lok vikhyat muhurt basant kumar soni muhurt shodhan karya ki pechidgi ko dekhte hue panchangakarta lok kalyan ki bhavna se dravit hokar vibhinn upyogi muhurton ki talika panchangon evan kalaindron men dete hain jinka labh uthaya ja sakta hai. lekin abhijit muhurt jaise kuch muhurt aise hain jinmen sab prakar ke shubh karya kiye ja sakte hain. aur ve shighratishighra purn bhi ho jate hain. is muhurt ki ganna atyant sahaj hai. is lekh ko parhakar uski jankari prapt karke uska labh uthaya ja sakta hai. muhurt ka arth, mahatvadi : falit jyotish ke anusar jab kisi vishisht nirdisht samay men koi shubh karya karna uchit ho aise bahuupyogi lokapriya kshanon ko muhurt kahte hain. dusre arthon men din-rat ka tisvan bhag muhurt kahlata hai. is prakar 2 ghati ya 48 minat ka kalkhand = ek muhurt (samy) hua.
karya ki saflta ke drishtikon se dekha jay to muhurt ke 2 bhed ho jate hain- shubh muhurt (grahya samy). ashubh muhurt (agrahya samay ya tyajya samy). janmanas men ya lok vyavhar ki shaili men shubh muhurt ke lie hi muhurt shabd ka prayog sada se hota chala a raha hai jaise ganeshadi devtaon ki pratishtha ke shubh muhurton ko ''dev pratishtha muhurta'' ke nam se jana jata hai isi prakar vivah-muhurt, griharanbh, grih pravesh muhurt, yatra muhurt ityadi. bhartiya jyotish ke muhurt khand men karyaranbh karne men grah, tithi, var adi ke praman se shubhashubh fal ka vichar karte hain. kisi bhi karya ki siddhi hetu shastragyaon ne shubh bela nirdharit ki hain jo grahon ke apsi mel, nakshatradi ki anukulta par nirbhar hoti hain, inhen hi muhurt ki sangya prapt hai.
muhurt samay aur paristhiti ke adhar par bhi nirdharit hote hain. vyaktiyon ko apne dvara kiye jane vale shubh karyon ki saflta ya siddhi ke lie pure manoyog sahit grah, nakshatra, tithi, var, yog karnadi ki anukulta ka labh pane ke lie muhurt ka upyog karte rahna chahie. muhurt shodhan ka karya bahut adhik kathin to nahin hai parantu pechida avashya hai. panchang-karta lok-kalyan ki bhavna se dravit hokar bari savdhani ke sath parishram kar muhurt shodhan karke vibhinn upyogi muhurton ki talika panchangon v kailendron men dete hain jinka kshan matra men avlokan karke labh uthaya ja sakta hai. kuchek karyon ko amrit siddhi yog, guru-pushya yog, sarvarthasiddhi yog men kar lena uttam mana gaya hai. prachin grahanto men muhurton ki udbhavna : prachin samay se hi manglik karyon ke safltapurvak nishpadan ke lie shubh lagn ya ghari arthat mangalamay bela ka vichar kiya jata raha hai arthat muhurton ka ashray lena avashyak samjha jata raha hai.
ram ke rajyabhishek ki taiyari ke samay, ek din purva ayodhya vasi nar-nari sab jagah yahi vichar kar rahe hote hain ki agle din (kal) vah sheubh ghari kab ayegi jab ve svarn sinhasan par sita sahit baithe hue ram ke darshan raja ke rup men karke kritarth ho jayenge. ramayan adi dharmagranthon ke prasang/ drishtant ya udaharan vishay vastu ki prasangikta, avashyakta evan upadeyta ki pushti karne vale evan vishay vastu ki samsamyikta, puratnta adi ko prakat karne vale hote hain. prachin dharmagranthon aur unmen uddharit prasang isi bat ko prakat karte hain ki ram aur krishn ke jamane men bhi muhurt ki udbhavna thi arthat astitva men the. lokabhiram bhagvan ramchandra ka janm abhijit muhurt men hone se is lokapriya muhurt ka nam logon ki jivha par sada se rahta aya hai. bhagvan ram suryavanshi the. unka janm surya ke vidyaman rahne par din men parne vale abhijit muhurt men hua tha.
chandravanshi bhagvan shrikrishn ka janm chandra ki vidyamanta men ''ratri madhya'' men parne vale abhijit muhurt men hua tha, islie shriram aur shrikrishn in do mahan avtaron ke prakatya kal vale ''abhijit muhurta'' ki mahatta sarvochch shikhar par rahne vali mani gai hai. din men do-do ghati vale 15 muhurt parte hain aur vaise hi 15 muhurt ratri men parte hain. ye chaughriye ki tarah din aur ratri men ek saman hote hain. pandrah muhurton men se adi ke sat muhurton ke bad parne vala athvan muhurt ''abhijit muhurta'' kahlata hai. har prakar se abhijit muhurt madhya-ratri men hi nirmit hota hai. ek khasiyat aur is muhurt ki yah hai ki saptah ke sat dinon men se madhya men parne vale din budhvar ko yah muhurt varjit mana jata hai. athvan muhurt abhijit, janmakundli ka ashtam bhav kal ya mrityu ka hota hai.
abhijit muhurt men janme ram aur shyam, lok kantak bane rakshasaraj ravan aur kans ke bhi kal ban gaye aur unka vadh karke vijyi hue. islie ise vijy-muhurt bhi kahte hain. abhijit muhurt men anekanek doshon ke nivaran ki adbhut shakti hoti hai. jab koi shubh lagn ya shubh muhurt n banta ho to sab prakar ke shubh karya is muhurt men kiye ja sakte hain. sirf budhvar ke din iska nishedh rahta hai. bhagvan hari ko atyant priya yahi param pavan, pavitra kal sab logon ko shanti dene vala rahta hai. ismen svayan kal bhi kuchek palon ke lie lokopkararth vishram karta hai, use bhi chain/shanti milti hai. is muhurt men kiye gaye samast karya sadaiv safal hote hain, shighratishighra purn ho jate hain. chaughriyon, lagnon ityadi ke samast doshon ka nash kar shubh fal pradan karne vala yah muhurt sarvashreshth mana jata hai.
madhyahn 11:45 baje se lagabhag 12:30 baje tak yah muhurt rahta hai. jab surya thik shir ke upar rahte hain tab abhijit muhurt ki bela hoti hai. matantar se 11:36 baje se 12:24 baje ki avdhi ko abhijit kal kahte hain. yah avdhi satya ke kafi samip pratit hoti hai kyonki madhyahn kal se 24 minat purva se 24 minat bad tak ki 48 minat ya 2 ghati ki avdhi abhijit muhurtavdhi mani jati hai. jab 12 ghante ka din aur 12 ghante ki rat hogi tab abhijit 11:36 se 12:24 tak rahega. yah sthul man hua. spasht man gyat karne ke lie abhisht din ke dinman ko pandrah se vibhajit karne par ek muhurt ka man ghati pal men nikal ata hai jise dhai se bhag karne par ghanta minat men ek muhurt ka man nikal ata hai. is man ko sthaniya suryoday men jorakar pratyek muhurt ki avdhi gyat ki ja sakti hai. abhijit muhurt ka samay janne ke lie ek muhurt ke man ko sat guna kar suryoday men jorne se abhijit muhurt ke aranbh hone ka samay gyat ho jaega jo athven muhurt ke samapan avasar tak chalega. abhijit sarvakamay sarvakamarth sadhnah.
arthasanchyan mananamadhvanan gantumichchatam॥ siddhi, sarva karya sarvakamna purti, dhan sangrahechchapurti aur kisi bhi prayojan se ki jane vali yatra men saflta ye sab abhijit muhurt pradan karta hai. tatparya yah hai ki vyaktiyon ki har prakar ki kamnapurti karne vala muhurt abhijit hi hai. charon varnon arthat brahman, kshatriya, vaishya aur shudradi varnon ke logon ke mel milap ke lie madhyahm men parne vala yah abhijit namak muhurt shreshth hota hai. aisa shastron ka mat hai. is muhurt ko sada apnate rahna chahie. brahm kshatriya vaishyanan shudranan nityashah. sarveshamev varnanan yogo madhyan dine abhijit॥ jis prakar se din ke muhurton ki ganna karne ke lie abhisht din ke dinman ko adhar banaya jata hai, usi tarah se ratrikalik muhurton ki ganna karne ke lie ratriman ke adhar par pratyek muhurt ka samay gyat kiya jata hai.
brahm lok men sukhpurvak virajman shri brahma ji se ek bar kashyap rishi ne prashn kiya he pitamah, ek ahoratra men chandraditya se sanbandhit muhurt, kaun-kaun muhurt hote hain unhen batlane ki kripa kijie? is prakar mahatma kashpay ke anunay vinay ke sath prashn karne par sare sansar ke guru svayanbhu brahma ji ne ratri aur din ke praman se chandra aur surya se sanbandhit sabhi prakar ke uttam se bhi uttam arthat shreshth muhurton ka varnan kiya. pandrah muhurton ke nam : raudra shvet maitra sarabhat savitra vairaj vishvavsu abhijit rohin bal vijay rnait varun saumya bhag. din aur ratri men parne vale 15-15 muhurton ko kram se inhin namon se pukara jata hai.
parantu in muhurton ke svami din aur ratri men alg-alag hote hain. ravivar ke din 14van, somvar ke din 12van, manglvar ke din 10van, budhvar ke din 8van, guru ke din 6van, shukravar ke din 4tha evan shanivar ke din dusra muhurt kulik shubh-karyon men varjit hain. in pandrah muhurton men se aj bhi sirf abhijit muhurt ka hi logon ke lie mahatva rah gaya hai. sarhe tin svayam siddh muhurt : vasanti navratra ka pratham din ya nav sanvat aranbh divas yani chaitra shukla pratipda baishakh shukla tritiya yani akshay tritiya ashvin shukla dashmi yani vijya dashmi (dashhra) aur kartik shukla pratipda, ye char muhurt svayam siddh muhurt mane jate hain. inmen se pratham tin muhurt purn evan chaturth arddhabali hone se inhen sarhe tin muhurt kahte hain.
inmen logon ko kisi karya ko karne ke lie panchang ka vichar karne ki yani panchang shuddhi dekhne ki avashyakta nahin rahti hai. charon varnon ke log tatha hamare purvaj bari hi shraddha v umang ke sath in muhurton ko sada se apnate aye hain aur safal hote dekhe gaye hain. sarvamanya lokapriya muhurt : asharh shukla navmi (bhaddali navmi) kartik shukla ekadshi (devauthni gyaras, bari gyaras, ganna gyaras ya prabodhini gyars) magh shukla panchmi (basant panchmi) evan falgun shukla dvitiya (falera doj) ye bhi svayan siddh muhurt hain. inmen koi bhi shubh tatha manglik karya adi log panchang evan jyotishiya paramarsh ke bina hi kar lete hain bina kisi hichak ke. bina ashubh ka chintan kiye anubhav se bhi in muhurton ka fal sada se shubh hota aya hai. ye muhurt hardik prasannata ke hetu bhi ban chuke hain.