ank jyotish men ankon ko tin shreni men banta gaya hai. 2, 4, 8 shubh shreni men ate hain, 3, 5, 7 ashubh shreni men jabki 6 evan 9 sam prabhav vale hote hain. inki dosti donon prakar arthat shubh v ashubh donon hi ankon se hoti hai, par ye khasakar ashubh ankon ki dosti ko lalayit rahte hain. ek bat ka dhyan rakhna chahie ki shubh v ashubh ko yahan samanya arth men nahin lena hai, yah matra ankon ko do shreni men karne men liya jata hai. ek shreni ke logon men ek hi tarah ka vichar panpega evan acharan bhi karib-karib ek hi jaisa hoga. ank 1 kisi se bhi maich karta hai.
in ankon ka sabhi nau grahon se atut sanbandh hai. yah sarva vidit hai ki prithvi par hone vali har kriya men inhin grahon ka hath hota hai. ank 1 ka svami surya, 2 ka chandra, 3 ka guru, 4 ka rahu evan yurenas (hindi mat valon ke lie rahu evan pashchim ke mat valon lie yurens) 5 ka svami budh, 6 ka shukra, 7 ka ketu evan nepchyun, 8 ka shani aur 9 ka svami mangal hota hai. ankon ke dvara bhagya janne ke lie kam se kam tin tarah ke ankon ka adhyayan karna parta hai. ye tinon tarah ke ank janm tithi se hi prapt hote hain. ye hain mulank, bhagyank evan disha nirdeshak ank.
purn janm tithi men tithi, mas evan varsh tinon ka hi sthan hota hai. jahan mulank vyakti ke vyaktitva ko spasht karne ke lie hota hai, vahan bhagyank, uske bhagya men kya hai, janne ke lie hota hai. disha nirdeshak ank janm sthan ke sthaniya samay se jana jata hai. pratyek ank ke lie 2 ghante 40 minat ki avdhi hoti hai evan iski ganna madhya ratri se hoti hai. yah vah ank hota hai, jiske sahare manushya apne karm dvara bhagya ko badal sakta hai. janmakundli men jo sthan lagn ka hota hai, vahi ank jyotish men disha nirdeshak ank ka. agar kisi jatak ke mulank, bhagyank evan disha nirdeshak ank tinon ek hi varg ke ho jaen, to vah bari hi asani se apne bhagya ko badal sakta hai. par agar bhagyank evan disha nirdeshak ank donon bhinn shreni ke hon to bhagya badlne men jyada pareshani hoti hai. log apni marji se pukaru nam kuch bhi rakh dete hain, par yah tarika thik nahin hai. iska sanbandh bhagyank se athva disha nirdeshak ank se avashya hona chahie. jis tarah se kundli men rashi ka nam janm nakshatra ke charan se sanbandhit hota hai, usi tarah se pukaru nam upar batae gae donon ankon men jo jyada shubh ho, usi ke anusar rakhna chahie.
nam ko ank men badlne ke lie chaldiyan dvara banai gai ev ank jyotish ke visheshagya kiro dvara samarthan prapt talika ka hi upyog karna behatar hoga. ismen kisi bhi akshar ko 9 ank se nirdeshit nahin kiya gaya hai. unke anusar 9 ka ank bhagvan ka ank hota hai. pukaru nam se kisi ko bar-bar pukarne se ek vishesh kanpan hota hai, jo bhagya ke khel men paroksh rup se kam karta hai. jatak ke jivan men tin tatvon ka sthan mahatvapurn hota hai. dil, dimag evan dhan. in tinon ko bhi ank apne anusar samarthan dete hain. iske lie tin chakron ka nirman karna hota hai- dhan ka chakra, bhavna ka chakra- jiska dil se sanbandh hota hai aur vidvata ka chakra-jiska sanbandh dimag se hota hai. pratham chakra ko 1, 4, 7 ka samarthan prapt hota hai,
dvitiya ko 2, 5, 8 ka aur tritiya ko 3, 6 evan 9 ka. janm tithi ke ankon ko inhin tin chakron men banta jata hai aur jis chakra men jyada ank prapt hote hain, jatak jivan men usi ke anusar kam karta hai. yahan par spasht hai ki chakra men ankon ka samavesh ankon ki shubh ya ashubh shreni par nirbhar nahin karta hai. in chakron men ae ankon ki sthiti yah spasht karti hai ki jatak ke dhan ki sthiti kya hai, vah kisi bhi kam ka nirnay dil se lega ya dimag se. isi bat ko adhar man kar use parhai ke vishay evan vyavsay ka chunav karna chahie. bina dhan ke aj ke sansar men kuch bhi nahin hai. dhan ke chakra men 1, 4 evan 7 tin ank ate hain.
1 ank ke prabhav se saf-suthre dhan ki sthiti prapt hoti hai, vahin 4 se kale dhan ki. 7 ka ank, ketu se sanbandhit hota hai, jo dan dharm, moksh se sanbandhit hota hai, atah yah kamae hue hue dhan ka kharch dan dharm dvara karata hai. iski sthiti us samay jyada visfotak ho jati hai jab 2 bhagyank ho evan bhavna chakra men aya ho aur dhan chakra men 7 bhi ho. kahne ka arth yah hai ki janma-tithi men 2 evan 7 donon hi maujud hon evan 2 bhagyank ho, apnon se dhokha milta hai evan jatak apni puri sanpatti dan kar deta hai. in nau ankon ke atirikt ek dasham ank hai jise asim shakti ke lie jana jata hai. yah ati vishisht gyan ka ank kahlata hai,
arthat janm tithi men agar shunya bhi ho to vah jatak dimag ka tej avashya hoga. jivan men shadi evan vyavsay bhi ek mahatvapurn sthan rakhte hain. agar inke lie sathi ke chunav ki jarurat ho to ankon ka sahara lena chahie. kintu jinhen sath rahna hai unka svabhav milna evan bhagya ka sath dena bhi jaruri hai. yahan ankon ki shubh-ashubh shreni ko dekha jata hai. shubh ke sath shubh, ashubh ke sath ashubh ya sam mile to thik hoga. par yah jaruri nahin ki mulank ke sath-sath bhagyank bhi mile, agar ek mil raha hai to donon men kisko chunna chahie? yahan mulank ki apeksha bhagyank ko jyada mahatva dena chahie. bhagya agar sath de, to log apne ap hi mil jate hain, par is bhautik yug men svabhav mile evan bhagya sath n de to kuch bhi thik nahin hota hai. kya ank jyotish ke anusar jatak ke jivan ki sthiti ek saman hoti hai? nahin. jis tarah jyotish men dasha samay ke badlne se jivan ki sthiti bhi badlti rahti hai usi tarah ismen bhi ankon ki dasha samay badlta hai.
har ank ka dasha samay nau varsh bad badlta hai. dasha samay men chalne vala ank agar bhagyank ka mitra ho to shubh fal ki evan shatru hone par ashubh fal ki prapti hogi. yahi vajah hai ki kabhi-kabhi mitra bhi apas men shatru ho jate hain, pati-patni ke bich sanbandh vichched ho jata hai. ank jyotish ke adhar par ratn dharan karna chahie ya nahin. meri samajh se nahin. iske lie kundli ka sahara lena chahie. kundli men bhagyank ki sthiti shubh ho, par kamjor ho, to bhagyank ka ratn avashya dharan karna chahie aur puja evan jap bhi karna chahie. ashubh sthiti men rahne vala grah ratn dharan karne se shubh nahin hota balki takat pakar aur bhi ashubh fal dega.