vaivahik sukh ke lie kundli milan - kitna avashyak? hindu shastranusar vivah ek dharmik sanbandh hai. anya jati valon ke anusar ek samanya sanbandh hai aur vartaman men yuva pidhi ki dharna aur bhi viprit hai. yah sanbandh bas man ka bandhan rah gaya hai. samaj parivar tatha dharm ko tak par rakhakar har din vivah hote hain, jiska parinam aj ki yuva pidhi bhugat bhi rahi hai. jab tak var vadhu ka mansik tatva, sharirik tatva, buddhi bhed, dharmik bhed adi ka paraspar mel nahin ho jata tab tak vivah karna uchit nahin hai kyonki sirf man ka bandhan man liya jae to man ke vishay men vidvanon ne kaha hai ki ‘‘man ke mate na chalie, man men bhara vikar’’ atah jivan men koi bhi nirnay len shreshth buddhi se len jo hamen sanmarg le jae. vivah pure jivan bhar ke sath ke lie kiya jata hai. atah yah nirnay rishi pranit jyotish shastra ke anukul purn vichar kar karna chahie. bhinna-bhinn rashiyon ke bhinna-bhinn tatva hote hain atah yadi agni tatva vale ka vivah jal tatva vale se kar diya jae to parinam yah hoga ki ve donon ek dusre ke ajanm shatru bane rahenge. parashar, vashishth, jaimini, atri adi prachin rishiyon ne apni divya drishti se, anubhvon se tatha anek prakar se janch vicharakar niahsvarth ho manushya ke hitarth bahut si ritiyan bana rakhi hain. unka palan kar ham yuva pidhi ko vaivahik suraksha pradan kar sakte hain. bahut log vivad karte hain ki kundli milan se bahut si asuvidhaen ati hain kintu samanya jan ko yah bat samajh leni chahie ki ham apni pasand ki khariddari ke lie ek dukan se dusri dukan bhatkte hain aur kai bar samay v dhan donon ka vyay karte hain. fir vivah jaise bandhan jisko jivanabhar nibhana hai thoda kasht uthane men dukhi nahin hona chahie. var kanya ki kundli milan men dhyan rakhne yogya baten: 1. var ke saptam sthan ka svami jis rashi men ho, yadi vah rashi kanya ki bhi ho to vivah uttam hota hai. 2. yadi kanya ki rashi var ke saptamesh ka uchch sthan ho to vivah uttam hota hai. 3. var ke saptamesh ka nich sthan yadi kanya ki rashi ho to bhi achcha hota hai. 4. var ka shukra jis rashi men ho vahi rashi yadi kanya ki bhi ho to bhi achcha rahta hai. 5. var ki saptamasth rashi yadi kanya ki rashi ho to vah vivah achcha hota hai. 6. var ka lagnesh jis rashi men ho vahi rashi yadi kanya ki bhi ho to vivah sukhdayi hota hota hai. 7. var ke chandra lagn se saptam sthan men jo rashi pade vahi rashi yadi kanya ka janm lagn ho to vivah bahut shubh hota hai. 8. var ki chandra rashi se saptam sthan par jin-jin grahon ki drishti ho, ve grah jin-jin rashiyon men baithe hon un rashiyon men se kisi rashi men yadi kanya ka janm ho to vah vivah bhi uttam rahta hai. uprokt do niyamon ka vichar kanya ki kundli se bhi hota hai. yadi var kanya ki kundli men uparyukt ath niyamon men se ek bhi lagu ho to vivah shubh hoga, ek se adhik hon to sone men suhaga. uttam riti yah hogi ki pita apne putra ki kundli se dekha ki var ke lie kaun kaun si rashi ya lagn ki kanya shubh hogi. ‘kalatra’ rashi tin hoti hai. purush kundli ka saptamesh jis navansh men ho uske svami ki rashi ya rashiyon ko kalatra kahte hain. saptamadhipti jis rashi men uchch ka hota hai vah bhi kalatra rashi hoti hai. saptam bhav ka navansh bhi kalatra rashi hoti hai. jyotish shastra ka mat hai ki stri ki janm rashi purush ke uparyukt kalatra rashiyon men se kisi rashi men hona chahie athva unki trikon asth jo rashi ho unmen se kisi men stri ki janm rashi hona achcha hota hai. yadi stri ki janm rashi uparyukt rashiyon men se kisi rashi men na padti ho to us stri ke santan nahin hoti hai. jatak parijat ke anusar uparyukt kalatra rashi ke siva saptamesh jis rashi men ho ya uski trikon rashiyon men se kisi men stri ka janm rashi hona shubh batlaya hai. vivah yog kab nahin hota ya vivah sukh, in donon yogon ko bhi kundli men vishleshan kar lena chahie kyonki yadi yah yog ho to vivah ko talna hi uttam rahta hai. 1. yadi saptamadhipti shubh yukt n hokar shashtam, ashtam, dvadash bhavagat ho aur nich ka ya ast ho to vaivahik sukh men kami rahti hai. 2. yadi shashtesh, ashtamesh athva dva dashesh saptamagat ho aur usmen shubh grah ki drishti ya yog n ho athva saptamadhipti 6-8-12 ka svami ho to stri sukh men badha hoti hai. 3. yadi saptamesh dvadashagat ho aur lagnesh tatha chandra saptamasth hon to bhi jatak ka vivah sanbhav nahin hota hai. 4. yadi shukra aur chandrama sath hokar kisi bhav men baithe hon aur shani aur mangal unse saptam bhav men ho to bhi jatak ka vivah nahin hota hai. 5. yadi lagn, saptam tatha dvadash men pap grah baithe hon aur panchamasth chandrama nirbal ho to us jatak ka vivah nahin hota hai aur yadi anya yog se vivah bhi ho jae to stri bandhya hogi. 6. anya matanusar dvadash aur saptam men do-do pap grah baithe hon aur pancham men chandrama ho to jatak stri-putra vihin hota hai. 7. shani tatha chandrama ke saptamasth hone par jatak ka vivah nahin hota hai aur yadi hota bhi hai to stri bandhya hoti hai. 8. saptam bhav men pap grah hone par stri bandhya hoti hai. 9. shukra tatha budh ke saptam men rahne se jatak kalatra-hin hota hai. yadi shubh grah ki drishti ho to adhik ayu men vivah hota hai. 10. surya spasht men char rashi terah ansh aur bis kala (4/13/20) jodakar jo rashi ave vah dhum hota hai, yadi vahi saptam sthan ka spasht ho to aise jatak ka vivah nahin hota hai. 11. yadi shukra tatha mangal saptamasth hon to jatak stri rahit hota hai. shukra aur mangal ke navam evan pancham bhav men rahne se bhi vaisa fal milta hai. 12. yadi shukra kisi pap grah ke sath hokar pancham, navam athva saptam bhav men baitha ho to jatak ka vivah nahin hota hai ya stri viyog se pidit rahta hai. 13. yadi shukra, budh v shani sab ke sab nich ya shatru navansh men hon to jatak stri-putra vihin rahta hai ya dukhamay jivan vyatit karta hai. uprokt yog hone par bhi yadi navansh kundli men vaivahik sukh dene vale grah uttam sthiti men hon to vivah sukh ki sanbhavna hoti hai v purn vaivahik sukh bhi prapt hota hai. kyonki vaivahik sukh ke lie navansh kundli ka adhyayan avashyak hai, sath hi mahadsha, antardasha adi ka bhi prabhav padta hai. atah var kanya ka vivah karte samay kundli ka sukshm vishleshan kisi yogya jyotishacharya se avashya karvaen taki var-vadhu ka vaivahik jivan sukhamay ho yadi kasht aye bhi to sahniya ho.
Kya aapko lekh pasand aaya?
Subscribe