ghar, apne parivar, apne shahar, apne rajya ka nam pure desh men roshan kiya hai. sahi mayne men dekha jae to anu ki mehanat aur saflta aj aise sabhi logon ke munh par kisi tamache se kam nahin jo betiyon ko janm se purva hi kokh men mar dalne ki parampara ka palan karte rahe hain. aj tak hariyana betiyon ko kokh men hi mar dene ke lie surkhiyon ki shobha banta raha hai. yah ek aisa rajya hain jahan par linganupat bahut hi kam hai. usi rajya men ek beti ka aiees banna kisi chamatkar se kam nahin hai. anu kumari aj mahilaon ka barhta manobal hai, ek prernasrot hai. aiye ham sab bhi aj pran len ki apni betiyon-bahuon ko samajik bandhnon men bandhne ki jagah unke sapnon ko pankh dekar unhen urne ke lie khula asman denge. fir dekhiega har ghar men ek anu kumari hogi. aiye anu kumari ki kundli se dekhte hain ki unki kundli men aise kaun se yog the jinke falasvarup aj inhen yah sthan prapt hua.
anu kumari ka janm vrishabh rashi men hua, kundli men uchch ka chandrama inke manobal ko bal de raha hai. “chandrama manso jatah arthat man chandrama ke saman hota hai. kundli men chandrama ka bali hona vyakti ko mansik rup se adhik bali banata hai. aisa vyakti jivan ki kisi bhi viprit paristhiti men ghabrata nahin hai. hausla banae rakhta hai aur sakaratmak bana rahta hai. chandra par chaturthesh surya aur navmesh evan dashmesh shani ki purn drishti hai. saptamesh aur dvadshesh mangal bhi apni chaturth drishti se chandra ko sahas pradan kar raha hai. surya-shani donon vrishchik rashi men ek sath hone par sarkari kshetra men saflta dene men tanik deri avashya karte hain. isi vajah se pratham bar men ye ek ank se chuk gain. rashish shukra pratiyogita bhav men panchmesh ke sath hai. rashish aur panchmesh donon trikonesh hain, donon ka ek sath hona kundli ko vishesh bal pradan kar raha hai. labh, unnati aur saflta ke lie kundli ka ekadash bhav dekha jata hai, inki kundli men ekadash bhav men rahu sthit hai. dvisvabhav rashiyon aur ekadash bhav men rahu sabse achcha fal dete hain, apni mahadsha, antardasha men jatak ko saflta ka svarnim avasar pradan karte hain. rashish shukra apni mulatrikon rashi men sthit hai. dhanesh ke sath sthit hone se dhandayak hai. vartaman men vrishabh rashi par shani ki ashtam dhaiyya prabhavi hai.
sarkari kshetra men saflta aur pad prapti ke lie chaturthesh ka surya se sanbandh hona chahie, inki kundli men chaturthesh surya apne se chaturth sthan par bhagyesh ke sath hai. trikon aur kendra bhav ke svamiyon ka ek sath hona rajyog karak hota hai. ayesh svayan dhankarak guru hai. karmabhav men guru uchchabhilashi hokar mangal ke sath hai.
samanya se adhik purusharth aur prayas ke lie tisra bhav aur tisre bhav ke svami ki sthiti ka vishleshan kiya jata hai, inki kundli men tritiyesh svayan chandrama hai, apne se ekadash bhav men sthit hai, jiska parinam inhonne samanya se adhik purusharth dikhaya aur saflta arjit ki. jivan men bahut achchi saflta pane ke lie bhagya bhi bali hona chahie. bhagyesh shani apni tisri drishti se bhagya bhav ko dekh bhagya ko prabal kar rahe hain, inhen bhagya ka pura sahyog prapt ho raha hai. is samay gochar men bhagyesh shani inke ashtam bhav par vicharan kar inke kariyar bhav ko sakriya kar rahe hain. ayesh guru bhi gochar men dasham men sthit janm guru ko drishti dekar ay aur karyakshetra men sukhad parinam prapt hone ka karan ban rahe hain.
inki kundli men banne vale yog is prakar hain -
amla yog, vashi yog, gauri yog, chakravarti rajyog, parijat yog, aur vasi yog jaise shubh yog hain. in yogon ne inki saflta ko saral banaya.