jyotish vidya ke madhyam se manushya ki ajivika ke nirdharan ke anek sutra, granth maujud hain. janmakundli ke adhar par chikitsa kshetra se jurne ke yogon ka sodaharan vishleshan prastut hai.
nimn yog hone par chikitsa kshetra se jurne ki sanbhavnaen balvan ho jati hain.
- yadi shani, rahu aur surya ki paraspar yuti ya drishti ho (kabhi-kabhi trikonatmak sanbandh hone par bhi).
- dasham bhav par uparyukt grahon ka prabhav ho.
-guru ki drishti kendra men sthit mangal par ho.
- dasham bhav par mangal evan shashthesh ka prabhav ho.
- chathe, panchven ya gyarhven bhav par mangal, rahu athva surya ka prabhav ho.
- mithun, tula ya kunbh lagn men budh tritiya bhav men rahe.
- karmesh (dashmesh) surya ho athva surya, mangal ke navansh men ho.
- chathe aur gyarhven bhavon ka yuti ya drishti sanbandh ho.
- tritiya bhav men agni tatva ki koi rashi (mesh, sinh, dhanu) ho.
uparyukt yogon ke adhar par kuch chikitsakon ki kundliyon ka vishleshan yahan prastut hai.
udaharan 1 yah ek mahila chikitsak ki janmakundli hai jo vartaman men videsh men apne chikitsakiya peshe se judi hain. inki kundli men shani aur rahu men trikonatmak sanbandh hai. dasham bhav men mangal hai, jo shashthesh evan ekadshesh bhi hai. tritiya bhav men agni tatva rashi sinh hai. chathe bhav par surya ki drishti hai. gyarhven bhav par rahu aur panchven bhav par mangal ki drishti hai.
udahrn-2 yah ek purush chikitsak ki kundli hai jo vartaman men shaskiya seva se jure hain. vah jivan ke aranbh se hi prakhar evan buddhiman rahe. inki kundli men surya shani ki yuti aur pancham bhav par shani ki drishti hai. kendragat mangal par guru ki drishti hai. dasham bhav par mangal ki drishti hai. panchven bhav men sthit rahu ki gyarhven bhav par drishti ke sath mangal ki bhi drishti hai. budh tritiya bhav men (mithun lagn men) hai. mangal shashthesh evan ekadshesh hai. tritiya bhav men agni tatva rashi sinh sthit hai.
udahrn-3 yah stri rog chikitsa se juri ek mahila ki patrika hai. yah bhi vartaman men shaskiya seva se juri hain. inki kundli ka vishleshan is prakar hai. dashmesh surya svarashi men sthit hai. surya, mangal aur rahu men trikonatmak sanbandh hai. dasham bhav par rahu, aur shani ki drishti hai. panchven aur chathe bhav par mangal aur rahu ki drishti hai. shani aur rahu men drishti sanbandh hai. ekadshesh budh par shashthesh mangal ki drishti hai. is tarah uparyukt tinon patrikaon ke jatkon men chikitsak banne ke yog maujud hain.
kintu, uparyukt vishleshan ke atirikt ajivika karak grahon ke balabal ka vishleshan bhi avashya karna chahie. iske atirikt gochar kalin grahon ka prabhav, dasha evan antardasha ka adhyayan bhi avashyak hai. ajivika ke falakathan men dasham bhav (karm bhav) ke atirikt lagnesh, navmesh, panchmesh, dhanesh evan labhesh ki sthitiyon ka adhyayan karna chahie.