chatha bhav chathe bhav ko ‘upchy’ bhav bhi kaha jata hai. upachay ka arth hai gatishil. chathe ghar men sthit grah ka shubh ya ashubh prabhav bahut tej raftar ke sath hota hai. yah bhav manushya ke mansik santap, dushmani, bimari, nanihal parivar, naukri, rakhail, bhutbadha, karj aur faujdari mukdme ka karak hai. chathe ghar men sthit vibhinn grahon ka fal lal kitab ke anusar is prakar hota hai. shani chathe ghar ka shani vyakti ke karobar ya naukri men achanak badha utpann karta hai. is ghar men shani budh ke pakke ghar men hai. agar kundli men budh shubh hai to yah vyakti ko arthik paksh se shubh fal deta anyatha nahin. yah shani yadi uchch ka ho ya svarashi men arthat tula, makar ya kunbh men to us insan ke shatru prabhav nahin hote. is ghar ka shubh shani bimariyon ke vash men nahin hota parantu hajme ki shakti ko kamjor karta hai. yadi shani par mangal ya surya ki drishti ho to pet men sakht dard rahta hai. brihaspati ki drishti se jigar par bura prabhav padta hai. upay - vishesh karya ki yojna rat ko ya krishn paksh men banae. - ghar men kala kutta palen. - bimari dur karne ke lie ek puja vala nariyal chah din lagatar bahte pani men bahaen. - mitti ke bartan men sarson ka tel bharakar dhakkan ko siment se achchi tarah band karke talab ya nahar ki bhitri mitti men gahra daba den. - juton ka dan karte rahen. rahu is ghar men baitha rahu kudarat se apne ap milne vali madad ka pratik hai. aise insan ko apne pita ke alava anya kisi vyakti ka sahara bhi milta hai, jo pita ke saman uski sahayta karta hai. striyon ki kundali men yah rahu unhen mardon jaisa sahas deta hai. aisa rahu hone par insan ke kisi stri ke sath sambandh bhi ho sakte hain yadi rahu ke sath chandrama ho to aisa sanbandh kisi unche ghar ki stri se hoga. yadi rahu ke sath shani ho to aisa sanbandh mansik aur samajik taur se nimn star ki stri ke sath hota hai. iske atirikt chathe bhav men rahu hone par insan ko najar bahut jaldi lagti hai. jyotish men ek mat yah bhi hai ki aise rahu ke karan yadi bimari ho jae to asani se samajh men nahin ati aur yadi rahu achchi halat men n ho to pret badha ka bhi karak hota hai. upay - man sarasvati ki murti ke age nile rang ke pushp arpit karna. - hanuman ji ko sindur athva chola chadhana. - sikke ki goli to lal rang karke apne pas rakhna. ketu chathe ghar men ketu sthit hone par insan adhyatmik ho jata hai. kal purush ki kundli men chathe ghar yani budh ke ghar men baitha rahu insan ki arthik paksh ki or se shubh hota hai. paisa kamane ke lie ketu ki himmat aur budh ki arthik sujh donon bahut achchi arthik sthiti ka karan ban sakte hain. parantu is ketu par barhven ghar se padti hui rahu ki drishti use ruhani arthat adhyatmik prapti ki or khinchti hai. agar ketu is sanket ko n samjhe to rahu kai tarah ki mushkilen paida karta hai. aise insan ko sirf ek hi tarah ki prapti ho sakti hai, sansarik ya adhyatmik. chathe bhav men ketu hone par vyakti ko kutte katne ka khauf bhi bana rahta hai. ketu ke sath shukra hone par vyakti putra sukh se vanchit rahta hai. ketu putra ka karak hai parantu chathe ghar men sukh ka karan nahin banta. putra paida bhi ho jae to rogi paida hota hai. aisa insan kahin ek jagah tikakar bhi nahin rah sakta. upay - bua, bahan, beti ko kuch uphar dete rahen. - bayen hath ki choti ungli men sone ka challa pahne. - kutton ko khane ki vastuen dalte rahen. -kramshah
Kya aapko lekh pasand aaya?
Subscribe