jivan men kamyabi pane men shubh urja aur sakaratmak soch banaye rakhne ki vishesh jarurat hoti hai. yah hamen apne aspas ke mahaul aur hamare nivas se milti hai. yah ham apne aspas ke rangon se prapt kar sakte hain. in rangane ka jyotish men bahut mahatva hai. har grah ka apna ek alag rang hai jo hamare jivan par prabhav dalta hai. rangon ke sahi prayog se grahon ko bhi thik kiya ja sakta hai.
apne ghar ki shubhta ko barhane ke lie apko apne ghar ko apni rashi ke rang ke anusar sajane ka prayas karna chahie. shubh rangon se saje ghar men rahne se n keval apko saflta, unnati aur samriddhi ki prapti hogi balki yah is ghar men rahne vale anya parivarik sadasyon ke lie bhi shubh sabit hoga. ham jante hain ki rang hamare jivan men bahut mahatvapurn bhumika ada karte hain. makan ko ghar banane men ghar ki mahila ke sath-sath, ghar men prayog kie gae rangon ki bhi vishesh bhumika rahti hai.
yadi vastu sammat ghar men raha jae to ghar ka har kona apko sakaratmak urja se bhar dega. sanbhav ho to ap adhik se adhik apne shubh rangon ka prayog kar apne ghar ko vastu dosh rahit kar sakti hain. isse apka ashiyana muskurane lagega.
mesh: apne ghar ko ap lal, pila, gulabi aur aurenj rangon se sajaen yah apko vishesh shubhta dega. ghar ki sajavat ke lie apko inhin rangon ka prayog karna chahie. bed kavar, chadar v parde inhin rangon ke istemal karen. pujan kaksh ki divaron par lal rang karvayen v ghar ke puja ghar men parad hanuman ji ki sthapna karen. isse apke ghar men shanti v khushhali bani rahegi. yahan rahne se apke vyaktitva ka vikas hoga.
vrishbh: apne ghar ki divaron aur kamron ko sajane ke lie ap gulabi aur safed rang ka prayog karen. bedshit, parde nile rang ke prayog kar sakti hain. inhi rangon ke sofa kavar ya pilo kavar istemal kar sakti hain. pujan kaksh ki divaron par vishesh rup se safed rang karvaen. sfatik shriyantra ki sthapna kar pujan karen. iski shubhta se vastudoshon men kami aegi. yah apke vaivahik jivan ko sauhardapurn rakhega.
mithun: ghar ki shubhta ko barhane ke lie ap ghar men halka hara v halke nile rang ka istemal karen. ye rang apko vishesh shubhta denge. apne rahn-sahan v pahnave men bhi apko jyadatar inhin rangon ka istemal karna chahie. pujan kaksh men hare rang ka vishesh rup se prayog karana shubh rahega. haridra ganpti ka nitya pujan karen. ghar ki yah disha vastudosh se mukt hone par ghar men hamesha sukh samriddhi bani rahti hai. is prakar ka ghar apke lie unnatikarak aur shubhapradayak rahega.
karka: iske sath hi yadi ap apne ghar ko safed, silvar aur krim rang se sajate hain to ghar ko vishesh shubhta prapt hogi. pujan kaksh men safed rang karvayen athva koi halka rang bhi shubh rahega. iske atirikt apko apne kamre ke uttara-purva (ishan) disha ke kone men pani ka ghara ya bahte hue pani ka chitra avashya rakhen tatha parad shivling ki upasna karen.
sinh: apko apne ghar men narangi, silvar aur sunhre pile rang ka prayog karna chahie. parde v chadar adi men bhi in rangon ka istemal karne se apke ghar men sukh-samriddhi sadaiv bani rahegi. yah apko arogya, atmavishvas, uchchapad aur unnati dega. pujan kaksh men lal rang karane v sfatik surya ka nitya pujan karne se saflta ke sath hi jivan men pragti ke bhi avasar milenge.
kanya: apne ghar ko rangne ke lie halke hare, halke nile, gulabi aur krim rangon ka adhikatam prayog karen. apne ghar ki uttar disha men thora khali sthan avashya rakhen. pujan kaksh men halka pila rang karana shubh rahega. sfatik ganesh lakshmi ji ka pujan karen. yah apko arthik kshetron, vani aur shiksha-adhyayan karyon men shubhta dega. sukh-saubhagya, dhan-dhanya aur jivan men barhottari dega.
tula: apne ghar ko krim, gulabi v halke nile rangon se sanvaren. ap dekhenge ki apka ghar aur apka bhagya donon jagmga jayenge. pujan kaksh ki divaron par hara rang karvana shubh rahega. sath hi parad lakshmi paduka ka darshana-pujan karen. yah apko prem sanbandhon men saflta, sukhad danpatya jivan aur vahnon se kasht se bachati hai. is prakar ka ghar sadasyon ke lie bhagyashali rahega.
vrishchik: ghar men rang rogan karne ke lie lal, halka pila aur narangi rang ka vishesh rup se prayog karen tatha kapre v gahnon ke istemal men bhi inhin rangon ka prayog karen. ghar ke dakshin kone men bhari farnichar rakhne se vaibhav ki prapti hogi. pujan kaksh men koi bhi halka lal rang karana shubh hai. isse apki santan ko shiksha, kamyabi aur samriddhi milegi.
dhanu: apne bhavan ko pile, lal v narangi rang se sanvaren. pujan kaksh men halka pila rang karana shubhta dega. ap ghar ke ishan kon men chandi ke ghare men pani bharakar moti ki mala se sajakar rakhen. is disha ko hamesha saf-suthra rakhakar puja karne se apke jivan men sukh v shanti bani rahegi tatha dhan bachane men sahjta rahegi.
makr: ap apne ghar ko halka nila, hara, asmani nila aur halke bhure rangon se sajayen. yah bhavan apko pairon men dard evan vayu vikaron se mukti dega. vastu shubhta pane ke lie apko pujan kaksh men hara rang karvana chahie aur parad shiv parivar ka pujan karne se shubhta ki prapti hogi. is prakar ka bhavan apko unnati, saflta, sukh-shanti dega.
kunbh: yadi ap apne ghar men asmani v halka bhura rang karate hanai to yah ati shubh rahega. ap apne kamre ki sajavat ki vastuon ke lie bhi in rangon ka prayog kar sakte hain. naukri v ajivika kshetron men saflta milegi tatha rogon ka shighra nivaran hoga. ap apne pujan kaksh ki vishesh shubhta pane ke lie safed rang karayen v parad shivling ka pujan karen. apke unnati ke naye marg khulenge.
min: apne sapnon ke ghar ko ap pile, krim v sunhre rangon se sajaen. sath hi ghar ki sajavat aur pahnave men in rangon ka jyada istemal karen. pujan kaksh men pila rang karana bhagya prapti men sahyog karega aur sfatik kachua puja ghar men sthapit karen aur pujan karen. isse apke ghar ki sukh-shanti bani rahegi. yah bhavan apke lie shubh v bhagyashali rahega.