duniya men aise bahut se log hue jinki jivni bahut prernadayak hoti hai, parantu duniya men aise bahut kam log hote hain jinki jivni itni prernadayak hoti hai ki unki misal di jati hai, unke bare men sahitya likha jata hai aur unke prashansak karoron men hote hain. inhin men se ek hain rajnikant jinhonne farsh se arsh tak ane ki kahavat ko sach kar dikhaya. rajnikant ne apne abhavon v sangharshon se bhare jivan men saflta ka jo itihas racha vah vakai duniya men bahut kam log kar pae hain.
ek karpentar se kuli banne, kuli se bi. ti. es. kandaktar aur fir ek kandaktar se vishva prasiddh suparastar banne tak ka safar asan nahin tha. rajnikant ka jivan hi nahin balki filmi safar bhi kai utar-charhavon se bhara raha hai. jis mukam par aj rajnikant kabij hain uske lie jitna parishram aur tyag chahie hota hai shayad rajnikant ne usse jyada hi kiya hai.
rajnikant ne yah sabit kar diya ki umra keval ek sankhya hai aur agar vyakti kuch karne ki than le to umra koi mayne nahin rakhti. 60 varsh ki umra ke parav par ve aj bhi shivaji - d baes aur robot jaisi hit filmen dene ka madda rakhte hain.
ek samay aisa bhi tha jab ek behtrin abhineta hone ke bavjud unhen kai varshon tak najrandaj kiya jata raha par unhonne himmat nahin hari. ye bat rajnikant ke atmavishvas ko aur viprit paristhitiyon men bhi har n manne vale jajbe ka parichay deti hai. chutkulon ki duniya men rajnikant ko aise vyakti ke rup men jana jata hai jiske lie kuch bhi karna namumkin nahin hai aur rajnikant sada is bat ko sach sabit karte rahte hain. unka yahi andaj logon ke dilon par raj karta hai.
aiye jante hain is mahan supar star ki prernadayi jivni
rajnikant ka janm 12 disanbar 1950 ko karnatak ke banglor men marathi parivar men hua. unka pura nam shivaji rav gaykvar hai. unke pita pulis men ek havldar the aur man haus vaif. ye apne char bhai-bahnon men sabse chote the. matra 9 varsh ki umra men unki man ka saya uth gaya. chunki ghar ki mali halat thik nahin thi islie yuvavastha men hi kuli ke taur par unhonne kam ki shuruat ki aur fir bi. ti.. es men bas kandaktar ki naukri karne lage. apni parhai ke dauran rajnikant thiyetar men bhi barh-charh kar hissa lete the. isilie bas kandaktar ka kam karte hue bhi alag tarah se tikat katne aur siti marne ke tarikon ke karan yatriyon aur dusre bas kandaktaron ke bich bahut paepular the.
apne shauk ko pura karne ke lie unhonne madras film instityut men dakhila le liya. instityut men ek stej sho ke dauran tamil ke mashhur nirdeshak ke. balachandar ki najar rajnikant par pari aur ve unse itna prabhavit hue ki unhen apni film men kam de diya aur rajnikant ne bhi apna charitra nibhane ke lie tamil sikhi aur is tarah unka filmi kariyar shuru hua. unhonne sauth ki kai bhashaon men jaise malyalam aur kannar bhasha ki filmon men bhi kam kiya aur 1983 men pahli baelivud film andha kanun ki. ve haelivud filmen bhi kar chuke hain.
rajnikant ki patni ek skul chalati hain jiska nam ‘d ashram’ hai. inki do betiyan hain. bari beti aishvarya ki shadi ektar dhanush ke sath hui hai v choti beti saundarya ki shadi ek udyogpti ashvin ram kumar se hui hai. apne behtrin kam ke lie rajnikant ko anek puraskar mil chuka hai. bharat sarkar ne unhen 2000 men padm bhushan aur 2016 men padm vibhushan dekar sammanit kiya.
rajnikant aj itne bare sitare hone ke bavjud jamin se jure hain ve filmon se bahar asal jindgi men ek samanya vyakti ki tarah jivan bitate hain aur asal jindgi men dhoti kurta hi pahnte hain.n rajnikant ke bare men ye bat bhi jagjahir hai ki unke pas koi bhi vyakti madad mangne ata hai to ve use khali hath nahin bhejte aur uski bharasak madad karte hain. isilie unki filmon men entri hote hi sinemaghron men log ‘thalaiva thalaiva’ chillane lagte hain jiska matalab hota hai baes aur ye jagjahir hai ki rajnikant riyal baes hain.
ab unhonne 31 disanbar 2017 ko apni rajnitik parti ka ailan kar diya hai. iske sath tamilnadu ki rajniti men ek nai parti ka janm ho gaya hai. unke anusar ve rajya men hone vale vidhan sabha chunav larenge aur desh ke prati apna katrtavya nibhayenge. ab dekhna yahi hai ki apne safal filmi kariyar ke bad rajnikant apne rajnitik kariyar men kitne safal hote hain aur dakshin bharat ki rajniti men kya badlav late hain.
jyotishiya vishleshan
sinh lagn sthir v agni tattva hone ke karan inmen gajab ki sfurti tatha apne karya ke prati drirh drishtikon hai. lagnesh surya mitra rashi men chaturth kendra sthan men hone se inke uchch atmavishvas tatha duradarshita ko dikhata hai.
inki kundli men kalasarp yog hone se balyakal men kafi sangharsh raha aur balyakal men hi chandrama ki dasha men mata ka dehant ho gaya kyonki chandrama vyayesh hokar shashth bhav men chaturthesh mangal ke sath sthit hai. lekin iske sath-sath mangal aur chandrama ki yuti lakshmi yog bhi bana rahi hai aur inke jivan men ab lakshmi ji ki vishesh kripa hai par chanuki donon grah barhven bhav ko dekh rahe hain islie ap apni sanpatti ka kafi hissa dharmarth men dan de sakte hain. vaise bhi saptamasth guru lagn ko dekh rahe hain islie rajnikant ji men dan dene ki bahut achchi pravritti hai aur kabhi kisi ko khali hath vapis nahin bhejte aur har admi ko apmen ek ummid ki kiran najar ati hai.
kundli men karmesh shukra v labhesh budh ka sath-sath pancham bhav men hone se inki abhinay kala ke kshetra men abhiruchi barhi tatha usmen inhen saflta bhi prapt hui. lagnesh surya ki karya kshetra par drishti tatha panchmesh guru ki lagn par drishti hone se inhen apne karya kshetra men itni bari saflta prapt hui. pancham bhav men shukra aur budh hone se do kanya ratn ki prapti hui. brihaspati ki lagn par drishti hone se inka chunbkiya akarshak vyaktitva hai aur lakhon ki sankhya men inke itne divane hain. saptamasth brihaspati hone se inki patni bhi shiksha se sanbandhit karya kar rahi hanai.
inki kundli ke pramukh yog hain:
sunfa yog: chandrama se dvitiya bhav men grah hone se yah yog ban raha hai jiske falasvarup ap buddhiman hain. inhonne apne bahubal v buddhi ke dvara itni unchai v saflta prapt ki. veshi yog: surya se dvitiya bhav men grah hone se veshi yog ban raha hai jiske falasvarup inke jivan men sarlta v sadgi ke sath atmiyata ke gun bhi vidyaman hain.
rajmantri pad prapti yog: amatya karak grah yadi lagn, pancham ya navam men ho to yah yog banta hai. yahan amatyakarak grah budh pancham men hone se yah yog ban raha hai aur ab bhavishya men anevali mahadsha men ap rajmantri pad par avashya virajman honge. dam yog: sabhi grah yadi chah rashiyon men hon to yah yog banta hai. inki kundli men yah yog ban raha hai islie ap dhir aur ganbhir hain tatha anek rajpuraskaron se vibhushit ho chuke hain.
kundli men pancham bhav men budh, chaturth surya, chathe bhav men mangal v saptam bhav men brihaspati v dvitiya bhav men shani ketu ke karan ap rajniti ke kshetra men purn saflta prapt karenge. janvri 2018 se lagne vali amatyakarak budh ki shubh mahadsha inhen rajniti men bara pad avashya dilvaegi aur inhen vishesh pratishtha prapt hogi.
gochar par vichar karen to gochar ka shani pancham bhav dhanu rashi se saptam bhav, ekadash bhav aur navamasth shani par purn drishti dal rahe hain aur guru bhi parakram bhav se janmasth guru, bhagya bhav aur labh ke ekadash bhav par purn drishti dalakar apna ashirvad pradan kar rahe hain lekin dvadash bhav par rahu ka gochar svasthya ko pratikul rup se prabhavit kar raha hai parantu 2018 ke ant tak svasthya ekadam anukul ho jaega aur ap puri nishtha v tatparata se apne karyon ko anjam de sakenge.