agar lagn evan lagnesh balvan hai to vah vyakti svayan urjavan evan kshamatavan hoga aur uski pratikul paristhitiyon evan badhaon se niptne ki kshamata tatha pratirodhatmak shakti bhi dugni hogi jisse vah apna bachav karte hue age barhne ka rasta nikal sakta hai. lagn evan lagnesh ke nirbal hone par unki pratirodhak kshamata naganya ho jati hai aur use thora bhi pratikul prabhav adhik mahsus hota hai. falasvarup uski pragti men gatirodh utpann ho jata hai. is bat ko is prakar samjha ja sakta hai ki agar kisi pahlvan ko chot lag jae to vah usse jaldi svasth ho jaega, jabki ek nirbal vyakti ke lie vah janleva bhi ho sakti hai. astu balshali lagn evan lagnesh vale vyakti ko arisht yogon ka apekshakrit kam bura parin aam parilakshit hoga aur vyakti ke urjavan hone se achche yogon ka vah aur adhik labh uthaega, jabki nirbal lagn evan lagnesh vale vyakti ke urjahin rahne se use anisht yogon ka prabhav jyada kashtaprad mahsus hoga aur achche yogon ka fal bhi use apekshakrit kam labh hi de payega.
aisi sthiti janm kundali men sthit grahon ke sambandh men drishtigochar hoti hai. agar grah balvan hai to uska prabhav achcha parilakshit hoga, jabki nirbal grah ka prabhav kam ya naganya hi rahega. vaise to grahon ka bal kai prakar se aklit kiya jata hai kintu rashi anshon ke adhar par 0 se 6 a nsh tak grah ko balak 6 se 12 a nsh tak kumar, 12 se 18 a nsh tak yuva, 18 se 24 ansh tak praurh tatha 24 se 30 ansh tak vriddh mana gaya hai. is prakar kisi rashi men grah 10 ansh se 24 ansh ke bich balshali rahega. grah ki nich, ashubh ya shatrubhav men sthiti, krur, ashubh, shatru grahon ki yuti ya drishti grahon ki shubhta ko kam kar uski ashubhta men vriddhi karti hai. uchch, shubh ya mitra bhav men grah ki sthiti, shubh evan mitra grahon se yuti ya uski drishti grah ki ashubhta ko kam kar uski shubhta men vriddhi karti hai. chandrama ki sablta vyakti ki drirh ichchashakti evan mansikta ka parichayak hai.
kai bar dekhne men ata hai ki janmakundali men pratham drishtaya rajyog evan kai achche yog hone ke bavjud vyakti ka jivan sadharan star ka hi vyatit hota hai, jabki ashubh evan anishtakari yog hone ke bavjud kai vyaktiyon ka jivan asta-vyast nahin hota aur mamuli kuch jhatke sahakar ve sanbhal jate hain. yah parinamon ki visangti lagn, lagnesh, chandra evan yog nirmit karne vale grahon ke bal evan unki sthiti ke karan hoti hai. agar yog nirmit karne vale grah nirbal hain, achchi sthiti men nahin hain, pirit hain to ve apna prabhav dene men asamarth rahenge. lagn evan lagnesh ki sablta yog ki shubhta men vriddhi karegi, jabki nirbalata ashubhta ko barha degi. yah ek sarvamanya siddhant hai ki shakti ke samaksh sab natamastak hote hain. ab udaharanasvarup kuch janm kundaliyon ki sahayta se nirmit grahyogon ke vishay men lagn, lagnesh, chandra evan grahon ki sthiti evan bal ki bhumika ki vyakhya aur spasht vivechna karna upyukt hoga.
udahrnah-1 udaharan kundali 1 men lagn men uchch ke guru virajman hokar shubh hansyog bana rahe hain. chaturth bhav men sthit chandra se guru kendra men sthit hone se gajkesri yog bhi ban raha hai jo shreshth rajyog mana jata hai. chaturth bhav men svarashi tula ka shukra shubh malavya yog bana raha hai. pratham drishtaya itne shubh yogon ke bavjud jatak ne koi asadharan pragti nahin ki aur uska jivan samanya madhyamavargiya hi raha. yahan lagn 28 ansh 54 kala ki hone se nirbal hai. lagnesh chandra, jo man ka pratinidhitva bhi karta hai, 26 ansh 22 kala ka hokar vriddh hai tatha surya ke ashtamesh hone ke karan abha rahit hokar ashubh hai. iske sath ashtamesh shani evan dvadshesh budh bhi hai jo uski ashubhta ko aur barha rahe hain. guru 3 ansh 12 kala ka hokar balyavastha men hai aur us par shani ki dasham evan mangal ki ashtam drishti hai. lagn evan guru krur grahon ketu aur surya ke madhya hone se papakartari yog bhi ban raha hai jo lagn evan guru ko ashubhta de raha hai. panchmesh evan karmesh mangal bhi ashubh sthan chathe bhav men baithe hain. sabhi grah rahu-ketu ke madhya a jane se kalasarp yog nirmit hone se pragti aur avruddh ho gai. shukra bhi 26 ansh 51 kala ka hokar vriddh ho gaya aur us par ketu ki pancham drishti, shani (saptamesh, ashtamesh) evan budh (tritiyesh evan dvadshesh) se yuti ne use aur ashubhta pradan ki jisse vah shubh fal dene men asamarth ho gaya. mahadsha chakra bhi jatak ke lie achcha nahin raha. guru ki shubh dasha balyakal ke karib sarhe ath varshon men bit gai. uske bad ke 43 varsh shani, budh, ketu ki mahadsha rahi jo koi vishesh shubh fal nahin de pai. vartaman men chal rahi shukra ki mahadsha bhi koi vishesh shubh fal nahin de pai kyonki shukra nirbal evan pirit hai. is prakar lagn, lagnesh, chandra evan yog nirmata grahon ke kamjor hone tatha mahadsha chakra bhi anukul nahin ane ke karan jatak vaibhvpurn jivnyapan nahin kar saka.
udahrnah-2 udaharan kundali 2 men lagnesh shukra lagn men svarashi vrishabh ka hokar shubh malavya yog bana raha hai. lagn men lagnesh shukra, dhanesh evan panchmesh (buddhikark) budh ka bhi shubh yog nirmit ho raha hai jis par bhagyesh evan karmesh shani ki saptam drishti hai. saptamesh mangal navam bhav men evan navmesh shani saptam sthan men hai arthat saptamesh evan navmesh ka rashi parivartan hai. tritiya bhav men uchch ka guru evan navam men uchch ka mangal hai. pratham drishtaya itne achche yogon ke bad bhi jatak vaibhvshali jivnyapan nahin kar paya aur uska jivan sadharan hi raha. uski si. e. ki pairaktis bhi sucharu rup se nahin chali aur arthik tangi men hi adhikansh samay vyatit hua. yahan lagnesh aur lagn donon hi 29 ansh se adhik hone se bahut kamjor hain. shubh malavya yog nirmata shukra 29 ansh 19 kala ke hone se balhin hai aur rahu-ketu ke prabhav men hai jisse vah shubh fal dene men saksham nahin raha. dhanesh evan panchmesh budh bhi 4 a nsh 29 kala ka hone se nirbal hai aur rahu ketu ke prabal prabhav men hone se faldayi nahin raha. labhesh guru ashtamesh hokar tritiya sthan men 28 ansh 30 kala ka balhin hai aur mangal ki us par drishti hai. mankarak chandrama tritiyesh (parakramesh) hokar saptam bhav men nich ka hai tatha rahu-ketu evan shani ke prabhav men hokar aur pirit aur ho gaya hai. falasvarup jatak prabal drirh ichchashakti evan mansikta ka bhi nahin raha bhi nahin raha. bhagyesh evan karmesh shani 7 a nsh 54 kala ka hai aur rahu-ketu ke prabhab men hai. jatak ke lie shubh dasha budh ki balyakal ke lagabhag 13 varshon men hi nikal gai. uske bad ketu, shukra, surya ki dasha 36 varshon men koi chamatkari prabhav nahani de pai. chandra evan guru ki dasha men bhi koi vishesh pragti nahin hui kyonki chandrama tritiyesh hokar saptam bhav men nich ka hokar rahu-ketu, shani se pirit hai, chandrama ki kark rashi men ashtamesh guru baitha hai aur us par rahu ki navam drishti hai. mangal saptamesh evan vyayesh hokar vyay bhav ko dekh raha hai. islie iske kharche bhi kafi rahe jiski purti kisi prakar (bhagyavsh) hoti rahi, kintu arthik tangi mahsus nirantar hoti rahi. is prakar lagn, lagnesh, chandra evan yog nirmata grahon ke kamjor evan pirit ho jane tatha shubh mahadsha chakra jivan men vanchit samay men upalabdh n hone se jatak ka jivan sadharan rup se hi vyatit hua.
udahrnah-3 yah janm kundali ek prasiddh udyogpti evan vaibhvshali vyakti ki hai. yahan lagn men uchch ke guru shubh hans yog bana rahe hain. dhanesh surya labh sthan men, labhesh evan sukhesh shukra lagn men tatha lagnesh chandrama dhan bhav men sthit hokar prabal dhanyog nirmit kar rahe hain. dhankarak guru bhagyesh hokar labhesh evan sukhesh bhogkarak shukra se lagn bhav men yuti kar bhagya bhav ko navam drishti se dekh rahe hain aur is prakar sukh-samriddhi evan vaibhvshali yog bana rahe hain. lagn evan lagnesh chandra 20 ansh ke lagalabh hokar shubh hai aur balvan hai. shubh yog nirman karne vale grah shukra, guru v m ngal bhi balvan hain. mahadsha chakra bhi anukul hai. shukra ki mahadsha evan surya ki mahadsha prarambh ke 16 varshon men hi vyatit ho gai. iske bad ki mahadsha chandra, mangal aur rahu ki mahadsha men jatak ki bahuayami pragti nirantar jari hai.