kisi bhi kundli ka falakathan rashi, lagn evan grah dasha ko dhyan men rakhakar kiya jata hai. janm nakshatra jyotishiya shastra men vah kendra bindu hai jiske charon taraf jatak ki jivan gati chalti rahti hai. satik falakathan karne ke lie janm nakshatra vichar karna param avashyak hai. 27 nakshatron men se 6 nakshatra mul sangyak nakshatra hote hain. inmen janmen jatkon ko gandmul ka dosh lagta hai. hamare duradarshi jyotish muniyon ne surya chandrama evan lagn kundliyon ka samayojan sudarshan kundli men kiya hai. aie janen gandmul evan sudarshan kundli dvara jatak ke achar vyavhar evan arishton ki jankari... surya kundli, chandra kundli, lagn kundli tinon kundliyon ka ek sath samayojan sudarshan chakra kundli kahlata hai. lagn jatak ke samanya akar, lakshan, svabhav evan svasthya ke bare men suchit karti hai. lagn ke adhar par kundli ke anya bhavon ka kramabaddh nirdharan kiya jata hai.
in dvadash bhavon ka nirdharan karke jatak ke jivan men ghatne vali samast shubhashubh ghatnaon ke bare men vichar kiya jata hai. ‘chandrama manso jatah’ arthat chandrama jatak ka man hai. man ki shighra gati hone ke karan evan sabhi grahon men chandrama ki gati sabse adhik hone ke karan chandrama ka man par sarvadhik prabhav parta hai. jatak ke kisi bhi shubh karya jaise vivah, upanayan anya avashyak muhurton men chandrama ko adhar manakar kut jatak ke lie shubhashubh muhurt prapt kiya jata hai. surya urja ka pramukh srot hai. surya ko jatak ki atma bhi kaha jata hai. ‘atma ka ansh atma’ is adhar par kaha jata hai ki pratyek jatak apne pita ka ansh hai.
atah surya ko pita ka karak bhi kaha gaya hai. ‘jivan atma man tatha sharir ka mishran hai’ yah sudarshan chakra ka mul adhar hai. atma man tatha sharir ka sahi samayojan jivan ki purnata ke lie param avashyak hai. atma jatak ki sabse bhitri sthiti hai. man usse bahar ki tatha sharir sabse bahya sthiti hai. isi prakar ka kram sudarshan chakra kundli men bhi hai. sabse bhitar surya kundli usse upar chandra kundli, sabse bahar lagn kundli. atma ka prabhav man par v man ke vicharon ka prabhav jatak ke sharir par parta hai. pratyek jatak men atma ke rup men sirf pita ka hi ansh nahin hai balki atma pita ke madhyam se prapt janm janmantar men vibhinn yoniyon men vicharan karne ke uprant prapt anubhvon tatha sikhon ka sankalan hai. jo sarvapratham man uske bad jatak ka vikas rahta hai.
islie ek hi pita ki santan (chahe jurvan hi kyon n ho) gun, svabhav, achar, vichar, vyavhar men ek jaisi nahin hoti. iska arth yah hai ki sharir to pita se milta hai lekin is sharir ke sath aisa bhi kuch prapt hota hai jo pichle kai janmon ke vikas ka parinam hai. yahi atma hai. ham sharir ke madhyam se atma ka nirantar vikas karte rahte hain. man atma tatha sharir ke madhya setu ka karya karta hai. ek taraf man atma ka vikas karta hai to dusri taraf atma ke anubhvon ko sharir par anubhav karata hai. vichar, prayas, ganbhirta, sukh dukhah karuna, daya, prem isi ka parinam hai. yahi punarjanm ka gurh rahasya hai. hamare duradarshi jyotish marmagya rishiyon muniyon ne surya evan chandrama dvara banne vale yogon par vichar karna bataya hai. uska ashay man evan atma par anya grahon dvara parne vale prabhav se hai. man aur atma ka sahi samayojan jatak ke vyaktitva ka vikas karta hai.
surya se banne vale vasiyog, vasiyog, ubhychari yog men chandrama ko vishesh mahatva diya hai evan sarya se chandra ki sthiti ke adhar par in yogon ka nirman kiya gaya hai. chandrama se banne vale sunfa yog, anfa yog, durdhra yog, kendrum yog surya evan chandrama ki vishesh sthiti ke adhar par hi nirdharit kiye jate hain. in yogon par gahnta se vichar karke jatak ke vyaktitva, bhavishya adi ke bare men fal kathan kiya jata hai. budhaditya yog, gajkesri yog adi yogon ke adhyayan se jatak ke man, atma ki gahrai jani ja sakti hai. vastav men sudarshan chakra jyotish ka purn adhyatmik paksh hai. udahrn: svami ji ka surya makar rashi men hai. makar rashi ka svami shani karmavadi grah hai.
hamesha karya men lage rahna fal ki asha kiye bina auron ke lie karya karna, kai bar apni khushiyon ko nyochavar kar dena makar rashi ke vishesh gun hai. yah rashi puri lagan ke sath apni manjil ki or barhne vali, vyavharik soch, sahnshilta pradan rashi hai. behad suljhi rashi, apna kam apne ap karne vali rashi hai. is rashi men surya vishleshnatmak buddhi deta hai. svami ji ke makar rashi men surya hone ke karan ukt gun pradhan rup se anubhav kiye ja sakte hain. svami ji ka chandrama budh grah se prabhavit kanya rashi men hai. kanya rashi ki visheshta bhavnaon aur vicharon ko abhivyakti deta hai. shabd pradan karta hai. atah svami ji ki sabse bhitri avastha atma se prapt gunon ko kanya rupi chandra se sanyog se vicharon ki abhivyakti ke vishalta prapt hui. is surya rashi v chandra rashi ke sanyog se hi svami ji ko atm gyan prapt hua.
is atm gyan ko sabse bahri avastha sharir rupi sansar ko pradan karne ke lie ishvar dvara svami ji ko guru se prabhavit dhanu lagn prapt hui. dhanu lagn agni rupi gyan ki agni tatviya rashi hai. yah rashi gyan, ishvar bhakti, param shakti, satyavadi, adhyatmavadi, dhiraj, kuch karne ki lagan, atmavishvas se paripurn, ishvar ki chah rakhne vali, achcha salahkar banane vali rashi hai. is rashi dvara achchi shiksha, achcha gyan, adhyatm anusandhan prapt hota hai. ukt sabhi gun dhanu lagn hone se svami ji se prapt hue. sirf makar rashi men surya ya kanya rashi men chandra ya dhanu lagn vale sabhi vyakti vivekanand jaise vicharak nahin ho jate hain. ishvar dvara nirdharit niyat saur rashi, chandra rashi aur lagn vishesh dhanu lagn tinon ka samayojan hone par adhyatmik prishthabhumi vale bharat varsh ke vivekanand ke rup men vishva ko adhyatmik margadarshak prapt hua.