landan men hal hi men kie gae ek adhyayan ke anusar paya gaya ki pani pine se pariksharthi behatar mansik kshamataon ka pradarshan kar pate hain. frantiyars in hyumain nyurosanis namak vigyan patrika men 16 julai ko prakashit hue is adhyayan ke anusar ve pratibhagi jinhonne parikshaon men bhag lene se purva do-tin kap pani piya un pratibhagiyon ki apeksha adhik behatar kar pae jinhonne pani nahin piya. in parinamon se pata chalta hai ki jab manav apni pyas ko bujha leta hai to vah apna dhyan khinchne vali chijon se mukt ho jata hai. laiv sains dot kom ne inglaind ke purvi landan manovigyan mahavidyalay ke shodhakarta kairolin edmands ke havale se kaha, kuch parikshaon men pyas behatar parinam de sakti hai. kyonki pyas jagane vale harmons ke risav ka sanbandh manav ki sajgta evan chetna se bhi hai. isse pahle vayaskon par hue adhyaynon ke mutabik pani ki kami ke karan mastishk ke pradarshan men kami a jati hai tatha bachchon par kie gae adhyaynon ke anusar jal ke paryapt sevan se yaddasht men vriddhi ho sakti hai. hal hi men ist landan skul dvara kie gae adhyayan men 34 vayaskon ko subah 9.00 baje se hi bhojan aur pani ka kam se kam sevan karne ke lie kaha gaya tatha unhen dusre din prayogshala bulaya gaya. pratibhagiyon ko do bar prayogshala bulaya gaya. pahli bar jahan pratibhagiyon ko parikshan se pahle khane ke lie anaj vala choklet aur pine ke lie pani diya gaya, vahin dusri bar pratibhagiyon ko sirf anaj vala choklet hi diya gaya. parikshan ke dauran pratibhagiyon ko ek kanpyutar par koi bhi chij dikhai padne par jald se jald ek batan dabana tha. parikshan ke bad pani pine vale pratibhagiyon ne pani n pine vale pratibhagiyon ki apeksha kahin adhik teji dikhai. purva men kie gae adhyayan ke anusar bhi dihaidreshan ki prakriya mansik kshamata ke pradarshan star ko ghata sakti hai aur adhyayan ne yah siddh kiya ki bachchon ki smaran shakti pani pine ki adat se badh sakti hai. man v jal donon ka karak chandrama hai jo shitlta ka pratik hai islie man par pani ka vishramdai prabhav hona aur tanav adi se mukti dene vale gun ko sabhi jante hi hain. janm kundali men chandrama ki sthiti kharab hone se man ki vikrit avasthaon ka sanket milta hai aur mansik kshamataon par prashn chinh lag jata hai. iska sidha tatparya yahi hai ki man ke lie avashyak shitlta pradan karne vala chandrama dushit hone ki vajah se sahi tarike se karya nahin kar pa raha. man vah jamin hai jiske upjau hone ki sthiti men hi guru aur gyan ka bij usmen sahi tarike se panap sakta hai islie chandrama ki rashi kark (jal rashi) men hi guru uchch rashisth mane jate hain lekin chandrama ki kamjor sthiti se uchch ke guru lagabhag nishfal hone lagte hain islie chandrama ki rashi kark v svayan chandrama ke bali hokar brihaspati se sanyukt hone par hi gajkesri yog banta hai jo prabhavit jatak ko purn buddhiman bana deta hai. jis tarah se jyotish men buddhiman vyakti ki pahchan uske nirmal man v gyan ke karkon kramshah chandrama v guru se hoti hai usi prakar vigyan bhi chandrama ki karak vastu nirmal jal ke man par hone vale prabhavon ko samjhne laga hai. jyotish ise adikal se prakat karta hai. lokokti prasiddh hai hi ki jal hi jivan hai. bhagavadgita ke anusar ishvar ko jal sarvadhik priya hai. atithi ke ghar par ate hi uske svagat ke lie grih dvar par jal v pushp se bhara kalash sthapit kiya jata hai aur use pine ke lie jal pradan kiya jata hai. pani pite hi atithi prasann ho jata hai. ap khub pani pijie aur achcha mahsus kijie.
Kya aapko lekh pasand aaya?
Subscribe