kumar sahab aj bahut prasann the. kitne din bad unke angan men khushi aur utsav ke pal ae the. unka parivar bhara pura tha. ishvar ki kripa se unhen do putriyon aur do putron ka sukh prapt tha aur ab matra das din bad unki jyeshth putri natasha ka vivah sanpann hone ja raha tha. lekin khushi ke sath sath vishad ki rekhaen bhi unke chehre par saf jhalak rahi thin kyonki unki suputri vivah se bilkul bhi khush nahin dikh rahi thi aur bar-bar vivah n karne ki jid par ari hui thi.
ve samajh nahin pa rahe the ki yah uski apni bhavi jindgi ke prati asuraksha ki bhavna hai ya kuch aur. kisi yuvak ke prati uski asakti bhi iska karan nahin thi. isi soch men baithe the ki jyeshth putra ne akar bataya ki didi ne to apne kamre ko andar se band kar liya hai aur kahti hai ki agar jabaradasti mera vivah karenge to ann jal tyag dungi. ghar men ghor sannata cha gaya. kumar sahab aur unki dharmapatni ko kato to khun nahin . abhi ek do din men to kitne rishtedar a jaenge aur n janen ve kya sochen. natasha ka yah ravaiya unki soch ke bahar tha.
sath hi yah chinta bhi sata rahi thi ki kahin vah koi bhayankar kadam hi n utha le. natasha ki kai minnaten karne par bhi usne darvaja nahin khola aur yahi kahti rahi ki jab tak shadi ke lie mana nahin karenge tab tak main bahar nahin aungi. puri rat kumar sahab pasopesh men pare rahe aur subah hote-hote unhonne apna faisla le liya aur dil par patthar rakhakar subah hi unhonne apne bhavi samdhi ko fon kar atyant sharminda hote hue shadi ke lie mana kar diya aur unke savalon ka javab n dene ki sthiti men apni rulai rokte hue fon band kar diya.
hanste khelte ghar men mano matam cha gaya. sabhi bachchon aur baron ke man men ek hi saval tha, akhir kyon natasha shadi nahin karna chahti? itna achcha ghar aur pati usne kyon thukra diya? natasha bachapan se bahut shaitan aur purush prakriti ki larki thi. apne chatra jivan men vah atyant medhavi thi aur aj ek uchch sarkari pad par asin thi. aisi anushasit larki ka aisa vyavhar unke hriday ko bahut vyathit kar raha tha. jab natasha ko pata chala ki uske vivah ke lie mana kar diya gaya hai, to usne darvaja khola, kintu itni der men usne sab saman sutkes men rakh liya tha.
usne apna faisla sunate hue kaha ki vah jivan bhar vivah nahin karegi aur koi bhi usse is bare men koi prashn nahin karega. sabhi ko yah faisla manjur hai, to vah ghar men rahegi anyatha bahar alag ghar lekar rah legi. mata-pita evan bhai-bahnon ke ansu bhi use pighla n sake aur ant men samaj men apni ijjat ka khyal karte hue kumar sahab ne use ghar men hi rahne ko kaha aur man hi man mano use apne dil se juda kar diya.
natasha ke baki bhai bahnon ka vivah samay se ho gaya, kintu uske mata-pita ko uske vyavhar se aisa ghun laga ki ve samay se pahle hi mrityu lok ko prasthan kar gae. natasha ko lekar sabhi ke man men tarh-tarah ke prashn uthte rahte, par natasha ne mano munh par patti bandh rakhi thi. vah chah kar bhi kuch kah nahin sakti thi. vah sabse kaise kah deti ki kisi bhi purush ke prati uske man men koi akarshan nahin hota aur n hi uska man kisi bhi purush ke sath jivan sangini ki tarah rahne ki gavahi deta tha.
use bachapan se apni sakhi saheliyan bahut pasand thin aur ab bhi vah apni ek do saheliyon ke sath hi samay bitana pasand karti thi. pichle varsh apni ek priya saheli ke vivah par vah bahut roi thi tatha usne use bhi vivah n karne ke lie bahut manaya tha. par usne apne mata-pita ko natasha ki tarah dhokha nahin diya. ab kai varshon se natasha apne bhai-bhabhi se alag apna ghar lekar rahti hai aur apne jivan ki praurh avastha men pahunch chuki hai.
usne apne ghar men apni vyaktigat sahayta ke nam par anek kishoriyane ko rakha par koi bhi adhik samay tak nahin tik pai, bas dipa uske sath char-panch varshon se rah rahi hai aur vah uske prasadhan, vastron, gahnon tatha pratyek shauk ka is kadar dhyan rakhti hai ki shayad hi koi pati apni patni ka rakh pae. bharat men is tarah se kisi mahila ka mahila ke sath rahna aprasangik lag sakta hai.
inglaind aur brajil men ise kanuni manyata mil chuki hai. aur chanuki ajakal samachar patron evan ti vi chainlon par aisi anek khabren di jati hain aur iski kanuni manyata ki mang bhi ki ja rahi hai, manai samjhti hun ki is tarah ki kundli ki vyakhya karna aprasangik evan anuchit nahin hoga. sharirik evan mansik sukh ke lie lagn aur chandra ko vishesh rup se dekha jata hai.
natasha ki kundli men lagn rahu ke nakshatra men hai, rahu saptam bhav men nich ka hokar ketu ke nakshatra men aur ketu mangal ke nakshatra men hai jo chandra rashi ka svami hai aur ast evan parast hai aur sath hi chandra ko dekh raha hai. isi tarah se chandra, jo man ka karak hai, guru ke nakshatra men, guru aur ast mangal ki drishti men hai. parantu guru pap kartari yog se pirit hai.
is paristhiti men lagn aur chandra donon hi pirit hain jinhonne use sharirik evan mansik sukhon se vanchit rakha hai. inhin ki vajah se natasha ke vyavhar evan vicharon men aprakritik parivartan aya. natasha ke lagn men nich grah ketu par kisi bhi shubh grah ki drishti nahin hai aur sare grah rahu aur ketu ke bich kalasarp dosh se grast hain. chandra nich ka hai aur rahu aur shani ke madhya sthit hone se papakartari yog se pirit hai.
apni is sthiti men chandra natasha ke man ko vichlit rakhta hai. yah uske charitra evan svabhav ko nakaratmak rup se prabhavit kar raha hai. parantu chandra par guru ki drishti hone se samaj men uski maryada ko koi thes nahin pahunchi. dhan sthan men dhan karak guru uchch rashi men sthit hai aur karm sthan ko dekh raha hai. islie vah karm jivan men uchch pad par asin rahi aur uski arthik sthiti bahut sridrirh rahi.
parakram bhav men pap grah surya aur mangal evan shubh grah budh tatha shukra ki yuti aur un par rahu ki drishti ne use purush prakriti ka kintu vyavharkushal banaya hai. surya aur mangal ki yuti chote bhaiyon se matbhed evan paraspar duri ki suchak hai. isilie usne apne bhai bahnon ke bhavishya ki chinta n karte hue vivah n karne ka drirh nishchay kiya. sukh bhav men budh chalit kundli men sthit hai aur svayan sukh bhav ka svami bhi hai, islie use apne jivan men har prakar ka sukh prapt hua. pancham bhav men uchch ka shani ketu ki drishti men hai aur panchmesh shukra karak ho kar ast ho gaya hai.
islie vidya ke kshetra men usne anek videshi bhashaon ka gyan arjit kiya, par santan sukh nahin mila kyonki santan bhav ka karak guru bhi pap kartari yog men pirit hai. prakritik pap grah rahu shani se drisht hokar saptam jaya bhav men nich rashi men sthit hai aur kalatra karak grah shukra ast hai. stri jatak ke lie guru (jo ki kalatra karak mana jata hai) bhi papakartari yog se pirit hai. islie natasha ka vivah sanpann nahin hua. vartaman samay men shukra ki mahadsha prabhavi hai jo 26/3/2020 tak chalegi.
tab tak natasha ka dipa ya kisi anya mahila se sanpark bana rahega. parantu chunki saptam bhav men rahu shunya ansh ka atyant kamjor hokar balyavastha men hai aur kisi shubh grah ki drishti men bhi nahin hai. islie natasha mansik sukh se vanchit rahegi aur apne manovanchit sukh ki prapti ke lie tarsti rahegi. is kundli men ek bat aur dhyan dene yogya hai
ki jahan ek or chandra lagn se saptam bhav ka svami shukra ast hai vahin usne chandra lagn ke svami mangal ko parast kar rakha hai. sath hi parast mangal ki chandra par purn drishti ne uski mansik sthiti ko aur adhik vichlit kar diya aur purush varg ke prati uske akarshan ko samapt hi kar diya.