svatantra vyavsay ke grah yogon ki vivechna saptam bhav, dasham bhav vyavsay se sanbandhit hote hain. bhav 10-11 dhan se sanbandhit hote hain aur vyavsay se sanbandhit mukhay grah budh ko mana gaya hai. lagn, chandra lagn, surya lagn men se jo bali ho uske 10ven bhav se vyavsay se vichar kiya jata hai. dashmesh jis navansh men ho uske navanshedga ko vyavsay chayan men pramukhta di jati hai. vyavsay men saflta ke kuuch grrah yog lagn, chandra lagn, surya lagn se jo bhi atyadhik balshali ho, us lagn ke dasham bhav men yadi budh ho to jatak safal vyapari hota hai. yadi 10 ven bhav men kisi shubh grah ki drishti ho to bhi jatak vyapari hoga. yadi kundli men lagnesh evan dashmesh ek sath hon to vyapar ka yog banta hai. yadi bhav 10 ka svami bhav 1, 4, 7, 10 kendron ya bhav 5, 9 ya bhav 11 men shubh grahon se drisht hokar baitha ho, to safal vyapari banata hai. yadi dasham men baitha grah uchch ka hai to jatak ko adhik pragti karata hai. yadi nich ka hokar baitha hai to kam unnati aur vyapar men utar-charhav ka dyotak hai.
chandrama se budh, shukra, guru tinon ya koi ek bhi grah yadi bhav 1, 4, 7, 10 men se kisi men ho to vyapari banne ka yog banta hai. budh, shukra, chandra yadi ek dusre se dvitiyasth ya dvadashasth ho to bhi vyapari banne ka yog hota hai. chandrama se yadi guru, shukra tisre ya gyarhven baithe ho to bhi vyapari banne ka yog banta hai. yadi bhav 02 ka svami bhav 11 men evan 11 bhav ka svami bhav 02 men ho to bhi jatak safal vyapari hota hai. yadi kendra men pap grah hon aur un par shubh grahon ki drishti n ho to jatak mans, machli se sanbandhit vyavsay karta hai. yadi bhav 09 men shani budh, shukra ho to jatak krishi dvara dhanvan hota hai. yadi mangal aur chaturth bhav ka svami kisi ek kendra men ho ya kisi ek trikon men ho ya fir bhav 11 men ho tatha bhav 10 ka svami chandra, shukra se yuti kare ya drisht ho to jatak krishi evan pashu palan ka vyavsay karta hai. bhav 10 ka svami yadi surya ke navansh men ho to jatak dava, un, ann, sona, moti adi ka vyapar kar labh uthata hai.
yadi bhav 10 ka svami chandra ke navansh men ho to jatak moti, krishi, bachchon ke khilaune, redimet vastra, fainsi stor adi ka vvavsay karta hai. yadi bhav 10 ka svami mangal ke navansh men ho, to tanba v pital ke bartan ki dukan v koyla adi ka vyapar karta hai. yadi dasham bhav ka svami budh ke navansh men ho to jatak lakri ka karkhana, farnichar, jyotish shastra ya vaidya ka kam karta hai. yadi dasham bhav ka svami guru ke navansh men ho to jatak, adhyapak vritti tatha steshnri, dharmik pustakon adi ka vyapar karta hai. yadi dasham bhav ka svami shukra ke navansh men ho to jatak janvron ka kray, vikray, chaval, kirana athva fensi stor, saundarya prasadhan stor ka vyapar karta hai. yadi dasham bhav ka svami shani ke navansh men ho to jatak lohe, til, tel, un, chamra adi ka vyapar karta hai.
yadi vyapar karak grah budh bhav2, 3, 7 ya 11 ven men uchch ya svagrahi hon aur krur grahon se n dekha jata ho, to jatak ek safal vyapari hota hai. budh grah ki rashi mithun ya kanya ukt bhavon men pari ho, aur kisi shubh grah ke sath ho ya shubh yog bana raha ho to bhi kushal vyapari hota hai. yadi bhav 10 men vayu tatva rashi mithun, tula, kunbh men se ek ho to ilektraniks ke karya/ vaigyanik ka karya karne ki sanbhavna hoti hai. yadi 10ven bhav men agni tatva rashi mesh, sinh, dhanu ho to jatak injiniyar ya loh ya dhatu se sanbandhit karya karta hai.
yadi prithvi tatva rashi vrish, kanya, makar dasham bhav men ho to jatak prashasnik karya, arthik karya, sivil karya, dhatu se sanbandhit karya ya kheti bari ya ejensi ka karya karta hai. yadi bhav 10 men jal tatva rashi kark, vrishchik, min men se koi ho to taral padarth, rasayan, deyri vyapar, samudrik jahaj rani ya thande pey padarthon se sanbandhit karya karne ki sanbhavna rahti hai.
yadi dashmesh chandra parakram bhav men dhanu rashi men ho aur is par dhanesh mangal v lagnesh shukra ki navam bhav se drishti ho, labhesh surya bhagyesh budh ke sath labh bhav men hokar panchmesh shani se drisht ho to aisa jatak apna svatantra vyavsay/saundarya prasadhan se sanbandhit karya karta hai. yadi karmesh shukra par shani ki drishti ho, bhagyesh mangal lagnesh surya, panchmesh guru-rahu ke sath yuti kar kendra men ho aur labhesh budh ki svagrahi chandrama par drishti ho to aisa jatak vilding dijain ka svatantra vyavsay karta hai.
yadi dashmesh mangal svagrahi hokar dhanesh surya ke sath dasham men ho, bhagyesh guru chandra ke sath gaj-kesri yog banta ho, labh bhav men rahu vrishabh rashi ka ho, shukra kundli men uchchabhilashi ho sath hi parakram bhav ka svami, budh dasham bhav se dasham arthat saptam bhav ke svami shani ke sath bhagya bhav men yuti karta ho, to aisa jatak kapre ke vyapar ke kshetra men saflta prapt karta hai. iske atirikt anya kai prakar ke grahyog bhi svatantra vyavsay ya vyapar ke hote hain.