vaise to saurmandal ke sabhi grah dharti par sabhi praniyon par ek jaisa hi prabhav dalte hain. lekin sabhi praniyon ka rahan sahan aur pravritti ya prakriti ek dusre se bhinn hoti hai islie grahon ka prabhav kuch kam -jyada to hota hi hai. yahan sirf mahilaon par sabhi grahon ke prabhav ka hi jikra kiya ja raha hai. kai bar mahilaen asamanya vyavhar karti hain to unhen bahut jhelna parta hai ki use kisi ne kuch sikha diya hai ya bahane bana rahi hai jabki kai bar grahon ki achchi (ugra) ya buri ( kupit ) sthiti bhi karan hoti hai.
janm -kundli men vibhinn grahon ke sath yuti ka alg-alag prabhav ho sakta hai.
surya
surya ek ushn aur satoguni grah hai,yah atma aur pita ka karak ho kar raj yog bhi deta hai. agar janm kundli men yah achchi sthiti men ho to insan ko sfurtivan,prabhavshali vyaktitva, mahatvakankshi aur udar banata hai.
parantu nirbal surya ya dushit surya hone par insan ko chirchira, krodhi, ghamandi, akramak aur avishvasniya bana deta hai.
agar kisi mahila ki kundli men surya achcha ho to vah hamesha agrani hi rahti hai aur nishpaksh nyay men vishvas karti hai chahe vo shikshit ho ya nahin par apni buddhimatta ka parichay deti hai.
parantu jab yahi surya uski kundli men nich ka ho ya dushit ho jaye to mahila apne dil par ek bojh sa lie firti hai. andar se kabhi bhi khush nahin rahti aur as -pas ka mahaul bhi tanav purn banaye rakhti hai. jo ghatna abhi ghati hi na ho uske lie pahle hi pareshan ho kar dusron ko bhi pareshan kiye rahti hai.
bat-bat par shikayten, ulahne uski juban par to rahte hi hain, dhire -dhire dil par bojh lie vah ek din rakt chap ki marij ban jati hai aur n keval vah balki uske sath rahne vale bhi is bimari ke shikar ho jate hai.
dushit surya vali mahilayen apni hi marji se duniya ko chalane men yakin rakhti hain sirf apne najriye ko hi sahi manti hain dusra chahe kitna hi sahi ho use vishvas nahin hoga.
surya ka atma se sidha sambandh hone ke karan yah agar dushit ya nich ka ho to dil duba-duba sa rahta hai jis karan chehra nistej sa hone lagta hai.
surya ko jal dena ,subah ugte hue surya ko kam se kam pandrah -minat dekhte hue gayatri mantra ka jap ,aditya-hriday ka path aur adhik pareshani ho to ravivar ka vrat bhi kiya ja sakta hai.
santri rang (ugte hue surj) ka prayog adhik karen .
chandrama
kisi bhi vyakti ki kundli men chandrama ek mahatvapurn sthan rakhta hai. stri ki kundli men iska mahatva aur bhi adhik hai.
chandra rashi se stri ka svabhav, prakriti, gun -avgun adi nirdharit hote hai.
chandrama mata, man, mastishk, buddhimatta, svabhav, jannendriyan, prajanan sambandhi rogon, garbhashay andashay, mutra -sansthan, chati aur stan ka karak hai..iske sath hi stri ke masik -dharm ,garbhadhan evan prajanan adi mahatvapurn kshetra bhi iske adhikar kshetra men ate hain.
chandrama man ka karak hai ,iska nirbal aur dushit hona man evan mati ko bhramit kar kisi bhi insan ko pagal tak bana sakta hai.
kundli men chandrama ki kaisi sthiti hogi yah kisi bhi mahila ke achar -vyavhar se jana ja sakta hai.
achche chandrama ki sthiti men koi bhi mahila khush -mijaj hoti hai. chehre par chandrama ki tarah hi ujala hota hai. yahan gore rang ki bat nahin ki gayi hai kyonki chandrama ki vibhinn grahon ke sath yuti ka alag -alag prabhav ho sakta hai.
kundli ka achcha chandrama kisi bhi mahila ko suhriday ,kalpanashil aur ek satik vichardhara yukt karta hai.
achcha chandra mahila ko dharmik aur jansevi bhi banata hai.
lekin kisi mahila ki kundli mane yahi chandra nich ka ho jaye ya kisi papi grah ke sath ya amavasya ka janm ko ya fir kshin ho to mahila sadaiv bhramit hi rahegi. har pal ek bhay sa satata rahega ya usko lagta rahega koi uska picha kar raha hai ya koi bhut -pret ka saya usko pareshan kar raha hai. kamjor ya nich ka chandra kisi bhi mahila ko bhir bhare sthanon se dur rahne ko uksaega aur ekantvasi kar deta hai dhire-dhire.
,
mahila ko ek chinta si satati rahti hai jaise koi anhoni hone vali hai. bat-bat par rona ya histiriya jaisi bimari se bhi grasit ho sakti hai. bahut chup rahne lagti hai ya bahut jyada bolna shuru kar deti hai. aise men to ghar-parivar aur as pas ka mahaul kharab hota hi hai.
bar-bar hath dhona, apne bistar par kisi ko hath nahin lagane dena aur der tak nahana bhi kamjor chandra ki nishani hai.
aise men janma-kundli ka achchi tarah se vishleshan karvakar upay karvana chahie.
agar kisi mahila ke pas kundli nahin ho to ye samanya upay kiye ja sakte hain, jaise shiv aradh ana,achcha madhur sangit sunen, kamre men andhera n rakhane, halke rangon ka prayog karen.
pani men kevre ka esens dal kar piyen, somvar ko ek gilas dhudh aur ek mutthi chaval ka dan mandir men dane, aur ghar men bari umra ki mahilaon ke roj charan -sparsh karte hue unka ashirvad avashya len. chote bachchon ke sath baithne se bhi chandrama anukul hota hai.
mangl
grahon ka senapti mangal, agnitatva pradhan tejas grah hai. iska rang lal hai aur yah rakta-sanbandho ka pratinidhitva karta hai. jis kisi bhi stri ki janm kundli men mangal shubh aur majbut sthiti men hota hai use vah prabal raj yog pradan karta hai. shubh mangal se stri anushasit, nyayapriya,samaj men priya aur sammanit hoti hai.
jab mangal grah ka papi aur krur grahon ka sath ho jata hai to stri ko man -maryada bhulne vali ,krur aur hriday hin bhi bana deta hai.
mangal rakt aur svabhav men uttejna, ugrata aur akramkta lata hai isilie janma-kundli men vivah se sanbandhit bhavon--jaise dvadash, lagn, dvitiya, chaturth, saptam v ashtam bhav men mangal ki sthiti ko vivah aur danpatya jivan ke lie ashubh mana jata hai.
aisi kanya manglik kahlati hai.
lekin jin striyon ki janm kundli men mangal kamjor sthiti men ho to vah alsi aur bujdil hoti hai,thori si darpok bhi hoti hai.
man hi man sochti hai par prakat rup se kah nahin pati aur mansik avsad men ghirti chali jati hai.kmjor mangal vali striyan hath men lal rang ka dhaga bandh kar rakhe aur bhojan karne ke bad thora sa gur jarur kha len. tambe ke gilas men pani piyen aur anamika men tambe ka challa pahan len.
jin striyon ki janm kundli men mangal ugra sthiti men hota hai unko lal rang kam dharan karna chahie aur masur ki dal ka dan karna chahie. rakta-sambandhiyon ka samman karna chahie jaise bua, mausi, bahan,bhai aur agar shadi shuda hai to pati ke rakt sambandhiyon ka bhi samman karen .
hanuman ji ki sharan men rahna kaise bhi mangal dosh ko shant rakhta hai.
budh
budh grah ek shubh aur rajoguni pravritti ka hai. yah kisi bhi stri men buddhi, nipunta, vani ..vakashakti, vyapar, vidya men buddhi ka upyog tatha matul paksh ka naisargik karak hai. yah dvisvabhav, asthir aur napunsak grah hone ke sath-sath shubh hote hue bhi jis grah ke sath sthit hota hai, usi prakar ke fal dene lagta hai. agar shubh grah ke sath ho to shubh, ashubh grah ke ashubh prabhav deta hai.
agar yah pap grahon ke dushprabhav men ho to stri katu bhashi, apni buddhi se kam n lene vali yani dusron ki baton men ane vali ya ham kah sakte hain ki kanane ki kachchi hoti hai. jo ghatna ghatit bhi n hui uske lie pahle se hi chinta karne vali aur charmarogon se grasit ho jati hai.
budh buddhi ka parichayak bhi hai agar yah dushit chandrama ke prabhav men a jata hai to stri ko atmaghati kadam ki taraf bhi le ja sakta hai.
jis kisi bhi stri ka budh shubh prabhav men hota hai ve apni vani ke dvara jivan ki sabhi unchaiyon ko chuti hain, atyant buddhiman, vidvan aur chatur aur ek achchi salahkar sabit hoti hanai. vyapar men bhi agrani tatha kathin se kathin paristhitiyon men bhi samasyaon ka hal nikal leti hain.
hare mung (sabut), hari pattedar sabji ka sevan aur dan, hare vastra ko dharan aur dan dena upuyakt hai. tanbe ke gilas men jal pina chahie. agar kundli n ho aur mansik avsad jyada rahta ho to safed aur hare rang ke dhage ko apas men mila kar apni kalai men bandh lena chahie.
brihaspati
brihaspati ek shubh aur satoguni grah hai. ise guru ki sangya bhi di gayi hai aur brihaspati devtaon ke guru bhi hain.
brihaspati buddhi, vidvatta, gyan, sadgunon, satyata, sachcharitrata, naitikta, shraddha, samriddhi, samman, daya evan nyay ka naisargik karak hota hai. kisi bhi stri ke lie yah pati, dampatya,putra aur ghar-grihasthi ka karak hota hai.
ashubh grahon ke sath ya dushit brihaspati stri ko svarthi, lobhi aur krur vichardhara ki bana deta hai.dampatya-jivan bhi dukhi hota hai aur putra-santan ki bhi kami hoti hai. pet aur anton se sambandhit rog bhi pira de sakte hai.
janma- kundli men shubh brihaspati kisi bhi stri ko dharmik,nyay priya aur gyanvan, pati -priya aur uttam santan vati banata hai. stri vidvan hone ke sath -sath behad vinamra bhi hoti hai.
kamjor brihaspati ho to pukhraj ratn dharan kiya ja sakta hai par kisi jyotishi ki ray le kar hi. guruvar ka vrat rakha ja sakta hai. svarnabhushan dharan, pile rang ka vastra dharan aur pile bhojan ka sevan kiya ja sakta hai. ek chapati par ek chutki haldi lagakar khane se bhi brihaspati anukul ho sakte hain.
ugra brihaspati ko shant karne ke lie brihaspati var ka vrat karna, pile rang aur pile rang ke bhojan se parhej karna chahie balki uska dan karna chahie ,kele ke vriksh ki puja karni chahie aur vishn au -bhagvan ko kele arpan karna chahie aur chote bachchon ,mandir men kele ka dan aur gay ko kela khilana chahie.
agar dampatya jivan kashtamay ho to har brihaspati var ko ek chapati par ate ki loi men thori si haldi, deshi ghi aur chane ki dal ( sabhi ek chutki matra hi ) rakh kar gay ko khilayen.
kai bar pati-patni alg-alag jagah naukri karte hain aur chah kar bhi ek jagah nahin rah pate to pati -patni donon ko hi guruvar ko chapati par gur ki dali rakh kar gay ko khilana chahie. aur sabse bari bat yah hai ki jhuth se jitna parhej kiya jay, bujurgon aur apne guru, shikshakon ke prati jitna samman kiya jaye utna hi brihaspati anukul hote jayenge.
shukra
shukra ek shubh evan rajoguni grah hai. yah vivah, vaivahik jivan, pyar, romans, jivan sathi tatha yaun sambandhon ka naisargik karak hai. yah saundarya, jivan ka sukh, vahan, sugandh aur saundarya prasadhan ka karak bhi hai.
kisi bhi stri ki kundli men jaise brihaspati grah mahatvapurn bhumika nibhata hai, vaise hi shukra bhi dampatya jivan men pramukh bhumika nibhata hai.
kundli ka achcha shukra chehra dekhne se hi pratit ho jata hai. yah stri ke chehre ko akarshan ka kendra banata hai. yahan yah jaruri nahin ki stri ka rang gora hai ya sanvla. sundar -netra aur sundar keshrashi se pahchana ja sakta hai. stri ka shukra shubh grahon ke sannaidhya men hai to vah saundarya-priya bhi hoti hai. achche shukra ke prabhav se stri ko har sukh suvidha prapt hoti hai. vahan, ghar, jvelri, vastra sabhi uchch koti ke. kisi bhi varg ki aurat ho, uchch, madhyam ya nimn use achcha shukra sabhi vaibhav pradan karta hi hai. yahan yah kahna bhi jaruri hai ki agar ay ke sadhan simit bhi hane to bhi vah aisho aram se hi rahti hai.
achcha shukra kisi bhi stri ko gayan, abhinay, kavya-lekhan ki or prerit karta hai. chandra ke sath shukra ho to stri bhavuk hoti hai aur agar sath men budh ka sath bhi mil jaye to stri lekhan ke kshetra men parangat hoti hai aur sath hi vakpatu bhi, baton men usse shayad hi koi jit pata ho.
achcha shukra stri men motapa bhi deta hai. jahan brihaspati stri ko thulthula motapa dekar anakarshak banata hai vahin shukra se ane vala motapa stri ko aur bhi sundar dikhata hai. yahan ham shubha mudgal aur kiran kher, farida jalal ka udaharan de sakte hain.
kundli ka bura shukra ya papi grahon ka sannaidhya ya kundli ke dushit bhavon ka sath stri men charitrik dosh bhi utpann karva sakta hai. yah vilamb se vivah, kashtaprad dampatya jivan, bahu vivah, talak ki or bhi ishara karta hai. agar aisa ho to stri ko hira pahnne se parhej karna chahie.
kamjor shukra stri men madhumeh, thairaid, yaun rog, avsad aur vaibhav hinta lata hai.
shukra ko anukul karne ke lie shukravar ka vrat aur man lakshmi ji ki aradhna karni chahie. chaval, dahi, kapur, safed-vastra, safed pushp ka dan dena anukul rahta hai. choti kanyaon ko ilaychi dal kar khir bhi khilani chahie.
kanak - dhara, shri sukt, lakshmi stotra, lakshmi chalisa ka path aur lakshmi mantron ka jap bhi shukra ko balvan karta hai. man lakshmi ko gulab ka itra arpan karna vishesh faldayi hai.
shani
shani grah tamoguni aur pap pravritti ka hai. yah sabse dhima chalne vala, shital, nistej, shushk, udas aur shithil grah hai. ise vriddh grah mana gaya hai. islie ise dirghayu pradayak ya ayushkarak grah kaha gaya hai.
yah kundli men kan, dant, asthiyon, snayu, charm, sharir men lauh tatva v vayu tatva, ayu, jivan, mrityu , jivan shakti, udarta, vipatti, bhumigat sadhnon aur angreji shiksha ka karak hai.
kisi bhi stri ki kundli men achcha shani use udar, lokapriya banata hai aur takniki gyan men agrani rakhta hai. vah har kshetra men agrani ho kar pratinidhitva karti hai. rajniti men bhi uchch pad prapt karti hai. dushit shani vivah men vilamb karak bhi hai aur nimn star ke jivan sathi ki prapti ki or bhi sanket karta hai.
dushit shani stri ko ishryalu aur hinsak bhi bana deta hai. yah stri men nirasha, udasinta aur nirsta ka samavesh kar uske dampatya jivan ko kashtamay banane men koi kasar nahin chorta aur dhire-dhire stri avsad ki taraf barhne lag jati hai.
striyon men kamr-dard, ghutnon ka dard ya kisi bhi tarah ka manspeshiyon ka dard dushit shani ka hi parinam hai. chandrama ke sath shani stri ko pagalapan ka rog tak de sakta hai. iske lie stri ko kale rang ka parhej aur adhik se adhik halke aur shvet rangon ka prayog karna chahie.
shani ko anukul banane ke lie stri ko n keval apne parivar ke hi balki sabhi vriddhajanon ka samman karna chahie. apne adhinasth karmachariyon aur sevkon ke prati sneh aur unke hak aur hiton ki raksha bhi karen. desh ke prati samman ki bhavna rakhane. shani imandari aur sachchai se prasann rahta hai.
shani ko nyayadhish bhi mana gaya hai to yah apni dasha-antar dasha men apna sufal ya kufal jarur deta hai karmon ke anusar.
shani agar pratikul fal de raha ho to hanuman ji ki aradhna karni chahie. manglvar ko chameli ke tel ka dipak hanuman ji ke age jalana chahie. shani chalisa, hanuman chalisa ka path vishesh labh dega. agar shani ke karan hriday rog pareshan karta ho to surya ko jal aur aditya-hriday stotra ka path labh dega aur agar mansik rog ke sath sarvaikal ka dard ho to shiv aradhna vishesh labh degi. kale aur gahre nile rang ka parityag shani ko anukul bana sakta hai.
nilam ka dharan bhi shani ko anukul banata hai par kisi achche jyotishi se puch kar hi.
rahu
rahu ek tamoguni mlechch aur chaya grah mana gaya hai. iska prabhav shani ki bhanti hi hota hai.
yah tikshn buddhi, vakptuta, atmakendrita, svarth, vighatan aur algav, rahasya, mati bhram, alasya chal - kapat ( rajniti ) , taskari ( chori ), achanak ghatit hone vali ghatnaon, jua aur jhuth ka karak hai.
rahu se prabhavit stri ek achchi jasus ya vakil, achchi rajnitigya ho sakti hai. vah ane vali bat ko pahle hi bhanp leti hai. videsh yatraen bahut karti hai.
kundli men rahu jis rashi men sthit hota hai vaise hi parinam dene lagta hai. agar brihaspati ke sath ya uski rashi men ho to stri ko jyotish men ruchi hogi. shani ke prabhav men ho to tantrik-vidya men nipun hogi. chandrama ke sath ho to vah kai sare vahmon men uljhi rahegi, jaise use kuch dikhai de raha hai (bhut-pret adi)...., ya bhaybhit rahti hai. agar vah aisa kahti hai to galat nahin kah rahi hoti kyonki agar stri ke lagn men rahu ho ya rahu ki dasha-antardasha men aisi bhram ki sthiti ho jaya karti hai.
rahu se prabhavit stri ki vani men katuta a jati hai. vah thori ghamandi bhi ho jaya karti hai. bhramit rahne ke karan vah kai bar sahi galat ki pahchan bhi nahin kar pati jiske falasvarup uska dampatya jivan bhi nasht hote dekha gaya hai. rahu ke dushit prabhav ke karan stri charm -rog, mati-bhram, avsad rog se grast ho sakti hai.
rahu ko shant karne ke lie durga man ki aradhna karni chahie. khul kar hansna chahie. malin aur fate vastra nahin pahnna chahie. gahre nile rang se parhej karna chahie. kale rang ki gay ki seva karni chahie. madhur sangit sunna chahie. ramaraksha stotra ka path bhi labhdayak rahega. iski shanti ke lie gomed ratn dharan kiya ja sakta hai lekin kisi achche jyotishi ki ray le kar hi.
ketu
ketu grah ushn, tamoguni pap grah hai.ketu ka arth dh vaja bhi hota hai. kisi svagrihi grah ke sath yah ho to us grah ka fal chaiguna kar deta hai.yah nana, jvar, ghav, dard, bhut-pret, anton ke rog, bahrapan aur haklane ka karak hai. yah moksh ka karak bhi mana jata hai.
ketu mangal ki bhanti karya karta hai. yadi donon ki yuti ho to mangal ka prabhav duguna ho jata hai. rahu ki bhanti ketu bhi chaya grah hai islie iska apna koi fal nahin hota hai. jis rashi men ya jis grah ke sath yuti karta hai vaisa hi fal deta hai.
ketu se prabhavit mahila kuch bhramit si rahti hai. shighra nirnay lene ki kshamata nahin hoti kyonki yah grah matra dhar ka hi pratik hota hai aur rahu is deh ka kata sir hota hai.
achcha ketu mahila ko uchch pad, samaj men sammanit, tantra-mantra aur jyotish ka gyata banata hai.
bura ketu mahila ki buddhi bhramit kar use sahi nirnay lene men badhit karta hai. charm rog se grasit kar deta hai. kam-vasna ki adhikta bhi kar deta hai jiske falasvarup kai bar dampatya -jivan kashtamay ho jata hai. vani bhi katu kar deta hai. ketu ka prabhav alg-alag grahon ke sath yuti aur alg-alag bhavon men sthiti hone ke karan jyada ya kam ho sakta hai.
ketu ke lie lahsuniya nag upyukt mana gaya hai. mangal var ka vrat aur hanuman ji ki aradhna vishesh faldayi hoti hai.gnesh chalisa ka path bhi vishesh faldayi ho sakta hai. chiriyon ko bajri ke dane khilana aur bhure-chitkbre vastra ka dan tatha inhin rangon ke pashuon ki seva karna uchit rahega.