apke hath pair bhavishya ka darpan em. en. svami prachin rishi maharshiyon ke nirantar chintan manan aur sadhna ke madhyam se samudrik shastra aur anya jyotish granthon ki rachna ki gai. in granthon ke nirman ka mul uddeshya jan-kalyan hai sath hi unki samasyaon ka samadhan kin-kin upayon dvara sanbhav hai uski khoj karna aur logon ke bich pahunchane ka prayas karna hai. unhin shastron ki saragarbhit bat ko ap tak pahunchane ki koshish kar rahen hain. ap ki hatheli ki banavt-
(ka) hatheli moti ya bhari ho to jatak lalchi hota hai, tatha samanya star ka jivan yapan karta hai.
(kha) sankri hatheli ho to aise log kamjor prakriti vale, apne svarth ko sarvadhik mahattva dete hain .
(ga) patli tatha kamjor hatheli vala jatak garibi ka jivan jita hai.
(gha) lanbi hatheli vale spashtavadi vyakti hote hain aur munh ke upar bolne vale hote hain.
(ra) lanbi kintu gol hatheli vale avsrvadi v hansmukh hote hain tatha arthik paksh achcha hota hai.
(cha) samchauras hatheli - hatheli ki lanbai aur chaurai barabar ho to ve vyakti svasth, shant aur drirh nishchayi hote hain.
purusharthi apne prayatn se unnati karne vale, kisi bhi karya ko pura kiye bina nahin chorte hain. angutha -angutha jitna lanba hoga, vyakti utna hi v apne ap par kantrol karne vala hota hai tatha angutha jitna chota hoga, vyakti utna hi shaitani svabhav ka hota hai ya svabhav se jiddi aur arthik sthiti kamjor hogi. angutha jitna mota hoga vah vyakti utna hi garibi halat men hoga. angutha sidha rahta hua dikhlai de aur anguthe ki nakhun vali sabse upar ka por piche ki taraf jhuki hui ho to aise jatak ki dhan daulat rishtedaron ke ya sage sanbandhiyon ke kam ati hai. aisa jatak svabhav se namra hota hai. sakhat hath vala jatak -rajya karne vala tatha uski misal chorne vala hota hai aur aise jatak ka jivan rukha aur kathor sa hota hai. aise jatak apne ap ko jyada mahatva dete hain.
badhaon ke ane par bhi nirash nahin hote, badhaon men bhi karya karte rahte hain. naram hath vala jatak aram aur sukh suvidha men jyada ruchi leta hai aur kisi bhi vyakti ki sahayta karne ke lie taiyar rahta hai. samanyatah aise jatak kalpanashil hote hain. narm tatha faile hue hath -aisa jatak sust svabhav ka tatha kam bhagya vala hota hai. chote hath vala-aise jatak ka jivan gulami men vyatit hota hai, alasya jarurat se jyada aur barhacharhakar kalpanaen karte hain. avasar ka upyog karna ye nahin jante aur samay bit jata hai. tab ye pachtate rahte hain. lanbe hath vala chan bin ki samajh vala aur jivan ko shreshth banane vala hota hai. adhik prasann rahne vala aur bhavishya ko purva men hi janne vala hota hai. lanba, bedaul v sakhat hath vala - jatak murhi ya jallad ki tarah ke svabhav ka hota hai. lal rang ki hatheli vala-krodhi aur sankirn vicharon vala tatha duradarshita rahit hota hai. gulabi rang ki hatheli -aisa jatak unnat vicharon vala hota hai. evan sadharan shreni se uthakar atyant unche star par pahunchne men samarth hota hai.
pile rang ki hatheli -khun men kisi n kisi prakar ka vikar, chirchira svabhav v sankirn buddhi hoti hai. hath tatha panv donon chote-chote hon to aisa jatak dusron ke lie manda vichar vala aur svarthi hota hai. hath ki anguliyon ke nakhunon ka rang pila ho to khun ki kami hoti hai aur sharirik drishti se kamjor hota hai. dason anguliyon ke poron men ek chakra ho to aisa jatak kai prakar ki vidyaen janne vala evan raja ki tarah jivan yapan karne vala maharthi hota hai. dason anguliyon ke poron par sirf ek shankh ho to aise jatak ko mata-pita ka purn sukh milta hai aur svayan apni ayu ke 80 varsh tak achche bhagya ke sahare sukh bhogta hai. tarjani anguli ka jhukav madhyama anguli ki or ho to aisa jatak apne irade ka pakka hota hai tatha svatantra vicharon vala pragtishil vicharon ki or nirantar kriyashil hota hai evam utsah se bhara hota hai.
pairon ki banavat aur uska fal : pairon ke nichle hisse men eri se nikalakar ek rekha anguthe tak chali jae to jatak ko vahan sukh milta hai aur uske ghar men naukar chakar ki kami nahin hoti. yadi bayan pair dayen pair se bara ho to vah vyakti ek jagah nahin tik pata. pair men angutha aur tarjani anguli apas men milte hon to bhagya manda ya kam sath deta hai. us jatak ka yadi angutha chota aur tarjani bari ho to pahle larke ya larki ka sukh kam milta hai. angutha aur tarjani anguli barabar ho to aisa jatak sukh samriddhi yukt dhanvan hota hai. angutha bara aur tarjani choti ho to aisa jatak dusre ka gulam hota hai. tarjani madhyama se choti ho to aise jatak ki stri garib parivar se hoti hai aur jatak ko usse sukh kam mil pata hai. tarjani madhyama se bari ho to achcha stri sukh milta hai.
anamika anguli madhyama anguli se jyada choti ho to aise jatak ko stri sukh kam milta hai. kanishthika anguli anamika anguli se bari ho to aise jatak ka bhagya bahut barhiya hota hai. kanishtha anguli aur anamika anguli barabar ho to aise jatak ko santan sukh achcha milta hai. parantu aise jatak ki ayu kam hoti hai. yadi panchon ungliyan barabar hon to aisa jatak vishva vikhyat hota hai ya bhikhari hota hai. yadi panchon anguliyan ek dusre se lanbi hon to aise jatak ko santan sukh barhiya milta hai.