sanklit upay agney mahapuran ke ek sau chausthven adhyay se liye gaye hain. shlok sankhya ek se chaudah men grah shanti ke vidhan havan, mantra, samidhaen, sakalya adi ka spasht varnan kiya gaya hai. grah ko samarpit bhog tatha dan ka bhi vidhan bataya gaya hai.
tirtharaj pushkaraji dvara bhagvan parshuram ko bataye gaye upay is prakar hain. lakshmi, shanti, pushti, vriddhi tatha ayu ki kamna karne vale vir purush ko grahon ki puja karni chahiye. grah sthapna kram se karke surya, chandra, mangal, budh, guru, shukra, shani, rahu evan ketu ki pratimaen bhi isi kramanusar prithak prithak dhatu se banvani chahien. surya ki tanbe se, chandrama ki sfatik ya chandi se, mangal ki lal chandan se, budh ki rajat se, brihaspati ki svarn se, shukra ki rajat se, shani ki lohe se tatha rahu ketu ki sise se banaen. is puja se shubhatva ki prapti hoti hai. grahon ke rangon ke anusar hi unki puja samagri honi chahie.
is prakar grahon ke vedanusar mantra (yajurvaved se liye gaye ) aur lakriyan jisse grah shanti ke yagya ke lie agni jalai jati hai unke nam diye gaye hain jo kramshah ak, palash, khair, apamarg, pipal, gular, shami, durba aur kusha hai. in lakriyon se agni jalakar pratyek grah ki shanti ke lie shahad, ghi, dahi ya khir ki ahuti dene ka vidhan hai.
vibhinn grahon ke lie prithk-prithak bhog samagri darshayi gai hain. surya ke lie gur milaya hua bhat, chandra-khir, mangl- lapsi (gur ka bana mitha daliya), budh ke lie sathi ke chaval ki khir, guru ke lie dahi chaval, shukra-ghi, bhat, shani til mishrit bhat, rahu ke lie urad mishrit bhat tatha ketu ke lie saptadhanya ki khichri. in bhojya padarthon se ye bhog lagayen tatha brahman ko bhojan bhi avashya khilayen. iske pashchat grahon ki dakshina bhi batayi gai hai tatha kis grah ki puja karni chahie yah bataya gaya hai.
jis vyakti ki rashi se ashtam rashi men jo grah sthit hai uski puja, yagya, shanti avashya karani chahie. janmakundli men ashtam bhav men sthit grah ki evan ashtam bhav men sthit rashi ke svami grah ki puja karane se shubhatva ki prapti hoti hai. brahmaji ne in grahon ko var diya hai ki jo tumhari puja, yagyadi karta hai unke manorath ki purti sammanpurvak karni chahie. atah shastrokt vidhi se pujan, havan adi karne se grahon ki anukulta avashya prapt hoti hai.
is prakar puranokt vidhi ke anusar tatha yajurved ke mantron se grahon ke upay kiye jane se shubh fal ki prapti avashya hoti hai.
iske atirikt narad puran men grahon tatha nakshatron ke vriksh, vanaspatiyon ke bare men bhi varnan hai. narad puran ke anusar vidhivat upay karne se bhi grahon ki anukultaen prapt ki ja sakti hain. janm patrika ya janm rashi ke anusar shubh-ashubh grahon ka gahnta se vishleshan karke hi upay karayen. ashubh grah ki shanti evan shubhta pradan karne vale grah ki vriddhi ki jani chahie, donon ke upay saman nahin prithk-prithak hote hain. tisre, chate, athven tatha barhven bhav men sthit grah ki prakriti ke anusar yah nirnay liya jana chahie ki iski shanti ki jae ya pushti. grahon ki shanti karani ho ya pushti, vidhivat, puranokt, vedokt tantrokt paddhati se karani chahie.