prashna: bhagvan ko prasad kyon charhaven?
uttara: bhagvan svayan adesh dete hain- yatkaroshi yadashnasi, yajjuhoshi dadasi yat. yattapasyasi kauntey, tatkurushva madarpan am..
-gita, adhyay 9/shlok 28 -he manushya ! patra, pushp, fal, jal aur jo kuch tu khata hai, jo havan karta hai, jo dan deta hai aur jo tap karta hai, vah sab prathmtah mujhe arpan kar. tadnusar pratyek bhagavadbhakt bhagvan ki agya palan karne ke lie bhagvan ko bhog lagata hai. parmatma ki kripa se jo kuch anna-jal hamen prapt hota hai, use prabhu ka prasad manakar, prabhu ko arpit karna, kritagyata gyapan ke sath-sath manviya sadgun hai. ek pita ke do putra the- ek chunnu, ek annu. ghar men koi aisa prasang aya- donon ne ati agrah karke hath-kharch ke liye pita se kuch paise prapt kiye.
chunnu mele men gaya aur us paise se kuch pakauriyan kharid kar akele kha gaya. annu bhi mele men gaya, vahan usne kuch revriyan kharidin to pita ki shiksha ka smaran a gaya ki - koi vastu akele nahin khani chahie. vah daura-daura ghar aya aur mitra-mandli men baithe pita ke samne revriyan rakhakar namrata se bola-pitaji! pahle ap le lijie. balak ki is cheshta par pita ne revri ko chua tak nahin, parantu balak ki agya-palan ki pravritti par ve fule nahin samaye. mitra-mandli ne bhi prashansa ki tatha use puraskar aur paise diye. sayankal chunnu ko uske akele khane ki adat par dant pari aur punah use kabhi faltu paisa nahin diya gaya.
chunnu aur annu aur koi nahin parmatma ke do putra hain- ek nastik dusra astik. donon hi pita se ro-ro kar char paise mangte hain. nastik putra chunnu ki tarah ishvarapradatt padarthon ko svayan akela kha jata hai parantu astik putra annu vedshastron ki agya smaran karke pratham dev, pitar, atithiyon ko arpan karne ke pashchat uska prasad svayan grahan karta hai. shrimannarayan prasann hokar unhen adhikadhik riddhi-siddhi pradan karte hain. bhagvan ko bhog lagakar, unke prasad ke rup men svikar kiya gaya ann divya hota hai. bhagvan ko prasad charhana astikta ka pramukh lakshan hai.
prashna: kya bhagvan khate hain?
uttara: shrimadbhagavadgita men svayan bhagvan kahte hain- patran pushpan falan tayan yo men bhaktya prayachchati. tadhan bhaktyuphritamashnami praytatmanah..
-gita, adhyay 9/shlok 26 -arthat jo koi bhakt mere liye prem se patra, pushp, fal jal adi arpan karta hai, us shuddh buddhi nishkam premi bhakt ka prempurvak arpan kiya hua vah pushpadi main sagun rup se prakat hokar priti sahit khata hun. ‘bhavnavad siddhant’ ke anusar shastravishvasi bhakt to aisa hi samjhte hain ki ve avashya khate hain kyonki dhanna jat, namdev, vidur, sudama, shabri, draupdi, rantidev, karmabai ke yahan bhojan kiya, yahan tak ki mira ne jab bhog lagaya to bhagvan ne vish bhi piya. bhakt ki bhavna drirh ho to ek bar nahin bhagvan hajar bar khate hain.